Мин Дьокуускай куорат №1 оскуолатыгар 8”б” кылааска үөрэнэбин. Бэйэм кылааспар кэлбитим балтараа эрэ сыл ааста, ол эрээри бастакы куннэртэн барыларын кытта билсиһэн, доҕордоһон сылдьабын. Уопсайынан кылааспытыгар 27-бит, кылааспыт салайааччыта Мария Николаевна.
Биһиги олус актыыбынайбыт. Холобур, үҥкүүлээн конкурстарга миэстэлэһээччибит, кыттааччыбыт. Мероприятияларга, конференцияларга, конкурстарга, олимпиадаларга барыларыгар кыттан иһэбит. Араас музейдарга, экскурсияларга сылдьарбытын эмиэ олус сөбүлүүбүт.
Кылааспытынан саамай сөбүлүүрбүт диэн – бары бииргэ сынньаныы. Иллэҥ кэмҥэ киинэҕэ сылдьааччыбыт. Сороҕор, каникуллар саҕаланалларыгар эбэтэр бырааһынньыкка, тыаҕа дьиэ устан эмиэ сынньанааччыбыт. Улахан бырааһынньыктары кылааспытыгар программа бэлэмнээн, бадаарактары атыылаһан уонна ас сакаастаан баран бииргэ, сүрдээх интэриэһинэйдик ылааччыбыт.
Бу сылга, кулун тутар ыйга, биһиги кылааһынан бастакы соҕуруу профтурга көппүппүт. Москваҕа диэри самолетунан, онтон Казаньга поеһынан уонтан тахса чааһынан тиийбиппит. Гидпытын кытта университеттарга, музейдарга, общественнай пааркаларга сылдьыбыппыт, элбэх араас кэрэхсэбиллээх сирдэри көрбүппүт. Ол быыһыгар сынньана таарыйа элбэх атыы-эргиэн кииннэригэр уонна “Остров мечты” диэн аттракционнар пааркаларыгар сылдьыбыппыт. Бу айаммыт биһиэхэ олус элбэх үчүгэй ахтыыны хаалларбыта, элбэҕи билэн-көрөн, атын куораттар култуураларын кытта билсэн, олус астынан кэлбиппит.
Мин кылааһым оҕолоро бары атын – атын да буолларбыт, ардыгар кыыһырсан да ылларбыт, туох да иһин саамай түмсүүлээх уонна доҕордуу кылаас буолабыт.
Айсена Брызгалова, 8 кылаас
Дьокуускай куорат 1№ оскуолата