Күрэс төрүт көрүҥнэригэр XXII «Манчаары оонньууларын» уота бүгүн, бэс ыйын 2 күнүгэр, Чурапчы сиригэр-уотугар кэллэ. Күрэс уота саха национальнай дьоруойа Манчаары Баһылай киинэ түспүт сиригэр уматыллыбыта уонна Мэҥэ Хаҥалас улууһун, Туймаада хочотугар Дьокуускай куорат устун айаннаан бүгүн Чурапчы аартыгар киирдэ.
Күөх төлөнү улууспут баһылыга Степан Анатольевич Саргыдаев көрсөн, улуус сиригэр-уотугар киллэрдэ. Арыаллыыр бөлөх салайааччыта Саха Өрөспүүбүлүкэтин физическэй култуураҕа уонна спортка үтүөлээх үлэһитэ Дмитрий Николаевич Горохов.
«Манчаары оонньууларын» уота бу күн Чурапчы улууһун олохтоохторун биир сомоҕо гына түмтэ. Улуус сүүмэрдэммит хамаандата анал формаларын кэтэн арыаллыы көрүстэ.
Чурапчы дьоно-сэргэтэ сүргэлэрэ көтөҕүллэн туран эҕэрдэ тыл этэн, өрөгөй ырыатын ыллаан, күрэс төрүт көрүҥнэригэр XXII «Манчаары оонньууларын» уотун салҕыы Таатта улууһугар атаардылар.
Маша СИБИРЯКОВА, Х кылаас, С.К. Макаров аатынан Чурапчы гимназията,
күрэс төрүт көрүҥнэригэр XXII «Манчаары оонньууларын» оҕо пресс-киинин юнкора