Ньурба улууһун Хаҥалас нэһилиэгин олохтооҕо Ангелина Ивановна Докторова олохтоох «Артыал» хаһаайыстыба тутаах үлэһитэ, тэрилтэ хайдах тэриллиэҕиттэн үлэлиир ыанньыксыта.
Ийэлээх аҕата Иван Кириллович уонна Виктория Афанасьевна Докторовтар «Марха» сопхуоска өр сылларга сүөһү көрүүтүгэр үлэлээбит, сыраларын биэрбит, көлөһүннэрин тохпут үтүө үлэһит дьоннор этилэр. Кинилэр оҕо эрдэхтэриттэн үлэҕэ эриллэн, үлэ үөрүйэхтэрин билэ улаатаннар кэлин туруу үлэһит дьон буолбуттара. Ол курдук Иван Кириллович өр сылларга сопхуос сүөһүтүн көрөн бостууктаабыта. Хотон ис-тас үлэтигэр барытыгар сылдьара, субан сүөһүнү көрүүгэ да үлэлэспитэ. Виктория Афанасьевна ааттаах ыанньыксыт этэ, сүөһүлэриттэн элбэх үүтү ылан куоталаһыыга кыайан хайҕаммыта. Кинилэр үлэлиир сылларыгар сопхуос “Долукуна”, “Уһунча” сайылыктарыгар сүөһү көрөн олорбуттара. Кыһынын пиэрмэҕэ үлэлииллэрэ. Сыралаах үлэлэрин туоһутунан «Үлэ бэтэрээнэ» диэн туоһу ылбыттара буолар. Докторовтар биэс оҕоломмуттара, бары олус сэмэй, көрсүө, үлэһит дьон. Кинилэр дьоннорун олоҕун салҕаан, элбээн, үлэлээн-хамсаан олороллор.
Улахан кыыстара Ангелина – Геля билигин «Артыал» СЖПОК биир бастыҥ үлэһитэ. Кини саҥа хотоҥҥо үлэлиир, ынахтары ыыр доярка буолар. Сарсыарда эрдэттэн дьиэтигэр түбүгүрэн, аны үлэтигэр хотоҥҥо баран ынахтарын көрөр-истэр. Сүөһүлэри кытары кэпсэтэн, таптаан олус үчүгэйдик харайар. Геля бэриниилээх үлэһит, көрсүө-сэмэй киһи. Тохсус кылааска үөрэнэр уол оҕолоох.
Тыа хаһаайыстыбата, тыа сирин сайыннарыытыгар күүскэ үлэлээбит Докторовтар династиялара быстыбакка күн бүгүнүгэр диэри салҕанар. Ангелина Ивановна Докторова күүһүн-уоҕун ууран туран төрөлкөй төрүөҕү тэнитэргэ, үрүҥ илгэни үрүлүтэргэ үлэлэһэр.
Анжелина Жданова, «Ыллык» пост, Ньурба, Хаҥалас.