Сардана Тарасова бүгүн Таатта улууһугар бастакы кыһыл көмүс мэтээли аҕалла! Кини 58 киилэҕэ 24 киилэ ыйааһыннаах гиирэни 63-тэ анньан дьахталларга чөмпүйүөн үрдүк аатын ылла.
XXII «Манчаары оонньууларын» саҥа чөмпүйүөнэ үөрүүтүн «Кэскил» оҕо пресс-киинин юнкордарын кытта үллэһиннэ:
Биллэн туран, кыайыы ыараханнык кэллэ. Аны төрөөбүт дойдубар ыытыллар буолан, эппиэтинэһэ икки бүк улахан. Бэйэм даҕаны итэҕэйбэккэ турабын. Билигин барыта ааспытын кэнниттэн санным кытта чэпчээбит курдук буолла. Бэйэм бэйэбинэн киэн туттуннум.
Кини гиирэ аньыытынан тохсус сылын дьарыктанар. Оскуолаҕа үөрэнэ сылдьан бэйэтин ыйааһыныгар өрөспүүбүлүкэҕэ үс төгүл чөмпүйүөннээбит. «Манчаары оонньууларын» иннинэ өрөспүүбүлүкэҕэ иккис миэстэ буолан турардаах. 2019 сыллаахха Бурятияҕа ыытыллыбыт Бүтүн Арассыыйатааҕы турнирга бастакы миэстэ буолбут.
– Саамай улахан ситиһиим ити этэ. Онтон билигин дойдубар ыытылла турар «Манчаары оонньууларын» чемпиона буоллум. Бу мин саамай улахан ситиһиим, саамай бастыҥ рекордум. Тириэньэрдэрбэр Василий Николаевич Дьячковскайга, Иннокентий Ильич Бояровка дириҥ махталбын тиэрдэбин, – диэн Сардана Тарасова саанаатын үллэһиннэ.
Янис СЫСОЛЯТИН, VIII кылаас,
Лөгөй лиссиэй-интэринээтэ, Уус Алдан,
«Кэскил» оҕо пресс-киинин эдкора