Биһиги, Таатта улууһун Уолба нэһилиэгин оҕолоро, “Ай Талаан” лааҕырга сылдьан сайыҥҥы бастакы күннэрбитин туһалаахтык атаардыбыт. Лааҕырбыт В.И. Ленин аатын сүгэр орто оскуолабыт иһинэн үлэлээтэ. Ол туһунан эһиэхэ кэпсиэхпитин баҕарабыт.
Магнит оҥорорго үөрэннибит
Биһиги лааҕырга биир сарсыарда ким тугу баҕарарынан уруһуйдаабыппыт уонна ол уруһуйбутуттан магнит оҥорон таһаарбыппыт. Баһаатайбыт Айыына Альбертовна магнит, значок оҥорор станок аҕалбыт этэ уонна хайдах оҥорорго үөрэппитэ. Наһаа үчүгэй сонун оҥоһук этэ, бэйэм илиибинэн оҥорбут магниппын холодильникка ыйаатым, дьоҥҥо көрдөрөбүн, кэпсиибин. “Ай Талаан” оскуолам лааҕырыгар элбэххэ үөрэнним. Олус сөбүлээтим. Ордук аһа олус минньигэс.
Кэрэчээнэ БАСОВА, IV кылаас
***
Биир да күнү көтүппэккэ
“Ай Талаан” диэн олус үчүгэй, сонун тэрээһиннээх лааҕырга сылдьан элбэх саҥаны биллим, астынным аҕай. Манна сылдьарбыт тухары минньигэстик аһаатыбыт, дуоһуйа оонньоотубут. Поп-корн сии-сии киинэ көрөрбүтүн, араас түгэннэри кэпсэтэрбитин сөбүлээтим. Оҕолор лааҕырга “Мафиялаах” оонньууру ордордубут. Урут бу лааҕырга эдьиийбин кытта сылдьыбытым, онон оҕолору кытта эрдэттэн билсэбин. Биир да күнү көтүппэккэ сылдьыбыт буоламмын, “Мисс лагеря” диэн анал аатынан наҕараадаланным.
Самаана ХАРАЙДАНОВА, V кылаас
***
Көһөрүллүү музейыгар сырыттыбыт
Мин лааҕырга сылдьыбыппын олус сөбүлээтим. Ордук оонньуулар интэриэһинэй этилэр. Бэйэбит уруһуйдарбытынан магнит оҥорбуппут, магнитым наһаа үчүгэй гына сатаммыта. Элбэх саҥаны биллим.
Лааҕыр кэмигэр кыһын ыытыллыбыт “Уолба Макар Хараны ааҕар” бырайыак кыайыылаахтарын Чурапчы Хатылытыгар Көһөрүллүү музейыгар экскурсиялата илдьибиттэрэ. Музей сэрии кэмигэр Чурапчы оройуона көрсүбүт алдьархайын туһунан сиһилии көрдөрөр. Киһини долгутар. Музей үлэһитэ Марфа Владимировна наһаа үчүгэйдик кэпсиир. Мин дьону аһыммытым аҕай. Бу музейга сылдьан, элбэх саҥаны биллим. Бу туһунан бука, умнубакка өйдүү-саныы сылдьарым буолуо. Биэс саастаах Уйбаан этэрбэһин туһунан, биир оҕо эбэтэ эмээхсин сүппүтүн кэннэ лэппиэскэлээх хоппотун манаабытын туһунан кэпсээбитин уйадыйа иһиттим.
Ити курдук лааҕыр миэхэ умнуллубат түгэннэри бэлэхтээтэ.
