Ф.Г. Охлопков аатынан Майа орто оскуолатын физическэй култуураҕа учуутала Руслан Васильевич Яковлев хотугу многоборье көрүҥэр Саха сирин спордун маастара. Мэҥэ-Хаҥалас улууһун хамаандатыгар XXII «Манчаары оонньуулара» Спартакиадаҕа хотугу многоборье көрүҥэр путевка ылан, билиҥҥитэ бэлэмнэнии үгэнигэр сылдьар. Учууталбыттан аҕыйах ыйытыыга хоруйдууругар көрдөстүм.
— Руслан Васильевич, хотугу многоборье диэн туох көрүҥүй уонна эт-хаан сайдыытыгар тугу биэрэрий?
— Хотугу многоборье диэн сүрдээх кыраһыабай көрүҥ. Хотугу норуоттар күн бүгүҥҥэ диэри бу национальнай успуорт көрүҥүн илдьэ сылдьаллар. Бу көрүҥ 5 түһүмэхтэн турар, ол курдук, куобахтаан үстэ төхтүрүйэн ойуу, ураҕастаах, моһоллоох сиринэн сүүрүү, сүгэни ыраах быраҕыы, маамыктаны быраҕыы, наартаны ойуу. Бу көрүҥүнэн дьарыктанар киһи сымса, мындыр уонна тулуурдаах буолар уонна т-хаан өттүнэн эргиччи сайдар.
— Хотугу многоборьенан дьарыктаныан баҕарар оҕолорго туох сүбэ биэриэххитин сөбүй?
— Дьарыккытын быспакка дьарыктаныҥ. Хотугу многоборье биир уратыта — бу көрүҥҥэ Россия спордун маастарын нуорматын толоруоххун сөп. Уонна биһиги көрүҥмүт «Манчаары оонньууларыгар» эрэ баар.
Кэпсэттэ Снежана ЯКОВЛЕВА,
«Манчаары оонньууларын» оҕо-пресс киинин юнкора, Майа, Мэҥэ-Хаҥалас улууһа.
keskil14.ru