Вадим Григорьев Дьокуускай 10 №-дээх орто оскуолатын VIII «В» кылааһын үөрэнээччитэ “WorldSkills Junior” иккис төгүлүн кыттар. Былырыын астрономияҕа ракетаны оҥорон көтүтэн, IV миэстэ буолбута.
– Быйыл эмиэ кыайыыны ситиһэр кыаллыбата. Саха национальнай астарын астаатыбыт. Тэллэйи наһаа уһуннук буһардым, саламаакка уутун элбэх гыммыппын. Күөрчэх үчүгэйдик табылынна. Тоҕус сааспыттан ас астаан саҕалаабытым. Сымыыт буһаран көрөн баран, ийэбин кытта миин, хортуоппуй, бэрэски буһарар буолбутум. Дьонум үлэлиир буоланнар, үөрэнэн кэллэхпинэ, ас астыыбын, аһатабын. Киһи бэйэтин дьоҕурун арыйарыгар анаммыт күндү кэмҥитин этэҥҥэ туһанан хаалыҥ!
Асчыт бастаан төрөппүттэригэр, доҕотторугар торт оҥорон күндүлээбит. Төһө да бириэмэни ыллар, онтон сылайбат, хата, өссө айыах-тутуох санаата киирэрин Вадим билбит. Быйыл астыыр дьоҕурун сайыннараары, билиитин-көрүүтүн кэҥэтээри, «Кулинария» куруһуогар суруйтарбыт.
– Сорох төрөппүт оҕотун оннугар барытын бэйэтэ оҥорор буолан, улаатан баран, бэйэлэрин сатаан көрүммэттэр. Онон бу куруhуок араас аһы астыырга, остуолу тардарга үөрэтэр.
Павел Ильин.