“Кэскил” хаһыат 1996 сыл ахсынньы 15 күнүнээҕи нүөмэрин бастакы сирэйигэр “Таптыыр киһибит – президент” диэн Сеня Габышев суруйуута бэчээттэммит. Оччолорго Сеня Уус Алдан улууһун Тумул орто оскуолатын II кылааһын туйгун үөрэнээччитэ эбит.
Кырачаан уол бу суругар президены чугастан көрүөн наһаа баҕарарын туһунан эппит. “Баҕар, кини елкатыгар бардахпына М.Е. Николаевы кытта хаартыскаҕа түһүөм этэ”, – диэн ыра санаатынан суругун түмүктээбит.
Мантан салгыы Сеня Габышев 28 сыл аннараа өттүгэр оҕо хаһыатыгар бэчээттэммит ыстатыйатын ааҕыаҕыҥ.
Таптыыр киһибит – президент
Мин аатым – Габышев Сеня. Билигин II кылааска туйгуннук үөрэнэбин. Учууталым Зоя Ивановна эмиэ үлэ туйгуна буолбута.
Сотору быыбар буолар үһү. Онно президент талаллар эбит. Мин дьоннорум уонна мин М.Е. Николаев диэкибит. Убайдарым бары атын сиргэ үөрэнэллэр, кинилэр эмиэ М.Е. Николаевы таптыыллар. Улахан убайым Славик – Турцияҕа, Анкараҕа университекка үөрэнэ сылдьар. Иккис убайым Ариан быйыл СГУ-га, саҥа тутуллубут үчүгэй, американскай дьиэҕэ үөрэнэр. Кини быйыл Францияҕа үөрэнэ бара сылдьыбыта. Кыра убайым Саша Лөгөй орто оскуолатын быйыл бүтэрэн эмиэ үөрэнэ барыахтаах. Мин оскуоланы бүтэрдэхпинэ эмиэ үөрэнэ барыам этэ.
М.Е. Николаев эмиэ үчүгэй учуутал курдук эбит, кини Саха сирин дьонун барыларын үөрэтэр: оҕолору даҕаны, улахан дьоннору даҕаны.
Кини мин учууталым, Зоя Ивановна курдук этэр: “Үчүгэйдик үөрэниҥ, кыһаллыҥ, оччоҕо үчүгэйдик олоруоххут, дьоллоох буолуоххут”. Уонна быйыл үөрэххэ киирбит оҕолорго суумка, тэтэрээт, ручка бэлэхтээбитэ. Оҕолор үөрбүттэрэ аҕай. Мин президены чугастан көрүөхпүн наһаа баҕарабын. Баҕар, кини елкатыгар бардахпына М.Е. Николаевы кытта хаартыскаҕа түһүөм этэ. Биһиги кинини таптыыбыт.
Суруйдум: Уус-Алдан улууһа Тумул бөһүөлэгэ Тумул орто оскуолатын
II кылааһын туйгун үөрэнээччитэ Габышев Сеня. Ахсынньы 5 күнэ.