Таатта Уолбатыгар «Быраһаай оскуолам, сүрэхпэр өрүү баар буолуоҥ» диэн ааттаах отчуоттуур кэнсиэри быйылгы выпускниктар тэрийэн ыыттыбыт. Үгэс курдук хас сылын аайы оскуоланы бүтэрээччилэр түмүктүүр тэрээһин ыыталлар.
Холобура, былырыыҥҥылар «Выпускниктар кубоктара» диэн сахалыы остуол оонньууларын тэрийбиттэрэ. Мин онно хабылык-хаамыскаҕа иккис миэстэ буолбутум.
Онтон быйыл биһиги төрөппүтэрбитин кытта кыттыһан кэнсиэр тэрийдибит. Маннык отчуоттуур кэнсиэр көрдөрбөтөхтөрө хас да сыл буолбут эбит. Биһиги муус устар ыйтан саҕалаан бэлэмнэммиппит. Бэлэмнэниилэр эксээмэннэр быыстарыгар киэһэ аайы буолаллар этэ. Бары сүбэлэһэн бараммыт 15 нүөмэр толкуйдаабыппыт. Кылааспыт оҕото бары үҥкүүгэ-ырыаҕа кыттыбыта. Кылааспыт салайааччыта Туйаара Евгеньевна Машалыын ыытааччы буолбуттара.
Кэнсиэрбитин Оҕо көмүскэлин күнүгэр киэһэ сэттэ чааска сонун «Стикмен» үҥкүүтүнэн саҕалаабыппыт. Норуот айымньытын дьиэтин түннүктэрин маатынан саппыппыт уонна уоту арааран неоновый палочкалары таҥаспытыгар иилэн хараҥаҕа үҥкүүлээбиппит. Онтон оскуолабыт «Ил Ситим» оҕо хамсааһынын тэрилтэтин актыбыыстара эҕэрдэлээбиттэрэ. Ол кэннэ үҥкүүһүт кыыспыт Сайаана «Хва» диэн корейскай аныгы үҥкүүнү көрдөрбүтэ. Кини бэйэтэ төлөпүөнтэн көрөн үөрэтэн туруорар, наһаа талааннаах кыыс. Ырыаһыт уолбут Айыысиэн аҕатынаан «Махтал учууталбар» диэн ырыаны бэлэхтээбиттэрэ. Кыргыттар ийэлэрбитинээн биэс паара буолан сахалыы «Чараҥ» вальсын үҥкүүлээбиппит. Мин санаабар, бу нүөмэр олус истиҥ, нарын буолбута.
Мин чугас дьүөгэбинээн Василисалыын долгуйа-долгуйа дуэттаабытым. Урут ыллаабат этим. Ону таһынан кини бэйэтэ сололаабыта. Ырыабыт барыта гитара доҕоһуолунан ааспыта. Василиса гитараҕа оонньуур буолан кылааспытыгар абыраата аҕай.
Онус кылаастан Ариан уонна Сайыына, биһиги кылааспытыттан Айыллаан уонна Сайаана Кыайыы 80 сылыгар үҥкүүлээбит «Синий платочектарын» көрдөрбүттэрэ. Биһиги кырачаан балтыларбыт Диана, Кэрэчээнэ, Нарыйа аныгылыы трендтары үҥкүүлээбиттэрэ. Быыһыгар төрөппүттэрбит туруорбут бириистэринэн киирии билеттарынан лотерея ыыппыппыт. Дьоллоох аҕыс киһи илии тутуурдаах, өттүк харалаах барбыттара. Буоларын курдук, выпускниктар тиһэх үҥкүүлэрин бэлэхтээбиппит. Кылааспытыгар икки эрэ уол буолан тохсус, онус кылаас уолаттара көмө буолбуттара. Онтон бары уопсай оҕолор, төрөппүттэр буолан флешмоб көрдөрбүппүт.
Үҥкүү уонна ырыа таһынан дэриэбинэбит хас кэнсиэр аайы кыттар көр-күлүү аргыстаах «Наара суохтар» сценкалары туруорбуттара. Онно биһиги төрөппүттэрбит Светлана Юнчанова, Иннокентий Неустроев, Иван Ширяев солбуллубат артыыстар.
Түмүккэ уопсай быраһаайдаһар «Хаалыаҕым» диэн ырыанан кэнсиэрбитин түмүктээбиппит. Төрөппүттэрбит бенгальскай уоттаах, хлопушкалаах тахсан эбии киэргэппиттэрэ. Бары куустуһан олорон наһаа үчүгэйдик ыллаабыппыт, ытамньыйбыппыт, оскуолабыт бүппүтүн дьэ өйдөөбүппүт.
Хата киһи бөҕөтө кэлбитэ уонна олус солун, сэргэх кэнсиэр буолла диэн хайҕаабыттара.
Барыта этэҥҥэ ааспытыгар үөрдүбүт-астынныбыт. Дьоллоох түгэннэри үйэтитэн хаартыскаҕа түспүппүт аҕай. Төрөппүтэрбитигэр, учууталбытыгар махтанабыт.
Аны өссө даҕаны бүтэһик экзаменнарбыт уонна банкеппыт хааллылар. Барыта этэҥҥэ буолар ини диэн долгуйа хаалабыт.
Ангелина ДАНИЛОВА, XI кылаас, В.И. Ленин аатынан Уолба орто оскуолата, Таатта.
keskil14.ru