Балаҕан ыйын 1 күнүгэр Кэбээйи орто оскуолатыгар маҥнайгы чуораан тыаһаата. Манна бааллара үөрүү, долгуйуу уонна учууталларбытын, доҕотторбутун көрсөн дьоллонуу.
Линейка Россия былааҕын көтөҕүүнэн уонна гииминэн саҕаланна. Эҕэрдэ тылы оскуола директора Харлампьев Г.П., нэһилиэк баһылыга Левин И.И., директоры үөрэх чааһыгар солбуйааччы Терехова Е.И. эттилэр.
Быйыл оскуола боруогун аан бастакытын 20 үөрэнээччи атыллаата. Оҕолор кылаас салайааччыта Терехова Софья Иннокентьевнаны кытта билии эйгэтин умсулҕаннаах айаныгар туруннулар. Бу айан кинилэргэ чэпчэки уонна интириэһинэй буоллун!
Кэбээйи орто оскуолата кэм тэтиминэн хардыылыыр. Ол курдук, быйыл 9-с кылаас үөрэнээччилэригэр «Университетскай кылаас» аанын тэлэччи аста. Бу суолталаах хардыы оҕолорго үрдүк үөрэх кыһаларыгар киирэргэ наадалаах предметтэри дириҥэтэн үөрэтэргэ, ону сэргэ М.К.Аммосов аатынан ХИФУ преподавателлэрин кытта үлэлиир сыаналаах уопуту ыларга кыах биэриэҕэ. Бу биһиги үөрэнээччилэрбитигэр инники идэлэрин таларга уонна баҕа санааларын ситиһиилээхтик олоххо киллэрэллэригэр көмөлөһүө диэн бигэ эрэллэрин ыалдьыттар, учууталлар эттилэр.
Бу «Билии күнэ» уратытык бэлиэтэннэ, тоҕо диэтэххэ Кэбээйи орто оскуолатыгар 1970 сыллаахха үөрэнэн бүтэрбиттэр кэлэн ыалдьыттаатылар. Бу көлүөнэлэр көрсүһүүлэрэ истиҥ түгэнинэн уонна төрөөбүт оскуолаларынан киэн туттуунан сүрэхтэри толорбут долгутуулаах түгэн буолла. Выпускниктар бырааһынньыгынан эҕэрдэлээтилэр уонна билиҥҥи үөрэнээччилэргэ сүбэ-ама биэрдилэр. Түмүккэ выпуск аатыттан оскуола тиэргэнигэр мастары олортулар уонна кэрэ, тупсаҕай көстүүлээх скамейка бэлэх ууннулар.
Оттон биҺиги, быйыл тапталлаах оскуолабытыгар бүтэҺик эппиэтинэстээх сылбыт буолар. Кырачаан үөрэнээччилэри эҕэрдэлээн туран баҕа санаабытын эттибит, «Самолетик будущего» уонна үҥкүү бэлэхтээтибит.
Үөрэнээччилэри, учууталлары уонна төрөппүттэри «Билии күнүнэн» эҕэрдэлиибит! Бу үөрэх дьыла саҥа арыйыыларынан, ситиһиилэринэн туоллун! Инникитин да саҥа чыпчааллары дабайыаҕыҥ!
Сайаана Терехова, XI кылаас
«Дьоҕур» медиакиин, Кэбээйи орто оскуолата