Бастакы чиэппэрбит түмүктэнэн, күһүҥҥү сынньалаҥмытыгар биир күнү туhалаахтык атаардыбыт. Алтынньы 28 күнүгэр кылааhынан учууталбытын Дарианна Николаевналыын Бүлүү куоракка баран кэллибит. Бүлүү биhиги нэhилиэкпититтэн 211 км ыраах турар, 3 чаас курдук айанныыбыт.
Н.Г.Чернышевскай аатынан Бүлүүтээҕи профессиональнай-педагогическай кэллиэскэ сылдьан, ханнык хайысхаларга үөрэтэллэрин билистибит, учууталларга анаммыт баай ис хоһоонноох кэллиэс түмэлин кѳрдүбүт.
Н.И.Протопопова аатынан «Кэскил» интеллектуальнай-техническэй киинигэр робототехникаҕа үѳрэҕэр сырыттыбыт. Онно оҕолорго кумааҕынан мини-робот оҥотторбуттара уонна барыбытыгар 3D техниканан оҥоһуллубут брелогу бэлэхтээбиттэрэ.
Бүлүү өрүскэ киирэн, муустаах да буоллар эбэбит өссө да тоҥмокко, уста сытарын көрөн сөхтүбүт. Өрүс биэрэгин үрдүгэр турар, Бүлүү куоратын киэн туттар сквердэрин кэрийэн кѳрбүппүт: «Бүлүү тойон», Улуу Кыайыы болуоссата, «Вечный огонь», 17 комсомол обелиската, Ийэ скверэ, үс Сэбиэскэй Сойуус Геройдара Н.С.Степанов, А.А.Миронов Н.А.Кондаков уонна ССРС норуодунай учуутала М.А.Алексеев, учууталлар аллеялара.
1917 сылтан арыллыбыт П.Х. Староватов аатынан кыраайы үѳрэтэр түмэлгэ элбэҕи сэргии кѳрдүбүт, куораппыт историятын биллибит, баҕа санаа кинигэтигэр санаабытын суруйан хаалларбыппыт.
Биир күн иһигэр улууспут киинин туһунан элбэҕи биллибит, көрбөтөхпүтүн көрдүбүт, учууталбыт барытын сиһилии кэпсээтэ, эрдэттэн үөрэх туһунан билиэхтээхпитин өйдөттө. Маннык кылааhынан бииргэ сылдьан түмсүүлээх, биир санаалаах, интэриэстээх буолар эбиппит.
Саяна Никифорова,
VIII кылаас,
«Көмүс бөрүө” пресс-киин, Илбэҥэ орто оскуолата, Бүлүү