Эдэр чинчийээччилэр билим эйгэтигэр дьаныһан туран үлэлииллэрин киһи хайгыы эрэ көрөр. Ол курдук бүгүн дьулуурдаах, ыарахантан чаҕыйбат Сунтаар улууһуттан төрүттээх, Өрөспүүбүлүкэтээҕи лиссиэй-интэринээт үөрэнээччитин Альберт Константиновы кытта билсиэҕиҥ.
– Саха сиринээҕи чинчийэр оскуола сменатыгар хаһыс төгүлүн сылдьаҕын?
– Номнуо үһүс төгүлбүн Евгений Федорович Боякиновка дьарыктанабын. 2023 сыллаахха «Исследование солнечных панелей», 2024 сыллаахха «Исследование процесса генерации газа брауна» уонна быйыл «Разработка и оптимизация газогенератора: создание и моделирование» диэн бырайыакка үлэлии сылдьабын.
– Билиминэн хаһааҥҥыттан дьарыктанаҕын?
Дакылааттары уһуйаантан суруйан барбытым, онтон алын кылааска үөрэнэ киирэн баран, салайааччым суох буолан суруйарбын тохтоппутум. Кэлин Сунтаардааҕы политехническай лиссиэйгэ үөрэнэн, дьэ, билим эйгэтигэр төннүбүтүм. Салайааччым история учуутала Айсиэн Анатольевич Афанасьев этэ. Элбэх улуустааҕы, өрөспүүбүлүкэтээҕи, бүтүн арассыыйатааҕы уонна аан дойду таһымнаах конференцияларга, ону таһынан оскуола оҕолоругар ыытыллар олимпиадаларга көхтөөхтүк кыттабын.
– Тоҕо чуолаан бу хайысханы таллыҥ?
Оскуолаҕа математика, геометрия уонна физика предметтэрин ордоробун. Ол иһин газогенератор хайысхатын талбытым. Салайааччым Евгений Федорович Боякинов үөрэтэр ньыматын сөбүлүүбүн уонна кинини кытта үлэ түргэнник барар диэн бэлиэтиибин.
– Оҕо сылдьан ханнык идэни баһылыаххын баҕарар этигиний уонна билигин ким буолар санаалааххыный?
Оҕо сылдьан араас мультигы көрөн, сокуон үлэһитэ буолуохпун баҕарар этим. Билигин чопчу быһаарына иликпин, өссө да толкуйдуу сылдьабын
– Билимтэн ураты өссө тугу интэриэһиргиигин, тугунан дьарыктанаҕын?
Билимтэн ураты остуол тенниһин, дуобаты, саахыматы, ону таһынан араас остуол оонньуутун, киһи өйүн сайыннарар сорудахтары суоттуурбун ордоробун.
– Билим эйгэтигэр саҥа киирэн эрэр оҕолорго тугу сүбэлиэҥ этэй?
Бастатан туран, дьулуурдаах уонна сүрэхтээх буолуохха наада. Ыстатыйалары, дакылааттары суруйуу – уустук үлэ, ыллыҥ да суруйан барбаккын. Иккиһинэн, билим эйгэтэ киэҥ билиини-көрүүнү ирдиир. Ол иһин элбэх кинигэ ааҕыахтаахпыт
Сандаара Егорова, С.П. Данилов аатынан Бэрдьигэстээх орто оскуолата,
«Кэскил» оҕо-пресс киинин эдкора.
keskil14.ru