И.Г. Тимофеев аатынан Майатааҕы лиссиэй, оҕо үөрэххэ тардыһыытыгар, киэҥ билиини ыларыгар уонна доруобуйата чөл буоларыгар туһуланан элбэх соругу туруорунан саҥа 2025-2026 үөрэх дьылын саҕалаата.
Бүгүн манна алтан чуораан чугдааран, Билии күнүнэн үөрэнээччилэри, учууталлары, лиссиэй бары үлэһиттэрин Мэҥэ Хаҥалас улууһа МТ аҕа баһылыгын маҥнайгы солбуйааччыта Гаврил Николаевич Толстяков, «Майа сэлиэнньэтэ» тыа сирин түөлбэтин баһылыгын бастакы солбуйааччы Дмитрий Александрович Игнатьев, улуустааҕы үөрэх управлениетыттан Александра Радомировна Луковцева, РАН академига, попечительбыт Михаил Петрович Лебедев уонна оскуолабыт дириэктэрэ Татьяна Спартаковна Попова истиҥ эҕэрдэлэрин тиэрдэн, ситиһиилээх үөрэҕи баҕардылар, наҕараадалары туттардылар. Үөрүүлээх сонуннартан Майатааҕы лиссиэй өрөспүүбүлүкэ 20 бастыҥ оскуолаларын ахсааныгар киирбитин иһитиннэрдилэр. Оскуолабытынан, үөрэнээччилэрбитинэн киэн туттабыт. Үгүс билиини биэрэр, олимпиадаларга, научнай-практическай конференцияларга, араас таһымнаах күрэхтэргэ ситиһиилэхтик кытыннарар убаастыыр учууталларбытыгар улахан махталбытын биллэрэбит.
Быйыл 5-с кылааска 24 кырачаан уонна 7-2 кылааска 20 үөрэнээччи оскуолабыт боруогун аан маҥнай атыллаатылар. 7-1 кылаастар Инженерно-техническай институт фирменнай кылааһа буоллулар. Ону таһынан, быйылгы үөрэх дьылыгар 41 үөрэнээччи оскуоланы бүтэрэр.
Сарсыҥҥыттан үгүс тулууру, дьулууру, дьаныардаах буолууну эрэйэр саҥа үөрэх дьыла бэйэтин толору быраабыгар киирэн, бастакы уруоктар саҕаланыахтара. Күндү оҕолорго, убаастабыллаах учууталларбытыгар ситиһиилээх үөрэх сылын баҕарабыт!
Лилиана ШЕСТАКОВА, 11-1 кылаас үөрэнээччитэ
keskil14.ru