2024 үөрэх дьылыгар «Кэскил» оҕо бэчээтин кыһата, СӨ Оҕо саас сылын дирекцията уонна «Саха» национальнай көрдөрөр-иһитиннэрэр хампаанньа Саха Өрөспүүбүлүкэтигэр Оҕо саас сылын көрсө тэрийбит «Гаджеппын көрүөххэ» эдэр кэрэспэдьиэннэр күрэҕин ыыппыттара. Мин 5-с кылаастан оскуолабар үлэлиир «Эрчим» медиа-кииҥҥэ дьарыктанабын. Суруйарбыт таһынан араас хабаанаах видео-контеннары устабыт. Уһулларбын сөбүлүүбүн, элбэх саҥаны билэбин. Саамай сүрүнэ – сөпкө туттан-хаптан, тугу кэпсииргин көрөөччүгэ тиэрдиэххин наада. Күрэххэ кыттаммын кыайыылаах буолбутум. «Якутия» авиа хампаанньаттан дойдубут тэбэр сүрэҕэр-Москва куоракка барар путевканан наҕараадаламмытым.
Үөрүүлээх сонуну истэн баран олус долгуйбутум, үөрбүтүм. Бу сайын ийэбин, бырааппын кытта бэс ыйыгар дойдубут киин куоратыгар күүлэйдээн кэллибит.
Москваҕа элбэх музейдарга, экскурсияларга сылдьан, Арассыыйа киэҥ историятын туһунан элбэҕи биллим. ВДНХ-ҕа океанариумҥа сырыттым, пааматынньыктары көрдүбүт.
Традиционнай пааркаларга сырыттыбыт. Ол сылдьан элбэҕи биллим-көрдүм. «Москва-Сити» диэн саамай сайдыылаах оройуону көрдүбүт. Европаҕа, Москваҕа саамай үрдүк «Панорама 360» үрдэлгэ тахса сырыттым. Босхо мороженай ылан сиэтибит. Теплоходунан, поеһынан, автобуhунан хатааһылаатым. Холууптары, хаастары, кэрэ кыталыктары көрбүтүм. Зоопаркаҕа слону, эриэн үөнү, улахан көтөрдөрү, касатканы көрдүм уонна ууга олорор кыыллар тустарынан, тугунан аһылыктаналларын биллим.Өссө моржтары сөҕө-махтайа көрдүм. Соһуйбутум диэн олус улаханнык кэпсэтэллэр этэ, саҥалара олох киирэр аантан иһиллэр. Океанариуму устубуппут. Тоҕо диэн, итинник кыыллар мээнэ баар буолбатахтар. Ол иһин өйдүү-саныы сылдьар курдук видеоҕа уһуллубут.
Теплоходунан устан истэхпитинэ «Красный Октябрь» диэн урукку фабрика туһунан кэпсээбиттэрэ. Онно олус минньигэс сакалааты оҥороллор эбит. Пааркаҕа төлөбүрдээх оонньуу киирбиппит, араас сирдэринэн сылдьан дьиэбитигэр барыахпыт иннинэ таарыччы атыы-эргиэн киинигэр «Авеню»-га аһаабыппыт уонна онно тииргэ 18-та ытан хааһы таппытым. Быыстапкаларга сылдьан араас омуктар култуураларын биллим.
Москваҕа баран кэлбитим олохпор биир саамай умнуллубат түгэн буолла.Бу айаҥҥа сылдьан олус элбэҕи билбитим иһин «Кэскил» оҕо бэчээтин кыһатыгар, «Саха» национальнай көрдөрөр-иһитиннэрэр хампаанньа, уонна «Якутия» авиа хампаанньатыгар махталбын тириэрдэбин, үлэҕитигэр элбэх ситиһиини баҕарабын.
Ньургун Романов, VI кылаас,
Дүллүкү, Үөһээ Бүлүү, «Эрчим» медиа-киин