Саҥа үөрэх дьылын саҕаланыыта, билиигэ тардыһыы, үөрэнээччилэр оскуолаларыгар эргиллэн кэлиилэрэ. Бу күн хас биирдии оскуолаҕа үөрүүлээх линейка буолар. С.А.Новгородов аатынан Чурапчы орто оскуолата 2025-2026 үөрэх сылыгар 1200 оҕоҕо билии киэҥ аартыгын аста.
Үөрүүлээх линейка А.Федотов аатынан успуорт уораҕайыгар ыытылынна. Ис-тас өттүтэн дьэрэкээнник, кыраһыабайдык киэргэтиллэн бырааһынньык өссө тупсубучча дылы.
Маҥнайгы кылааска 130 үөрэнээччи оскуола боруогун атыллаата. Бастакы кылаас үөрэнээччилэригэр бу күн – умнуллубат түгэн, билии дойдутугар бастакы хардыыларын оҥороллор. Кинилэр иннилэригэр саҥа, киэҥ билии аартыга арыллар.
Улахан кылаас үөрэнээччилэрэ, сайыны быһа сынньанан, доҕотторун көрсөн үөрүү бөҕө. Линейка түөрт өрөгөй ырыатынан саҕаламмыта, ол кэннэ оскуолабыт директора М.С.Игнатьев уонна ыҥырыылаах ыалдьыттарбыт эҕэрдэ тылларын эппитэрэ.
Быйыл саҥа үлэлии кэлбит үлэһиттэри сылаастык көрсөн ситиһиилэри баҕаран туран сибэкки дьөрбөтүн туттардылар. Оскуолабыт иһинэн үлэлиир “Алгыс” үҥкүү ансамбыла эҕэрдэ үҥкүүтүнэн киэргэттэ, салайааччы В.И.Аммосова. Ону таһынан 9 кылаас үөрэнээччитэ Массаева Дайаана саҥа үөрэх сылынан ырыатын бэлэхтээтэ.
Үөрүүлээх линейка кэнниттэн салалта, эһиил оскуоланы бүтэрэр выпускниктары түмэн, улуус баһылыга С.А.Саргыдаев кыттыылаах, Семен Андреевич Новгородов бүүһүгэр сибэкки дьөрбөтүн уурдулар. Ол кэннэ 1, 5, 11 кылаастар маҥнайгы уруоктарыгар тарҕаспыттара.
Балаҕан ыйын 1 күнүнээҕи үөрүүлээх линейка – билии күүһүн, үөрэх суолтатын өйдөтөр дьоһуннаах тэрээһин.
Саҥа үөрэх дьыла барыбытыгар ситиһиилэри, саҥа арыйыылары аҕаллын!
Кэскилээнэ СИВЦЕВА, X кылаас, С.А.Новгородов аатынан Чурапчы орто оскуолата.