Михаил Ефимович Николаевка махтанабыт

Биһиги Бастакы Президеммытын Михаил Ефимович Николаевы дириҥник ытыктыыбыт, олус убаастыыбыт, кининэн киэн туттабыт.

Ытыктыыр киһибитин ахтан-санаан ааһыахтаахпыт диэн санаан тураммыт атырдьах ыйын 4 күнүгэр Дьокуускай куоракка Национальнай художественнай музейга буолбут “Махтал” өйдөбүнньүк кэнсиэргэ сырыттыбыт.

В.А. Босиков аатынан Музыка Үрдүкү оскуолатын араас сылларга бүтэрбит выпускниктар Михаил Ефимович сырдык аатыгар махтанан туран, бу кэнсиэри оҥорор туһунан этии киллэрбиттэр. Бары билэрбит курдук, Саха сиригэр Музыка Үрдүкү оскуолатын арыйтарбыт киһинэн биһиги Бастакы Президеммит Михаил Ефимович Николаев буолар.

Бастаан документальнай киинэни көрдүбүт. Киинэни көрөн олус сөхтүбүт, интэриэһиргээтибит, Михаил Ефимович олоҕун, үлэтин туһунан элбэх саҥаны биллибит.

Ол кэнниттэн концертнай программа саҕаланна. Музыка Үрдүкү оскуолатын араас сылларга бүтэрбит, билигин Россия араас куораттарыгар үлэлии, классическай музыканы тарҕата, оҕолору үөрэтэ сылдьар музыканнар, артыыстар араас биллэр композициялары оонньоотулар. Онтон биһиги «Венгерский танец» сөбүлээн иһиттибит.

Оҕо эрдэхпититтэн иккиэн музыканы сөбүлүүбүт. Төһө да атын-атын улуустарга улааппыппыт иһин, Михаил Ефимович Николаевы кытта музыка нөҥүө алтыһан, кэпсэтэн ааспыт түгэннэрдээхпит.

Айхал 2016 сыллаахха Эдьигээҥҥэ Михаил Ефимович «Музыка для всех» бырайыагынан музыкальнай лааҕырга дьарыктаммыт. Онно сылдьан 4 музыкальнай инструмеҥҥа оонньуурга үөрэммит: флейтаҕа, баяҥҥа, хомуска уонна скрипкаҕа. Бу инструменнартан кини баяны сөбүлээбит. Михаил Ефимовичка оонньоон иһитиннэрбит.

“Музыканы сөбүлүүр киһиттэн үтүө киһи үүнэн тахсар”, – диэн эппитэ онно Михаил Николаев.

Онтон Айсен Михаил Ефимович 2019 сыллаахха Таатта улууһугар бүтэһигин кэлэ сылдьарыгар баяҥҥа “Мазурка” диэн элбэхтэ оонньоон кэлбит композициятын тыаһатан сылаастык көрсүбүт. Ол кэмҥэ Айсен Бастакы Президент иннигэр оонньуу олоробун диэн сүрдээҕин долгуйбут.

Оонньоон бүппүтүн кэннэ Михаил Ефимович: “Музыканы хаһан да быраҕыма”, – диэн эппит.

Ити эппит тылларын Айсен билиҥҥээҥҥэ диэри өйдүү-саныы сылдьар. Кини билигин 5 музыкальнай инструмеҥҥа оонньуур.

***

Биһиги музыка туһунан элбэхтик кэпсэтэбит. Айсеҥҥа күүлэйдии бардахпына, фортепианоҕа оонньоон иһитиннэрэр.

Быйыл Дьокуускай куорат 17 №-дээх оскуолатын бүтэрэн, иккиэн Владивосток куоракка Уһук Илиҥҥи Федеральнай университет устудьуоннара буоллубут.

Биһиги санаабытыгар, Михаил Ефимович Николаев музыка нөҥүө анаабыт үтүө санаата биһиэхэ тиийбит курдук. Онон Михаил Ефимович Николаевка биһиги эмиэ махтанабыт.

Айсен БУРНАШЕВ, Айхал МАТВЕЕВ,

Дьокуускай куорат 17 №-дээх оскуолатын 2024 с. выпускниктара,

Уһук Илиҥҥи Федеральнай университет устудьуоннара