Амматтан анал байыаннай дьайыыга баралларын истэн, биир дойдулаахтарбытыгар диэн оскуолабыт иһинэн аахсыйа тэрийдибит.
Ол курдук, Н.Е. Иванов аатынан Бөтүҥ орто оскуолатын үөрэнээччилэрэ уонна учууталлара, үлэһиттэрэ, итиэннэ VIII кылаас уолаттара Айдын Иванов, Максим Неустроев, Радмир Дьяконов, Станислав Иванов кыттыгастаах Амматтан анал байыаннай дьайыы кыттыылаахтарыгар анаан бэйэлэрин илиилэрин сылааһынан оҥорбут отут харысхалы оҥордулар. Үрүҥ сиэлин иилэн, алҕаан VIII кылаас кыргыттара уонна Туяра Петровна Самсонова, Вилена Дмитриевна Мартынова, Саина Ивановна Дьячковская, Евдокия Аркадьевна Скрябина көмөлөстүлэр. «Харысхал» бырайыак салайааччыта информатика учуутала Гавриил Михайлович Ефремов.
Биир дойдулаахтарбыт этэҥҥэ эргиллэн кэлэллэригэр баҕа санааларын биллэрэн, хорсун-хоодуот саллааттарга анаан технология уруогун кэмигэр Ида Иннокентьевна Назарова көҕүлээн II кылаастар уонна III кылаас үөрэнээччилэрэ (кылаас салайааччыта Ньургуяна Ивановна Давыдова), эбии бэйэлэрин баҕа өттүлэринэн V кылаас үөрэнээччитэ Эльвира Романова кыттыһан, барыта 38 истиҥ үтүө баҕа санаалаах суругу суруйдулар.
Маны таһынан Россиятааҕы «Көмүс күһүн-2024» агробыыстапкаҕа боруонса мэтээли ылбыт «Аромат Амгинских полей» диэн эбиэстэн уонна сэлиэһинэйтэн 80 утах бородууксуйаны VIII уонна X кылаас үөрэнээччилэрэ бэлэмнээн ыыттыбыт. Салайааччы үлэ учуутала Сандал Михайлович Степанов, манна Дайаана Ильинична Дьячковская көмөлөстө. Кэһиибитин 2025 сылга буолар Улуу Кыайыы 80 сылыгар анаан 80 сууну бэлэмнээтибит, барыта 400 чэйи ыыттыбыт. Бу бырайыагы олоххо киллэрсибит VIII кылаас үөрэнээччитэ Гена Марков бэйэтин санаатын үллэһиннэ:
— Анал байыаннай дьайыы бүтэрин күүтэбит. Оҕолорбут саҥа бородууксуйаларын ыыттыбыт. Биһиги эмиэ сэмэй кылааппытын киллэрэрбититтэн үөрэбин. Инникитин да маннык оҥорон, биир дойдулаахтарбытын үөрдүөм этэ. Сотору Аммаҕа сыл аайы буолар “Идэһэ” дьаарбаҥкатыгар киирэн атыылыам уонна көмө харчы ыытыам дии саныыбын.
Бу уустук, быыһык кэмҥэ төрөөбүт ыырдарыттан тэйэн, ыраах сылдьар дьоммутугар, биир дойдулаахтарбытыгар Аммаларга биһиги үөрэнээччилэрбит ис сүрэхтэн оҥорбут бэлэхтэрэ, суруктара күүстэригэр күүс, тыыннарыгар тыын эптин. Дойдуларын ахтылҕанын уҕарыттын.
Айдын Иванов, Ира Осипова, VIII кылаас үөрэнээччилэрэ, “Платформа” медиа-киин,
Бөтүҥ, Амма.
keskil14.ru