Туйаара КУСАТОВА, VI кылаас
***
Cайыным интэриэһинэйдик саҕаланна
Мин быйылгы сайыным олус интэриэһинэйдик саҕаланна. Бэс ыйын 5-25 күннэригэр «Ай Талаан» диэн Уолба оскуолатын лааҕырыгар сынньанным. Араас элбэх тэрээһин күннээҕи олохпутун интэриэһинэй оҥордо. Иитээччилэрбит бииртэн биир сонун дьоҕурбутун арыйдылар. Математика учуутала Айыына Альбертовна оҕолор уруһуйдарынан 3D магнит оҥорорго үөрэттэ. Оҕолор бэйэлэрин илиилэринэн оҥорон таһаарбыт буолан магниттарын үөрэ-көтө дьиэлэригэр илдьэ бардылар. Нуучча тылын учуутала Алина Альбертовна биһиги Тааттабытыгар буолаары турар “Манчаары оонньууларын” кыайыылаахтарын туһунан кэпсиир кыракый магниттаах кинигэни оҥорорго үөрэттэ. Ырыа учуутала Күннэй Васильевна оҕо ырыаларын үөрэттэ, флешмобка үҥкүүлэттэ. Ордук Россия күнүн тэрээһиннэрэ сэргэх буоллулар. Оҕо тэрилтэтин салайааччыта Александр Гаврильевич видео устан монтажтыырга, компьютерга дронунан күрэхтэһэргэ, квадрокоптеры көтүтэргэ үөрэттэ, робототехникаҕа дьарыктаата. Ол быыһыгар араас оонньуулары оонньообуппут.
Уолба оҕолоро айан оҥорбут “Талах дуобаттарыгар” чемпионат ыытыллынна. Онно быраатым Сахайаан кимиэхэ да иннин биэрбэккэ чемпионнаабыта, мин иккис миэстэ буолбутум. Медикпит Изабелла Ивановна эмтээх үүнээйилэр тустарынан кэпсээбитэ уонна бастакы суһал көмөнү оҥорорго үөрэппитэ. Поварбыт Иванна Ивановна күн аайы сонун аһы астаан олус минньигэстик аһаатыбыт.
Лааҕырбыт смената оруобуна нэһилиэкпит ыһыаҕын күн түбэспитэ. Онон хас да күн бэлэмнэниигэ сылдьан, дьүһүйүү атрибутун оҥорсон көмөлөспүппүт уонна ыһыах арыйыытын сиэригэр-туомугар кыттыбыппыт.
Быйылгы сменабытыгар төрөөбүт тылга улахан болҕомтону уурдубут. Олохтоох бибилэтиэкэ үлэһитэ Екатерина Юльевна тылбытын байытар тэрээһиннэри ыытта. Тылдьытынан таайбараҥнары таайдыбыт, өс хоһооннорун хатылаатыбыт, энциклопедияларынан үлэлээтибит. “Муҥха” диэн сахалыы мультигы көрдүбүт. Саха тылын учуутала Анна Петровна тыл оонньууларын ыытта. Анаграмма таайа оонньуурбутугар “Бырааһынньык” диэн тылтан олус элбэх араас тыл тахсарын биллибит.
Бу курдук киинэ көрөн. станцияларынан оонньоон, квестарга, викторинаҕа кыттан, эмтээх от хомуйан, сменабыт түмүгэр айылҕаҕа тахсан шашлыктаан олус интэриэһинэй кэми атаардыбыт. Лааҕырбыт бары үлэһиттэригэр махтанабыт.
Маайа БОППОСОВА, VII кылаас
Лааҕыр бастакы сезона
Оскуолабыт “Ай Талаан” лааҕырыгар мин сайын аайы сылдьабын. Быйыл барыта үс араас тиэмэнэн сезоннарга арааран оҕолору сынньаталлар. Мин бастакы сезоҥҥа сырыттым. Айыына Альбертовна уонна Кюннэй Васильевна наһаа үчүгэйдик баһаатайдаабыттара, сезон устата күн аайы оонньуубут. Сарсыарда 10 чааска кэлэн эппитин-сииммитин уһугуннаран, сэрээккэлиибит уонна остолобуойга сарсыардааҥҥы аһылыкка барабыт. Күҥҥэ үстэ аһыыбыт, поварбыт Иванна Ивановна олус минньигэс астаах. Мин лааҕыртан саамай өйдөөн хаалбытым диэн биһиги магнит оҥорорго үөрэммит күммүт буолар. Лааҕыр наһаа үчүгэйдик ааста, барытын сөбүлээтим.
Алена ТАППЫРОВА, VIII кылаас