От ыйын 4-8 күннэригэр Дьокуускай куоракка киинэ норуоттар икки ардыларынааҕы VIII бэстибээлэ ыытыллан ааста.
«Мин сөбүлүүр сахалыы киинэм» тиэмэҕэ өйтөн суруйуу, бэлиэтээһин куонкуруһа түмүктэннэ. Оҕолор Орто Халыматтан, Амматтан, Кэбээйиттэн, Дьокуускайтан сөбүлүүр киинэлэрин туһунан биһиэхэ суруйан ыыттылар. Үөрүөхпүт иһин, бары киирбит үлэлэр дириҥ ис хоһоонноохтор, тус санаалаахтар, тыллара-өстөрө хомоҕой. Ол курдук, режиссер Михаил Лукачевскай «Триумф» киинэтин бэйэлэрин үлэлэригэр Айсена Брызгалова, Кэбээйиттэн Дуолан Павлов хото ахтыбыттар, бэйэлэригэр сыһыары тутан хорутуулаахтык суруйбуттар. Оттон Орто Халыматтан Сааскылаана Бубякина режиссер Дмитрий Кольцов «Рядовой Чээрин» киинэтин сөбүлүү көрбүтүн эмиэ истиҥник, иһирэхтик суруйбут. Амма улууһун Соморсунуттан Айсана Охлопкова режиссер Сандал Баишев «Спид Стар» киинэтигэр тохтообут, болҕомтотун туһаайбыт. Чахчы даҕаны, киһи сахалыы, үтүө тыыннаах киинэлэри көрдүм диир дьоһун киинэлэрэ уонна үлэлэрэ.
Кыттыбыт бары оҕолорго дириҥник махтанабыт уонна «Сахафильм» аатыттан бэлэхтэри ити үөһээ ааттаммыт оҕолорго уонна бу күннэргэ иккилии таһаарыыларбытыгар сурутууну оҥотторбут Дьокуускай куорат 1 №-дээх оскуолатын Х кылааһын үөрэнээччитэ Айсена Брызгаловаҕа, П.И.Яковлев аатынан Амма Наахара орто оскуолатын учуутала Надежда Григорьеваҕа аныыбыт. Бириистэри 89627301222 нүөмэргэ суруйан, билсэн баран ылыҥ.
Күндү оҕолор, ааҕааччыларбыт, сахалыы хомоҕой тылы-өһү, сахалыы киинэни уонна оҕо бэчээтин мэлдьи сэҥээрэр дьон буолуҥ!
keskil14.ru