Хас биирдии киһи сөбүлүүр киинэлээх. Сахалыы киинэлэртэн биир саамай сүрэхпэр хатанан хаалбыт киинэ «Триумф» буолар. Мин санаабар, бу саха норуотун чулуу уолаттара спорка дьулуурдарын, кыайыыга эрэллэрин, туруоруммут сыалы хайаан да ситиһиэхтээхпитин көрдөрөр уус-уран киинэ. Ол да иһин уол быһыытынан холобур оҥостоору, хат-хат сөбүлүүр киинэбин көрөбүн.
Киинэҕэ Дмитрий Петрович Коркин диэн аатырбыт тренер олоҕун, үлэтин уонна кини иитэн таһаарбыт бөҕөстөрүн тустарынан кэпсэнэр. Киинэ сүрүн санаата киһи бэйэтигэр эрэллээх буолуута, кыайыыга дьулуура уонна тренер оруолун, сабыдыалын туһунан.
Киинэҕэ көстөр уолаттар бары мин эһэм саастыы дьон эбит. Бары биир санаалаах, спорка бэриниилээх буоланнар, элбэх ситиһиилэнэллэр. Холобур, киинэҕэ Роман Дмитриев, Павел Пинигин курдук аан дойдуга аатырбыт бөҕөстөр олохторо, кыайыылара көстөр. Кинилэр бары Дмитрий Коркин талааннаах салалтатынан дьарыктанан, улахан дьон буола үүммүттэр.
Эһэм этэринэн, «Триумф» киинэ көрөөччүлэргэ спорт эрэ буолбакка, дьон бэйэ-бэйэтигэр сыһыаннарын, доҕордоһууну уонна бэйэ-бэйэҕэ көмөлөһүү олохпут биир сүрүн сиэрэ буоларын көрдөрөр. Маны кытта мин толору сөбүлэһэбин.
Бу сайын Саха сирин дьоно бары кэриэтэ «Дыгын» уонна «Манчаары» оонньууларын сэҥээрэн олордубут. «Триумф» киинэ уолаттара уонна «Дыгын», «Манчаары оонньууларын» спортсменнара майгыннаhар өрүттэрэ диэн ыллахха, биллэн турар, бастакынан, кинилэр бары Саха сириттэн үөскээн тахсыбыт, сахалыы тыыннаах, өйдөөх-санаалаах дьон. Иккиһинэн, бу спортсменнар бары күүстээх санаалаах, тулуурдаах, дьулуурдаах буолаллар. Кыайыыга дьулуһуу, бэйэни кыайыы, үрдүк ситиһиилэргэ тардыһыы — кинилэри барыларын холбуур биир уратылара. Үсүһүнэн, уолаттар бары элбэх ыарахаттары көрсөллөр. Эрчиллии уустук кэмнэрэ, эчэйиилэр, конкуренция күүһэ — бу барыта кинилэр санааларын өссө күүһүрдэр, сытыылыыр. Ол гынан баран, кинилэр хаһан даҕаны санааларын түһэрбэккэ, иннилэрин диэки эрэ дьулуһаллар. Төрдүһүнэн, бу спортсменнар бары норуот биһирэбилин ылаллар. Кинилэр Саха сирин спордун историятыгар киирэн, эдэр көлүөнэҕэ холобур буолаллар. Кинилэр ситиһиилэрэ саха дьонун санаатын көтөҕөр, киэн туттууну үөскэтэр. Онон кинилэр бары биир тылынан эттэххэ — саха норуотун чулуу уолаттара.
Сахалыы «Триумф» киинэттэн мин элбэххэ үөрэнним. Киһи бэйэтин кыаҕар итэҕэйэрин, сыал туруорунан баран, дьулуурдаахтык үлэлиирин суолтатын өйдөөтүм. Маннык киинэ кэнниттэн бэйэҕэр эрэллээх буолар, туохха барытыгар кыайыахха сөп эбит диэн санаа үөскүүр. Кыайыыга дьулуһуу суолугар соҕотох буолбакка, чугас дьонуҥ эйигин өйүүллэрэ төһө суолталааҕын көрдөрөр. Киинэ кэнниттэн доҕотторгун өссө күндүтүк саныыр, кинилэргэ болҕомто уурар баҕа үөскүүр. Маны таһынан, киинэни көрөөт, төрөөбүт тылбынан киэн туттар санаам өссө күүһүрбүтэ, сахалыы контены элбэтэр туһунан толкуй киирбитэ.
Түмүктээн эттэххэ, «Триумф» киинэ саха норуотун историятыгар улахан суолталаах. Күндү оҕолор, бу киинэни көрө иликтэр, хайаан да көрүҥ. Көрөн баран, хас биирдиигит бэйэҕит кыаххытыгар эрэллээх буоларгыт, инники диэки дьулуһаргыт күүһүрүө дии саныыбын.
Дуолан Павлов, IX кылаас үөрэнээччитэ,
Кэбээйи орто оскуолата, Кэбээйи улууһа.
keskil14.ru