2017 сыллаахха биһиги оскуолабыт учуутала, билигин дириэктэри иитэр үлэҕэ сүбэһитэ, медиа кииммит салайааччыта Лидия Ивановна Лукина уонна Хадаар орто оскуолатын оччотооҕу үөрэнээччилэрэ Артур Ноговицын, Тоня Лукина, Айкуо Адамова, Дайаана Софронова, Сайыына Слепцова «Мин дойдум – мин кэскилим» куонкуруска ситиһиилээхтик кыттыбыттара. Уонна «Океан» Бүтүн Россиятааҕы оҕо киинигэр баран сынньанар путевканы туппуттара.
Оскуолабыт үөрэнээччилэрэ Владивостокка «Океаҥҥа» умнуллубат күннэри атаарбыттар, Арассыыйа араас куораттарыттан кэлбит оҕолору, кинилэр салайааччыларын кытта билсибиттэр. Хадаар орто оскуолатын үөрэнээччилэрэ Рязанскай уобаластан сылдьар Александровскай оскуола үөрэнээччилэрин кытта чугастык доҕордоспуттар уонна оскуоланан билсэллэрэ.
Ол доҕордуу сыһыаны билигин биһиги салгыыбыт. Куруук сибээстэһэбит, быһа эфирдэргэ тахсан кэпсэтэбит. Соторутааҕыта хайдах муҥхалыырбытын көрдөрбүппүт. Доҕотторбут биһигини бэйэлэригэр Рязань куоракка ыалдьытата ыҥыраллар. Сүрдээх үчүгэй, туһалаах айан-сырыы буолуо этэ диэн толкуйдуубут.
Лидия Ивановна Лукина «Океаҥҥа» салайааччылар үөрэхтэригэр бара сылдьан Арассыыйа араас регионнарын оскуолаларыгар үлэлиир биир идэлээхтэрин кытта билсэн, билигин активист оҕолор бэйэ-бэйэбитин кытта билсэн, кэпсэтэн саҕалаатыбыт.
Холобура, Тюмень, Алтай, Тыва оскуолатын активистарын кытта кэпсэтэбит. Алтай оскуолатын активистарын Тыва оскуолатын активистара ыҥыраннар, Алтайдар Тываҕа тиийэ сырыттылар. Көрөргө наһаа истиҥ. Атын куорат активистара эмиэ Саха сиригэр кэлиэхтэрин олус баҕараллар.
Билигин Хадаар орто оскуолата Норуоттар сомоҕоһууларын күнүгэр аналлаах «Через года и расстояния» диэн бырайыакка кытта сылдьабыт. Александровскай оскуола үөрэнээччилэрэ биһиги оскуолабытыгар ыыппыт эҕэрдэлэрин тутан долгуйдубут.
Арассыыйа атын куораттарыгар олорор оҕолору кытта доҕордуу истиҥ сыһыан баара олус үчүгэй.
Алена КСЕНОФОНТОВА, VIII кылаас,
С.Д. Флегонтов аатынан Хадаар орто оскуолата, Чурапчы