«Манчаары оонньуулара» бу күрэстэһии эрэ буолбатах. Оонньуулар ыытыллар сирдэригэр үгүс тутуулар ыытыллаллар, суол-иис оҥоһуллар. Тыа сирин сайдыытыгар, тыа сирин дьоно өй-санаа өттүнэн бөҕөргүүрүгэр сүрүн тирэҕинэн буолар.
XXII «Манчаары оонньууларын» тэрийэр хамыыһыйа бэрэссэдээтэлэ, Саха Өрөспүүбүлүкэтин Бырабыыталыстыбатын бэрэссэдээтэлин солбуйааччыта Сергей Васильевич Местников оонньуулары үөрүүлээхтик арыйыыга туох үлэ ыытыллыбытын иһитиннэрдэ.
Ол курдук XXII «Манчаары оонньууларын» Таатта улууһугар ыытар туһунан докумуоҥҥа Өрөспүүбүлүкэбит Ил Дархана Айсен Сергеевич Николаев 2020 сыл от ыйын 3 күнүгэр илии баттаабыт.
«Манчаары оонньууларын» тэрийэн ыытыы уонна бэлэмнэнии үлэлэрин чэрчитинэн, Ытык Күөлгэ 450 оҕо үөрэнэр, 100 миэстэлээх интернаттаах оскуола, спорт дыбарыаһа, 1000 миэстэлээх стадион, 1000 киһи олорор миэстэлээх ипподром үлэҕэ киирбиттэр.
«Манчаары оонньууларынан» сибээстээн олоҕу хааччыйар тэрилтэлэр тупсарыллыбыттар. Ытык Күөл тас көстүүтүн тупсарыытыгар элбэх үлэ ыытыллыбыт: Таатта үрэҕи туоруур муоста оҥоһуллубут, 18 км уһуннаах суол асфальтынан бүрүллүбүт. «Манчаары оонньууларын» кыттааччыларын, судьуйаларын, тэрийээччилэрин олохтуурга анаан 24 объегы тупсаран бэлэмнээбиттэр.
Сергей Васильевич Местников иһитиннэрбитинэн, XXII «Манчаары оонньуулара» Саха сирин бары улуустарыттан, куораттарыттан 35 хамаанданы, 1521 кытааччыны түмтэ. 205 үтүө көмөһүт (волонтер), 259 судьуйа үлэлиир.
«Манчаары оонньууларыгар» анаан Саха өрөспүүбүлүкэтин Бырабыыталыстыбатыгар саха тылын тиэрминнэрин өрөспүүбүлүкэтээҕи хамыыһыйатын мунньаҕынан күрэс нууччалыы-сахалыы тылбааһа бигэргэммит. Иһитиннэрэр-биллэрэр эйгэ (ИБЭ) үлэһиттэрэ «Манчаары оонньууларын» сырдатыыга бу тылдьыты көдьүүстээхтик туһаналлар.
Снежанна ГОТОВЦЕВА, VIII кылаас, Танда орто оскуолата, Уус Алдан,
«Кэскил» оҕо пресс-киинин эдкора
Янис Сысолятин хаартыската