Бүгүн, балаҕан ыйын 1 күнүгэр, Билии күнүн көрсө Дьокуускай куорат Саха политехническэй лиссиэйин 326 миэстэлээх саҥа куорпуһун үөрүүлээх арыллыыта буолла.
Аныгылыы тутуулаах үс этээстээх оскуола Арассыыйа Бэрэсидьиэнэ Владимир Путин көҕүлээбит «Эдэр ыччат уонна оҕолор» национальнай бырайыак чэрчитинэн олоххо киирдэ.
Биллэрин курдук, Дьокуускай куорат Саха политехническэй лиссиэйэ үүнэр көлүөнэ ыччаты т техническэй наукаларга оҕолору сыһыаран айымнньылаахтык, таһаарыылаахтык үлэлиир куорат уонна өрөспүүбүлүкэ биир бастыҥ оскуолата буолар.
Манна билиҥҥи кэм ирдэбилигэр эппиэттиир библиотека, остолубуой, спорт уонна аактовай саалалар, үөрэнэр кабинеттар, лабораториялар, оннооҕор планетарий кытары баар.
«Инники идэҕэ хардыы» профориентационнай бырагыраама чэрчитинэн «Энергетика», «Агро хайысха» «ЖКХ уонна тутуу эйгэтэ» «Промышленность» «Креативнай индустрия» «Медицина» «Транспорт» уонна «Цифровой технология» хайысхаларынан үөрэнэр толору хааччыллыылаах кластердар арылыннылар. Аныгы цифровой оборудованиелаах кабинеттар оҕолор үөрэнэллэригэр, инники идэлэрин техническэй өттүгэр баһылыылларыгар, наука эйгэтин кытта билсэллэригэр төһүү күүс буолуохтара.
Саҥа оскуола үөрүүлээх арыллыытыгар СӨ Ил Дархана Айсен Николаев, СӨ Үөрэх уонна Наука миниистирэ Нюругна Соколова , дьокуускай куорат Дууматын бэрэссэдээтэлэ Алберт Семенов, оскуоланы туппут ООО «Арктик Капитал» хампаанньа генеральнай дириэктэрэ Матвей Евсеев, Дьокуускай куорат баһылыгын солбуйааччы Владимир Аржаков уо.да.а бырабыытылстыба чилиэннэрэ кыттыыны ыллылар. Оскуола символическай күлүүһүн ООО «Арктик Капитал» хампаанньа генеральнай дириэктэрэ Матвей Евсеев лиссиэй дириэктэригэр Тимофеева Надежда Константиновнаҕа туттарда.
СӨ Ил Дархана Айсен Николаев:
— Күндү оҕолор, учууталлар, төрөппүттэр! Эһигини Билии күнүгэр лиссиэй иккис үөрэнэр дьиэлэммитинэн эҕэрдэлиибин. Надежда Константиновна өссө 12 сыл аннараа өттүгэр оскуола иккис куорпуһун тутуллуутун туруорсарын өйдүүбүн. Оскуола урут уруккуттан аныгы технологиялыры методикалары туһанан үлэлиир олус үчүгэй коллективтаах. Профориентационнай үлэҕэ ситиһиилэрдээх. Саҥа оскуолаҕа оҕолор 8-9 кылаастан саҕалаан инники идэлэрин талалларыгар анаммыт аныгы элбэх хайысхалаах (многопрофильнай) кластер арылынна. Оскуола Дьокуускай иһинэн эрэ буолбакка өрөспүүбүлүкэ бастыҥ флагмана буолар. Инникиктин өссө да улахан ситиһиилэри баҕарабын!
СӨ Үөрэх уонна Наука миниистирэ Нюргуна Соколова:
— Убаастыбыллаах Надежда Константиновна, үөрэнээччилэр уонна оскуола үлэһиттэрэ! Барыгытын бүгүҥҥү күнүнэн эҕэрдэлиибин. Билии күнэ — дьол-соргу күнэ. Саҥа үөрэх саҕаланыытын күнэ. Саха политехническэй лиссиэйгэ саҥа үөрэх дьиэтэ киирбитинэн итиитик-истинник эҕэрдэлиибин. Быйылгыттан саҥа «Эдэр ыччат уонна оҕолор» национальнай бырайыак саҕаламмыта. Дойдубутугар бу бырайыагынан тутулла турар 150 тутуу иһигэр бу оскуола киирэ сылдьар. Өрөспүүбүлүкэҕэ бу бырайыагынан тутуллубут бастакы оскуола буолар. Оскуола тутутуутугар бэйэлэрин кылааттарын киллэрсибит, бу инициативаны өйөөбүт дьоҥҥо махталбытын тиэрдэбит. Былырыын дойдубут экономикатыгар уонна социальнай сфераҕа оҕолорбутун бэлэмниэхтээхпит диэн сыал туруоруммуппут. Ол концепция бу саҥа оскуолаҕа киирдэ. 8 кластер оҥоһулунна. Үрдүк уонна анал үөрэхтээһин кииннэрэ, колледжтар, улахан преприятиелар оҕолору оскуола саҕаттан идэҕэ бэлэмниири өйөөтүлэр. Оҕолор оскуоланы бүтэрэллэригэр идэлээх тахсыахтарын сөп буолла. Бүгүҥҥү Саха политехническэй лиссиэй аныгы олоҕу кытта тэҥҥэ баран иһэр оскуола эрэ буолбакка, төрүт үгэстэри, дьиэ кэргэн сыаннастарын үрдүктүк тутар.
Саха политехническэй лиссиэй дириэктэрэ Тимофеева Надежда Константиновна оскуола коллективын, үөрэнээччилэрин аатыттан махталын СӨ Ил Дархаҥҥа Айсен Николаевка, СӨ Үөрэх уонна Наука миниистиригэр Нюргуна Афанасьевна Соколоваҕа, Дьокуускай куорат баһылыгар Евгений Григорьевка уонна Үөрэх салалтатын салайааччытыгар Петрова Мария Петровнаҕа махталын эттэ. Дойду экономикатын кадрдарынан хааччыйыыга улахан эппиэтинэһи сүгэллэрин эттэ.
Keskil14.ru