Күрэс төрүт көрүҥнэригэр XXII «Манчаары оонньууларын» хамыыһыйатын бэрэссэдээтэлэ, Саха Өрөспүүбүлүкэтин Бырабыыталыстыбатын бэрэссэдээтэлин солбуйааччыта Сергей Васильевич Местников суруналыыстары кытта көрсүһүүгэ бу олус дириҥ историялаах күрэхтэһии буоларын өссө биирдэ бэлиэтээн эппитэ.
Бу көрсүһүүгэ мин Сергей Васильевичтан тэрийэр үлэни салайар бэрэссэдээтэл буоларын таһынан, кини тус бэйэтэ «Манчаары оонньууларын» кытта туох ситимнээҕин туһунан интэриэһиргээн ыйыттым.
– «Манчаары оонньуулара» күрэс төрүт көрүҥнэргэ ыытыллар буолан, хас биирдии саха киһитигэр чугас. Тус бэйэбэр сыһыаран этэр эбит буоллахпына, төрүт көрүҥнэринэн дьарыктанарбын олус сөбүлүүбүн. Төрүт оҕунан ытыыга, хабылыкка, хаамыскаҕа холонон көрүөхпүн сөп. Онно ситиһиилэннэхпинэ, баҕар, «Манчаары оонньууларыгар» кыттыам, – диэн санаатын үллэһиннэ.
Сергей Васильевич бэлиэтээн эппитин курдук, 22 сыл устата «Манчаары оонньууларыгар» төһөлөөх элбэх киһи бэйэтин кыаҕын-күүһүн төрүт оонньууларга холонон көрбүтэ буолуой?!
– Биһиги хапсаҕайбыт, мас тардыһыыбыт аан дойду таһымыгар таҕыстылар. Күрэс бу көрүҥнэригэр аан дойду чемпионаттара ыытыллар буоллулар. Онон «Манчаары оонньуулара» төрүт көрүҥнэрбит сайдарыгар улахан кылаатын киллэрэр, – диэн бэлиэтээн эттэ.
Биһиги, «Кэскил» медиа оскуола 12 эдэр кэрэспэдьиэнэ «Манчаары оонньууларын» сырдатыыга үлэлии сылдьабыт. Бу оонньуулары саха дьоно хайдах курдук чугастык ылынан таптыылларын, кэтэһэллэрин, күүтэллэрин илэ харахпытынан көрөн итэҕэйдибит. Биһиги «Манчаарыылаах» буоламмыт дьоллоох дьон эбиппит.
Янис СЫСОЛЯТИН, VIII кылаас, Лөгөйдөөҕү лиссиэй-интэринээт, Уус Алдан,
«Кэскил» оҕо пресс-киинин эдкора