Н.Е. Мординов-Амма Аччыгыйын аатынан Харбалаахтааҕы үөрэхтээһин холбоһугар иитэр-үөрэтэр, биллэрэр-сайыннарар ис хоһоонноох тэрээһиннэр тиһигин быспакка ыытылла тураллар.
Улуу нуучча суруйааччыта М.Ю. Лермонтов төрөөбүтэ 210 сылынан нуучча тылын учууталлара И.Р. Бястинова, Л.Д. Лотова, М.П. Халыева, В.В. Блахирова тэрийиилэринэн кылаас чаастара, хоһоон ааҕыытын күрэҕэ буолла. Оскуола музейын салайааччыта Валентина Викторовна Блахирова урукку сыллардааҕы «Лермонтовскай бааллар» туһунан музейнай уруоктарга ол матырыйаалларын көрдөрөн кэпсээбитин бары наһаа сэҥээрдибит.
Уйулҕа ыйыгар аналлаах «Чөл олоҕу тутуһабын!» диэн нэдиэлэ иһинэн оскуолабыт «Орто Амма кэскилэ» хамсааһынын актыбыыстара сарсыардааҥҥы зарядканы тэрийэн ыыттылар. Психолог-учуутал Василиса Ивановна Дьяконова араас трениннэри, олохпутугар сүбэ буолар тургутуктары оҥоттордо, ол сүнньүнэн сүбэлэри биэрдэ.
Саха бастакы үөрэхтээх дьахтара, фольклориһа М.Н. Андросова-Ионова төрөөбүтэ 160 сылынан ыытыллыбыт «Кыраайы үөрэтээччилэр» НПК-ларыгар Петя Атасыков, 6 кылаас үөрэнээччитэ, «Мин дьиэ кэргэним Далбар хотуттара оҕону иитиигэ оруоллара», Эмилия Федорова, 10 кылаас «Удьуор утума салҕанар» дакылааттарынан кыттан, иккиэн иккис миэстэни ылары ситистилэр. Кинилэри В.С. Кривошапкина, В.В. Макарова салайан үлэлэппиттэр.
Бу күннэргэ араас предметтэргэ оскуола иһинэн ыытыллар олимпиадаларга оҕолор көхтөөхтүк кытта сылдьаллар. Кинилэргэ ситиһиилэри баҕарабыт!
Лейла Никонова, 8 кылаас үөрэнээччитэ, Харбалаах, Таатта.
keskil14.ru