Марфа Семеновна Артемьева Хадаар нэһилиэгин дьаһалтатыгар экономикаҕа сүрүн специалиһынан 17-с сылын үлэлиир. Кыайыы бырааһынньыгын иннинэ үөрэн-көтөн тураммыт кинини кытта көрсөн кэпсэттибит. Аан бастаан нэһилиэк бюджетын туһунан ыйыталастыбыт.
Марфа Семеновна кэпсээбитин курдук, нэһилиэк бюджета налоговай уонна налоговайа суох диэн дохуоттартан турар. Ону таһынан, дотация, субвенция диэн кэлэр.
– Дохуот үрдүнэн налоговай дохуоттар бааллар, ол НДФЛ (доходы физических лиц) дэнэр. Нэһилиэкпит бары үлэһиттэрин хамнастарыттан 13% нолуок тутуллар. Онтон 65 % өрөспүүбүлүкэ, 25 % оройуон уонна хаалбыт 10 % нэһилиэк бюджетыгар киирэр. Быйылгы сылга нэһилиэк бюджетыгар НДФЛ 907 тыһ. солкуобай киириэхтээх диэн былааннанар. Ону таһынан акцизтан дохуот диэн баар – 453 тыһ. солк. Бу харчы Бюджетнай кодексынан хайаан да «Дорожный фонд» диэн Хадаар – Уорҕа икки ардынааҕы суолу, нэһилиэк иһинээҕи суолу грейдердииргэ, көннөрөн биэрэргэ ороскуоттанар, – диэн кэпсээтэ М.С. Артемьева.
Аны аҕыйах хонугунан Кыайыы 80 сылын бэлиэтиибит. Хадаар нэһилиэгэ Улуу Кыайыы 80 сылын 3 тыыл ветераннаах көрсөр: Никитина Марфа Васильевна, Лукин Дмитрий Константинович, сэрии огдообото Софронова Александра Васильевна уонна сэрии сылын оҕото Игнатьева Ксения Семеновна.
– Сыл аайы Кыайыы күнүгэр биһиги убаастабыллаах ветераннарбытын эҕэрдэлээн сухой поёк туттарабыт. Быйыл “80 лет Победы” диэн Кыайыы үбүлүөйдээх мэтээлин сакаастаатыбыт. Маны таһынан, депутаттар сэбиэттэрин быһаарыытынан ветераннарбытыгар бюджеттан 50 тыһыынча көмө барыахтаах, – диэн кэпсиир дьаһалта специалиһа М.С. Артемьева.
Кыайыы үбүлүөйдээх сылыгар нэһилиэкпит дьаһалтата «Ректайм» хампаанньаҕа Кыайыы 80 сылыгар бигэргэммит эмблемалардаах баннердары, былаахтары сакаастаабыт. Улуус киинигэр буолар улахан парадка биһиги нэһилиэкпититтэн 18 киһи кыттыыны ылыаҕа.
Сайаана ФЕДОРОВА, Байдам ЕФИМОВ, V кылаас,
С.Д. Флегонтов аатынан Хадар орто оскуолата, Чурапчы