Тыйыс тымныы дойдубутугар сылын аайы үгэскэ кубулуйан үлэлиир Кустуур орто оскуолатын «Күнчээн» лааҕырын смената үөрүүлээх быһыыга-майгыга аһылынна. Быйыл уопсайа I-VI кылаас үөрэнээччилэрэ 40 оҕо сылдьар.
Лааҕыр үлэтин туһунан сиһилии билээри лааҕыр салайааччытын Мария Семеновна Слепцованы кытта кэпсэттибит.
– Үтүө күнүнэн, Мария Семёновна, лааҕыр үлэтин туһунан кылгастык билиһиннэриэҥ дуо?
–Сайыҥҥы сынньалаҥ лааҕырбыт сыала-соруга –оҕо доруобуйатын бөҕөргөтүү, бириэмэни туһалаахтык атаарарын ситиһии, бары эйэлээх биир коллектив буоларга иитии.
– Бу лааҕырга Кустуур орто оскуолатыгар үөрэнэр эрэ оҕолор сылдьаллар дуу эбэтэр атын нэһилиэк, улуус оҕолорун ылаҕыт дуу?
– Быйыл Кустуур оскуолатын иһинэн арыллыбыт лааҕыр «Күнчээн» 40 оҕону хабан киллэрдэ. Онон миэстэ аҕыйах буолан, үксүн олохтоох, бэйэбит оскуолабыт оҕолорун хабан киллэрдибит. Сайылыы кэлбит атын нэһилиэктэн, куораттан оҕолор биһиги лааҕырбытыгар сылдьыахтарын олус баҕараллар. Миэстэ таҕыстар эрэ ыла сатыахпыт.
– Баһаатайдар тустарынан кэпсиэҥ дуо?
– М.К. Аммосов аатынан ХИФУ устудьуонара Альбина Горохова, Надя Колесова кэлэн баһаатайдаан, үлэлэрин олус сөбүлээн, ылсан саҕалаатылар. Бу кыргыттар Кустуур оскуолатын выпускниктара буолаллар. Онон оҕолорбут үөрэммит оскуолаларыгар кэлэн үлэлииллэриттэн олус үөрэбит.
– Оҕолор лааҕырга күн устата тугунан дьарыктаналларый?
– Лааҕырбыт анал программа былаанынан 21 күн араас тиэмэлээх тэрээһиннэрдээх, доруобуйаны харыстыыр туһунан лекциялардаах буолар. Ону таһынан кылгас сайыммытын толору туһанар баҕаттан, сибиэһэй салгыҥҥа сүүрүүлээх-көтүүлээх күрэхтэр, экскурсиялар, оонньуулар тохтоло суох ыытыллаллар.
«Күнчээн» лааҕыр күннэтэ үүнэ-сайда турдун, кэнчээри ыччаппытыгар умнуллубат түгэни бэлэхтээтин!
Наум Наумов, IX кылаас,
И.Н. Слепцов аатынан Кустуур орто оскуолата, Эбээн Бытантай улууһа