Бүгүн, балаҕан ыйын 1 күнүгэр 5-11 кылаас үөрэнээччилэригэр сэрэхтээх буолуу аһаҕас уруога буолан ааста.
Аһаҕас уруогу дириэктэр сүбэһитэ Саргылаана Прокопьевна Леонтьева, Хайахсыт нэһилиэгин дьахталларын сэбиэтин салайааччыта Любовь Ивановна Филиппова уонна мин кылааһым салайааччыта Надежда Семёновна Борисова ыыттылар.
Бу күн биһиги 2004 сыллаахха балаҕан ыйын 1 күнүгэр Хотугу Осетия-Алания өрөспүүбүлүкэтин Беслан куоратыгар буолбут биир саамай хомолтолоох трагедия туһунан уйадыйа иһиттибит. Терроризм ыар содулугар сүүһүнэн ахсааннаах туох да буруйа суох оҕолор тыыннара быстыбыта.
Хаһан умнуллубат күнү ахтан-санаан ааһар уруокпутугар участковай Харлампий Тарасович сэрэхтээх буолуу туһунан кэпсээтэ.
Аһаҕас уруок кэнниттэн миэхэ маннык санаалар кэллилэр. Хаһан эрэ үөрэ-көтө сылдьыбыт оҕолор, кинилэр иннилэригэр кыһалла сылдьар төрөппүттэр, учуталлар билигин таас пааматынньык буолан тураллара наһаа да хомолтолоох. Терроризм содулугар өлбүт дьону умнубакка ахтан-ааһабыт. Маннык ыар түгэн биһиги олохпутугар хаһан да хатыламматын.
Лилия МАРКОВА, IX кылаас,
А.П. Илларионов аатынан Хайахсыт орто оскуолата, Чурапчы