Биһиги, Арыылаах оҕолоро, сайыҥҥы каникулбутун олус туһалаахтык атаара сылдьабыт. Ол курдук, оскуолабыт агро хайысхалаах буолан сайын аайы оскуола оҕолоро оҕуруот үлэтигэр үлэлиибит.
Быйыл теплицабыт оҕуруотун аһа үчүгэйдик үүнэн эрэр, онуоха күн-дьыл туруга да туран биэрдэ. Нэһилиэкпит дьонугар оҕурсу атыылыыбыт, сибиэһэй хаачыстыбалаах бэйэ үүннэриитэ диэн хамаҕатык атыылаһаллар, сыаната да удамыр. Сотору кэминэн оскуолабыт буфетыгар анаан оҕурсу тууһуохпут, араас салааттары кэнсиэрбэлиэхпит.
Салайааччыбыт Евдокия Вячеславовна оҕуруоту үүннэрии кистэлэҥнэрин, ньымаларын туһунан элбэҕи үөрэтэр, көрдөрөр. Оскуолабытыгар итии аһылыгы тэрийиигэ, күҥҥэ иккитэ үөрэнээччилэри аһатарга оҕуруоппут аһа улахан көмө буолар. Бу икки аһылыгы оскуола салалтата үөрэнээччилэрин босхо аһатар, оннук тэрийэн ыыппыта номнуо ыраатта. Төрөппүттэргэ, оҕолор дьиэ кэргэттэригэр үп-харчы өттүгэр улахан экономия буолар, ол иһин биһиги оҕуруокка үлэлиир оҕолор улахан эппиэтинэстээх уонна суолталаах үлэҕэ сылдьабыт. Манна үлэлиирбитин туоһулуур трудовой кинигэлээхпит уонна эбиитин хамнас аахсан хамнастаах үлэһит буолабыт.
Евдокия Вячеславовна салайыытынан кымыс оҥорон эбии харчы киллэринэбит. Нэһилиэк ыһыаҕар олохтоох дьаһалтаны кытта дуогабардаһан 100 лиитэрэ кымыһы туттаран, нэһилиэнньэҕэ эмиэ атыылаан оскуола бюджетыгар номнуо 29.000 тыһ. солкуобайы киллэрдибит.
Үлэлиирбит бары өттүнэн олус туһалаах.
Евдокия СЛЕПЦОВА,
XI кылаас,
Арыылаах, Дьааҥы