Бүгүн, ыам ыйын 31 күнүгэр «Кэскил» медиа оскуола юнкордара Дьокуускай куоракка оҕолорго аналлаах, сахалыы тылы сайыннарар соруктаах «Хоппо» сыһыарыы сүрэхтэниитигэр кыттыыны ыллыбыт.
Кылгастык билиһиннэрдэххэ, бу оҕолорго аналлаах сахалыы тыллаах сыһыарыы буолар. Оҕо төрөөбүт тылын түргэнник ылынарыгар табыгастаах. «Хоппо» сыһарыыны сарсыҥҥыттан, бэс ыйын 1 күнүттэн Оҕо көмүскэлин күнүгэр төлөпүөҥҥүтүгэр хачайдаан ылыаххытын сөп. Оттон атырдьах ыйыттан, саҥа үөрэх дьылын көрсө «SmartTV» күөх экраҥҥа көрөр кыахтаныахпыт.
«Хоппо» сыһыарыыны урбаанньыт Петр Лукачевскай Саха Өрөспүүбүлүкэтин инновациятын сайдыытын Фондатын уонна «Кэскил» оҕо бэчээтин кыһатын кытта бииргэ үлэлээн олоххо киллэрбит.
Бу үөрүүлээх тэрээһиҥҥэ Саха өрөспүүбүлүкэтин Бырабыыталыстыбатын бэрэссэдээтэлин солбуйааччыта Сергей Васильевич Местников, «Хоппо» сыһыарыы олоххо киириитин көҕүлээччи, тэрийээччи, «Ранго» хампаанньа дириэктэрэ Петр Петрович Лукачевскай, Н.Е Мординов-Амма Аччыгыйа аатынан «Кэскил» оҕо бэчээтин кыһатын дириэктэрэ Ольга Ивановна Семенова, «Хоппо» блогер оҕолоро Сайдам уонна Сыдьаайа, кырачаан ырыаһыт Архан Уйгу, «Кэскил» медиа оскуола юнкордара кыттыыны ыллыбыт.
Биһиги, юнкордар, «Кэскил» медиа оскуолаҕа тугу үлэлиирбитин билиһиннэрдибит. «Кэскил» медиа оскуолаҕа сылы эргиччи былааннаахтык үлэлээммит анаарар, толкуйдуур, суруйар дьоҕурбутун, сахалыы саҥабытын, дьону кытта сатаан бодоруһар сатабылларбытын сайыннарарбыт, информацияны дьоҥҥо сөптөөхтүк сатаан тиэрдэргэ үөрэнэбит.
Үлэбит ис хоһооно сылтан сыл дириҥээн, кэҥээн, иһэр. «Разговоры о важном» федеральнай программа «Дьоһуннааҕы кэпсэтии» диэн сахалыы таһаарыытыгар «Кэскил» юнкордара видео устан көмөлөһөр буоллубут. Биир саастыылаахтарбыт «Төрүччү» бырайыак тула түмсэллэрин көҕүлүүбүт, төрүттэрин-уустарын билэр наадалааҕын, суолталааҕын туһунан кэпсиибит, суруйабыт. Үлэбитигэр өссө саҥа хайысха «Хоппо» сыһыарыы киирбититтэн үөрдүбүт. Үлэбит өссө кэҥээн, эппиэтинэспит өссө үрдээбит.
«Хоппо» сыһыарыы олоххо киириитин көҕүлээччи, тэрийээччи, «Ранго» хампаанньа дириэктэрэ Петр Петрович Лукачевскай: «Саҥа сүрэхтэммит сыһыарыы саха тылын үөрэтиигэ, оҕолор сахалыы саҥаларын сайыннарыыга, саха тылыгар интэриэстээх буолалларыгар улахан сабыдыалы оҥоруоҕа», — диир. Уонна бэйэтин олоҕуттан холобурдаан кэпсээтэ: — Оҕом арай истибитим английскайдыы саҥарар. Хантан биллин диэн ыйыппыппар, Ютубтан диир. «Хоппо» оннук күүстээх дьайыылаах буолуон баҕарабыт, — диэн санаатын үллэһиннэ.
Янис СЫСОЛЯТИН, VIII кылаас,
Лөгөй лиссиэй-интэринээт, Уус Алдан