Бүгүн, от ыйын 10 күнүгэр, Талба Таатта улууһугар XXII-с төгүлүн ыытыллар «Манчаары оонньуулара» көхтөөхтүк, айылҕаны кытта кыттыспыттыы, күүстээх ардаҕы аннынан быыппастар быччыҥнаах күрэсчиттэрбит мас тардыһыытыгар иккис күннэрин кыайыы өрөгөйүн ылар туһуттан күүстээх утарсыыны көрдөрдүлэр. Хас да улуус, утарсааччы баарыттан Таатта 1 уонна 2 хомуур хамаандатын мадьынылара дойдуларыгар саамай элбэх мэтээли аҕалан бар дьонун, биир дойдулаахтарын үөртүлэр, астыннардылар.
Ол курдук, бэтэрээн эр дьон 2 мэтээли, кэрэ аҥаардар 3 мэтээли хамаандаларыгар аҕаллылар. Оттон Таатта талах курдаах эдэр ыччаттара, оскуола оҕолоро, 6 мэтээли бэйэлэригэр суруннулар: Алексей Игнатьев уонна Ньургун Неустроев муҥутуур кыайыылаах, Мичил Мандаров уонна Максим Иовлев үрүҥ көмүс мэтээл хаһаайыннарын, Ариан Неустроев уонна Айтал Винокуров призердар ааттарын сүктүлэр. Саамай тыҥааһыннаах, күүтүүлээх киирсиилэри 60 киилэттэн 125 ыйааһыҥҥа диэри эр дьон көрдөрдүлэр. Ол түмүгүнэн, Таатта мадьынылара эмиэ бастыҥ кыайыылары ыллылар: Владимир Баишев муҥутур кыайыылаах (60 кг), Иннокентий Попов муҥутуур кыайыылаах (65 кг), Константин Жирков муҥутуур кыайыылаах уонна Василий Чемпин боруонса мэтээл хаһаайына (70 кг), Виктор Докалов боруонса мэтээл хаһаайына (105 кг) уонна Никита Татаринов үрүҥ көмүс мэтээл хаһаайынынан (135 кг) ааттаннылар. Уопсайа Таатта мадьынылара бэйэлэригэр 17 мэтээли бэйэлэрин туһа аҕаллылар.
Бу кыайыылар махталлара, биһирэбиллэрэ барыта сыралыспыт идэлэрин баһылаабыт тренердэр иитиилэринэн уонна күрэсчиттэр бэйэлэрин күүстээх майгыларынан, дьарыктарынан, дисциплиналарынан, модун санааларынан кэлбитэ кистэлэҥ буолбатах.
Бүгүҥҥү бастыыр иһин финалга мас тардыһыы күрэҕэ тэҥнээх, кэрэхсэбиллээх уонна тыҥааһыннаах буолбутун бэлиэтиибит. Урут уруккуттан Таатта мадьынылара аатырыахтарын аатыраллар, биллэллэр-көстөллөр. Ол чахчы бүгүн эмиэ бигэргэннэ.
Күрэс төрүт көрүҥнэригэр XXII-с «Манчаары оонньууларын» биир саамай күүтүүлээх уонна тыҥааһынаах көрүҥэ, мас тардыһыы, маннык көрдөрүүлээх түмүктэннэ. Инникитин бары мадьыныларга ситиһиилэри, дабайыылары баҕарабыт!
Алексей Саввин, 9 кылаас, Тааттатааҕы лиссиэй-интэринээт, «Кэскил» оҕо медиа киинин эдэр кэрэспэдьиэнэ,
Мария Сибирякова, Чурапчы гимназиятын 11 кылааһын үөрэнээччитэ, хаартыскаҕа түһэриитэ