Сэтинньи 11 күнүн Спорт Министерствота Саха Республикатын үрдүнэн «Хабылык күнэ» диэн ааттаан, өбүгэбит оонньуутун тула түмсүөҕүҥ диэн ыҥырыы таҺааран, бу күн «Хабылык күнэ» диэн биллэриллибитэ.
Хабылык күнүн чэрчитинэн, оскуолабытыгар хабылыгы былыргылыы хомуур оонньууга хамаанданан күрэх ыытылынна. Күрэҕи остуол оонньууларын көҕүлээччи, тарҕатааччы, «Сахаада спорт» маастара, Саха Республикатын үөрэҕириитин туйгуна Антонина Ивановна Федорова тэрийэн ыытта.
Күрэх 4 бөлөҕүнэн барда: бөлөх аайы 2-лии үөрэнээччи, кылаас салайааччыта, биир төрөппүт, ону таһынан оскуола үлэһиттэрэ эмиэ туспа хамаанда туруорбуттара.
КүрэхтэҺии кыттааччылара оонньуу быраабылатынан 30 маҺы 2 мүнүүтэ иҺигэр хаптылар.
Түмүккэ: 1 бөлөххө — 4 кылаас хамаандата 1 миэстэ, 2 бөлөххө — 6 кылаас хамаандата 1 миэстэ, 3 бөлөххө — 10 кылаас хамаандата 1 миэстэ, 4 бөлөххө — педагогическай үлэҺиттэр хамаандалара 1 миэстэ. Бары кыттааччыларга инникитин да ситиһиини баҕарабыт!
Сарсыҥҥы күнүгэр, сэтинньи 12 чыыһылатыгар, оскуолабыт иҺинэн «Инникигэ хардыы» научнай-практическай ааҕыы ыытылынна. Кыттыылаахтар икки сиэксийэнэн 11 чинчийэр үлэлэри көмүскээтилэр.
Конференция лауреаттара ахсынньы 5 күнүгэр улуустааҕы «Инникигэ хардыы» научнай-практическай конференцияҕа кыттыыны ылыахтара. Эдэр чинчийээччилэргэ инникитин да инникилэригэр улахан хардыылары баҕарабыт!
Оттон сэтинньи 13 күнүгэр оскуолабытыгар «ИдэҺэ — 2024» бырааҺынньык ыытылынна. Бу тэрээһин сыала диэн саха норуотун үгэһин, кыстыкка киирии сиэрин-туомун билиҺиннэрии буолар.
ТэрээҺин чэрчитинэн, кылаастарынан атыы-тутуу дьаарбаҥката уонна араас күрэхтэр ыытылыннылар. Холобур, хас биирдии кылаастан эттэн оригинальнай бүлүүдэ астаан аҕалан сырдаттылар: икки үөрэнээччи уонна биир төрөппүт. Ол курдук, 1-4 кылаастарга диэри тефтель, 5-8 кылаастарга диэри розочка, 9-11 кылаастарга — китайскай пельмен оҥордулар. Маны таҺынан «Үтүө санаа хоппото» акция тэриллибитэ. Астаммыт, акцияҕа киирбит ас арааҺа оскуолабыт юбилейыгар туттулуоҕа.
Оскуолабыт иһинэн ыытыллар араас күрэхтэргэ көхтөөхтүк кыттар бары үөрэнээччилэргэ, төрөппүттэргэ, учууталларга, үлэһиттэргэ махталбытын тиэрдэбит! Салгыы маннык тэрээһиннэр, көхтөөх кыттыылар, интэриэһинэй күрэхтэр ыытылла туралларыгар баҕарабыт.
Лилия ГЕРМОГЕНОВА, Диана НИКОЛАЕВА, IX кылаас,
Яна СУХОМЯСОВА, XI кылаас үөрэнээччилэрэ,
«Хомпу» медиа-киин,
Тиэлиги, Мэҥэ Хаҥалас.