Бу күннэргэ өрөспүүбүлүкэ үрдүкү кылааһын үөрэнээччилэригэр үгэскэ кубулуйбут Ил Дархан сыллата ыытар Харыйата ыытыллар. Арассыыйатааҕы олимпиадалар, билим кэмпириэнсийэлэрэ кыайыылаахтара, бастыҥ спортсменнар, туйгун үөрэхтээх оҕолор биир түһүлгэҕэ ахсынньы 21 күнүгэр Саха Циркэтин дьиэтигэр мустуохтара.
Ыраах хоту улуустан оҕолорбут маннык улахан тэрээһиннэргэ ыҥырыллан кыттыыны ылалларыгар үөрүөххэ, киэн туттуохха эрэ наада. Кустуур орто оскуолатыттан 11 кылаас үөрэнээччитэ Алена Старостина Ил Дархан Айсен Сергеевич Николаев Харыйатыгар кыттыыны ыларыттан биһиги олус үөрэбит уонна киэн туттабыт.
Кустуур орто оскуолатын иитэр-үөрэтэр үөрэх завуһуттан Слепцова Надежда Семёновнаттан ыйытыыга хоруйдууругар көрдөстүм.
— Алена кыра кылаастан саҕалаан билиҥҥи диэри үчүгэйдик үөрэнэн кэллэ. Оскуолаҕа, улууска, республикаҕа ыытыллар предметнэй олимпиадаларга көхтөөхтүк кыттан, оскуолатын чиэһин ситиһиилээхтик көмүскээбитэ. Саха тылыгар республикаҕа миэстэни ылан турардаах. Ону таһынан «Инникигэ хардыы» научнай-практическай кэмпириэнсийэҕэ хаһыс да төгүлүн ситиһиилээхтик кыттар. Аленабыт инники былаана, баҕа санаата: ситиһиилээхтик БКЭ туттаран, баҕалаах үөрэҕэр киирэн, улууһун ааттатар үтүө үлэһит буолуом диир. Ол ыра санаата туоларыгар бэйэтиттэн тутулуктааҕын бэркэ өйдөөн, эксээмэннэригэр дьаныардаахтык дьарыктанар, — диэн Надежда Семёновна кэпсээтэ.
Элбэх талааннаах кэнчээри ыччаттарбыт сайда-үүнэ турдуннар. Оҕолор үөрэххитигэр кыһаллыҥ, барытыгар көхтөөх кыттыылаах буолуҥ, оччоҕо бу курдук улахан тэрээһиннэргэ сылдьан, элбэх саҥаны билиэххит, билсиһиэххит!
Сарыал Колесов,
Кустуур орто оскуолатын 7 кыл. үөрэнээччитэ, «Биракчаан» медиакиин эдкора.
keskil14.ru