2004 сыл балаҕан ыйын 1 күнүгэр – Билии сырдык күнүгэр – оҕо саас биир саамай сырдык бырааһынньыгар буолбут алдьархайы биһиги умнубаппыт.
Ол күнтэн үгүс сыллар ааспыттарын да иһин Беслан алдьархайын умнубаппыт, Хотугу Осетия-Алания өрөспүүбүлүкэтин Беслан куоратыгар буолбут терракт Арассыыйа дьонун-сэргэтин өйүттэн-санаатыттан ааспат. Беслан… 2004 сыл… Оҕо курдук чараас, ыраас, сырдык эйгэни хаанынан халытан имири эһэргэ, оҕо тыыныгар туора турарга төһөлөөх хара санаа наадатын туһунан киһи өйүгэр батан киирбэт…
Беслаҥҥа “Аанньаллар куораттара” мемориальнай кылабыыһаҕа 266 киһи көмүллэн сытар. Мантан улахан аҥара оҕолор. “Аанньаллар куораттарыгар” Арассыыйа араас муннуктарыттан бу күҥҥэ диэри дьон быыстала суох сылдьар: терракт сиэртибэтэ буолбут оҕолору, төрөппүттэри, учууталлары, быыһыыр тэрилтэ үлэһиттэрин кэриэстии, кинилэр сырдык ааттарыгар сүгүрүйэ.
Манна кэлэн ааһар дьоннор ортолоругар оҕолор эмиэ бааллар. Биир саастыылаахтара көмүллэн сытар сирдэригэр туран кинилэр ыар дьылҕаларын чугастык ылыналлар, киһи киһиэхэ харыстабыллаах сыһыанын, үтүө санаа суолтатын, маннык алдьархай хатыламматын туһугар киэҥ, үтүө дьон буолан тахсыахтаахтарын туһунан дириҥник толкуйдууллар. Бу кинилэргэ тыла суох үөрэх.
Улахан дьоннор өйдөспөт буолууларыгар оҕо сиэртибэ буолара диэн саамай ынырык көстүү. Беслан трагедията биһиги олохпутугар хатыламматар ханнык. Оҕону сыаллаан-соруктаан сэртибэ оҥостор өйдөөх-санаалаах дьон үүнэн-сайдан тахсыбатыннар. Терракт содулугар суорума суолламмыт оҕолорбут барахсаттар таас паамытынньык буолан киһи аймаҕы эйэлээх сыһыаҥҥа, эйэлээх олоххо сирдии турдаллар ханнык.
Беслан трагедиятынан сибээстээн, 2004 сылтан балаҕан ыйын 3 күнэ Арассыыйаҕа терроризмы утары биир санааланыы күнүнэн биллэриллибитэ. Балаҕан ыйын 1-3 күннэригэр Арассыыйа бары оскуолаларыгар терроризмы утары дьаһаллар, үөрэтэр, сэрэтэр үлэлэр ыытыллаллар.
keskil14.ru