Бүгүн бэс ыйын 27 күнүгэр «Триумф» спорт уораҕайыгар «Азия оҕолоро» VIII спортивнай оонньууларын самбо күрэҕин иккис күнэ буола турар.
Бүгүҥҥү күҥҥэ эдэр спортсменнар 6 ыйааһыҥҥа киирсэ сылдьаллар. Ол курдук, кыргыттар — 44, 54, 65 киилэҕэ диэри, уолаттар — 49, 58, 79 киилэҕэ диэри.
Саха сирин самбоҕа сүүмэрдэммит хамаандатын сүрүн тренерэ Толибшо Мирзогулович Ерасейнов:
«Күрэх бастакы күнүгэр биһиги оҕолорбут куһаҕана суохтук кииристилэр. Ол курдук биир боруонса уонна биир үрүҥ көмүс мэтээли ыллылар. Дьарык өттүнэн көрдөххө Урал Бэдэрээлинэй уокуругун хамаандата үрдүк таһымнаах. Ону таһынан Казахстан, Узбекистан, Кыргызстан хамаандаларын бөҕөстөрө бэйэлэрэ улахан уопуттаахтарын уонна күүстээх дьарыктаахтарын көрдөрдүлэр. Бүгүн биһиги өрөспүүбүлүкэбититтэн 8 эдэр самбист кыттаары сылдьар.»
Бэлиэтээн эттэххэ, «Азия оҕолоро» VIII спортивнай оонньууларын самбо күрэҕэ бүгүҥҥү күнүнэн түмүктэнэр. Кыайыылаахтары чиэстээһин үөрүүлээх түгэнэ бүгүн киэһэ 19:00 Комсомольскай болуоссакка буолуоҕа. Кыттааччыларбытыгар ситиһиини баҕарыаҕыҥ.
Алена МАКСИМОВА, X кылаас, Бордон орто оскуолата
Альберт АРБЫКИН, X кылаас, Г.И. Чиряев аатынан Бүлүү куорат 1-кы нүөмэрдээх оскуолата
Дуолан ПАВЛОВ, VII кылаас, Е.Е. Эверстов аатынан Кэбээйи орто оскуолата
«Азия оҕолоро» VIII спортивнай оонньууларын пресс-киинин эдкордара