Балаҕан ыйын 1 күнэ — бары үөрэнээччилэргэ, төрөппүттэргэ, учууталларга ураты долгутуулаах күн. Быйыл оскуолабытыгар үөрүүлээх линейкаҕа халлааммыт сайыҥҥылыы туран биэрэн, Мария Петровна Прокопьева аатынан сквергэ буолла. Арассыыйа, Саха Өрөспүүбүлүкэтин,Тааттабыт улууһун өрөгөйүн ырыатынан тэрээһиммитин арыйдыбыт.
Үйэлээҕи түстүүр,
Үчүгэйи үйэтитэр,
Үтүө саҕахтары арыйар,
Үгүс саҥа аргыстаах
Үөрэх-билии дойдута
Сыл аайы хайдах эрэ
Саҥалыы арыллан,
Бар дьоҥҥо эрэли эрэ үөскэтэр.
Быйылгы үөрэх дьылыгар оскуола боруогун атыллааччы кырачаан оҕолорбут түөрт буолан күн курдук сандааран, оскуолабыт кэскилин түстүүрдүү сибэкки дьөрбөтүн тутан киирдилэр. Дьоһуннаахтык туттан, маҥнайгы хоһооннорун долгуйан туран, доргуччу аахтылар. Үчүгэй үөрэнээччи буоларга бэлэмнэрин көрдөрдүлэр. Ону тэҥэ быйыл орто сүһүөҕү, 9 кылааһы, 7 оҕо бүтэрэр. Оттон оскуоланы 8 оҕо бүтэрэн, олох киэҥ аартыгар үктэнэр.
Үгүс бочуоттаах ыалдьыттартан эҕэрдэ, өйөбүл тыллар этилиннилэр. Уус Амма нэһилиэгин баһылыгын солбуйааччы Гаврил Анатольевич Нестерев бастакы кылаас үөрэнээччилэригэр дьаһалта аатыттан бэлэхтэри туттаран, өрө көтөҕүллүүлээх тыл эттэ. РСФСР үөрэҕэриитин туйгуна, Саха Республикатын үөрэхтээһинин үтүөлээх үлэһитэ, учууталлар учууталлара, педагогическай үлэ ветерана, Таатта улууһун уонна Уус Амма нэһилиэгин бочуоттаах олохтооҕо Олег Иннокентьевич Арылахов оҕолору Билии күнүнэн бэтэрээн учууталлар ааттарыттан эҕэрдэлээтэ, үөрэнээччилэргэ алгыс тылын анаата. Салгыы «Төлөн» акционернай тэриллии сүрүн инженерын солбуйааччыта Василий Николаевич Попов тыл ылан, эмиэ кэлэр үөрэнээччилэри эҕэрдэлээн тэрилтэ аатыттан сэмэй бэлэхтэри туттарда.
Биһиги линейкабыт бастакы кылаас үөрэнээччилэригэр оскуола, дьиэ кэргэнигэр киирии суолталааҕын тоһоҕолоон бэлиэтээбит Чымнаайы орто оскуолатын директора Алгыстаан Михайлович Толстяков тылынан салҕанна. Кини эмиэ үөрэнээччилэргэ кэрэхсэбили, үтүө алгыстары, кыра бэлэхтэри туттарда.
Тэрээһин бүтүүтэ долгутуулаах түгэн буолла — бастакы чуораан тыаһа чугдаарда! Чуорааны чугдаардар чиэскэ оскуола бастыҥ үөрэнээччитэ Хоютанова Нария уонна бастакы кылааска киирбит Игнатьев Артур тигистилэр.
Быйыл балаҕан ыйын 1 күнүттэн оскуолабыт физкультура саҥа учууталын Арыйаан Николаевич Попову көрсөр. Кини кэлиитин кытта спордунан дьарыктаныыга саҥа арыйыылары эрэ буолбакка, бары үөрэнээччилэргэ өрө күүрүүнү күүтэбит.
Линейка кэнниттэн бастакы уруокка ыҥырар чуорааммыт лынкынаата, кылаас бары «Дьоһуннааҕы кэпсэтии» кылаас чаастарыгар тарҕастылар. Онно оҕолор учууталлары кытта көрсөн, үөрэх дьылын былааннарын кэпсэттилэр. Хас биирдиилэрэ иннилэригэр сыл устата түмүллүөхтээх ураты түгэннэрдээхтэр, билиилээхтэр-көрүүлээхтэр.
Билии күнүнэн! Эҕэрдэ оҕолорго! Эҕэрдэ учууталларга! Эҕэрдэ төрөппүттэргэ!
Нария Хоютанова,
Г.Д.Бястинов-Бэс Дьарааһын аатынан Чымнаайы орто оскуолатын эдкора
keskil14.ru