Муус устар 3-4 күннэригэр, «Кэскил» оҕо бэчээтин кыһатын «Чуораанчык» оҕо сурунаалын эрэдээксийэтэ Кэбээйи улуус Сииттэ нэһилиэгэр «О производстве дидактических материалов для организации работ советников директора по воспитанию, для учителей начальных классов, воспитателей ДОУ на примере актуализации программ «Орлята России», «Орлята дошколята» диэн семинары ыытта.
Семинарга алын кылаас учууталлара, уһуйаан иитээччилэрэ «Өксөкү сиэннэрэ», «Өксөкү сиэннэрэ. Чы-чып-чаап» диэн «Орлята России», «Орлята дошколята» Арассыыйатааҕы бырагырааммалар региональнай компоненнарыгар «Чуораанчык» сурунаалга туох көмө матырыйааллар тахсыбыттарын туһунан иһиттилэр. Үлэҕэ туһаныллар саҥа элбэх матырыйаалы ыллылар.
«Чуораанчыкка» «Өксөкү сиэннэрэ» барыгырааммаҕа аналлаах матырыйааллар ааспыт сылтан тахсан саҕалаабыттара. Сурунаалга бырагыраамма 7 хайысхаларын сүрүн өйдөбүллэрэ бэриллибиттэр. Оҕолор саҥа билиилэрин кэҥэтэллэрин курдук араас айымньылар, толкуйдатар оонньуулар, кырыйыы оҥоһуктар бааллар. Онтон атын, «Чуораанчык алта дьарыга – 5» диэн ааттаах учууталларга аналлаах методическай сүбэлэр тахсыбыттара. 2025 сылтан саҕалаан уһуйааннарга анаммыт «Өксөкү сиэннэрэ. Чы-чып-чаап» бырагырааммаҕа көмө матырыйааллар тахсан саҕалаатылар.
Семинар кыттыылаахтара бэйэлэрин санааларын билиһиннэрдилэр:
Сардаана Васильевна Обутова, директор иитэр үлэтин сүбэһитэ, Сииттэ орто оскуолата
«Биһиги «Чуораанчыкка» ааспыт сылтан суруттарабыт. Наһаа туһалаах, көмөлөөх сурунаал дии саныыбын. Ис туруга, ис хоһооно оҕо туһанарыгар олус интэриэһинэй. Семинарга «Чуораанчык» сурунаалы үлэҕэ өссө хайдах туһаныахха сөбүн биллибит. Кэлин «Өксөкү сиэннэрин» салгыыр орто сүһүөхтэргэ аналлаах бырагыраамманы олус күүтэбит, сэҥээрэбит.
Агафья Николаевна Дьяконова, алын кылаас учуутала, Сииттэ орто оскуолата:
«Биһиэхэ икки күн таһаарыылаах практическай дьарыктаах семинар буолла. «Чуораанчык» сурунаалга тахсыбыт көмө матырыйааллары, методическай көмөнү оҥордо Николай Владимирович. Ону таһынан тахсыбыт сурунааллары атыылаһан инникитин үлэбитигэр туһаныахпыт диэн эрэнэбит. Өссө да маннык семинардар буола турдуннар, сибээспитин быспакка инникитин үлэлэһиэхпит».
Мария Григорьевна Новгородова, «Чуораанчык» уһуйаан иитээччитэ:
«Биһиги «Чуораанчык» сурунаалы үлэҕэ саҥа киллэрэн эрэбит. «Өксөкү сиэннэрэ. Чы-чып-чаап» бырагыраамма уһуйаан оҕолоругар саамай сөп дии саныыбын. «Чуораанчык» баспытааталга улахан көмө, оҕолорго рабочай тэтэрээт буолар».
Уһуйаан, алын кылаас оҕолоругар анаан «Чуораанчык» сурунаалтан ылыллыбыт сорудахтар көмөлөрүнэн практическай дьарыктар ыытылыннылар. Оҕолор оонньоотулар, кырыйдылар, кырааскалаатылар, ыллаатылар, «Өксөкү сиэннэрэ» бырагыраамма туһунан өйдөбүлү ыллылар.
Николай АНДРЕЕВ
keskil14.ru