Салайааччыбыт ситиһиитэ. Эҕэрдэлиибит!

Биһиги оскуолабыт дириэктэри иитэр үлэҕэ сүбэһитэ Саргылаана Прокопьевна Леонтьева “Саха өрөспүүбүлүкэтин бастыҥ сүбэһитэ-2024” диэн регионнааҕы куонкуруска ситиһиилээхтик кытта сылдьар. Ол туһунан мин кинини кытта көрсөн кэпсэттим.

– Саргылаана Прокопьевна, куонкурус туһунан баһаалыста, кэпсээ эрэ.

– Бу куонкуруһу тэрийээччинэн “Навигаторы детства” региональнай ресурснай киин, ону тэҥэ Саха өрөспүүбүлүкэтин Үөрэҕин уонна наукатын, Ыччат дьыалаларыгар уонна социальнай коммуникация министиэристибэлэрэ, “Бастакылар хамсааһыннара” Саха сиринээҕи отделениета, Н.Е. Мординов-Амма Аччыгыйа аатынан “Кэскил” оҕо бэчээтин кыһата, “Юные якутяне” ресурснай киин буолаллар. Куонкуруска оскуола дириэктэрдэрин иитэр үлэҕэ сүбэһиттэрэ кыттыыны ыла сылдьабыт.

– Куонкурус хайдах быһыылаахтык ыытылларый?

– Бу куонкурс “Наставник”, “Всегда в контакте”, “На одной волне”, “Новые горизонты”, “Навигатор моего сердца”, “Сообщество значимых взрослых” диэн номинацияларынан ыытыллар. Хас биирдии кыттааччы бэйэтин үлэтин хайысхатыгар сөптөөх номинациятын талан кыттар. Дириэктэр сүбэһитинэн үлэлиэҕиттэн ыла оскуолатыгар биир хайысханы сайыннарбыт буолуохтаах. Билэргит курдук, биһиги оскуолабыт Н.Е. Мординов-Амма Аччыгыйа аатынан “Кэскил” оҕо бэчээтин кыһатын кытта медиа киин хайысхатыгар иккис сылбытын үлэлиибит. Онон сиэттэрэн “Новые горизонты” диэн номинацияҕа оскуолабытыгар медиа киин үлэтинэн кыттынным.

Балаһыанньа быһыытынан, куонкурус үс түһүмэхтээх. Бастакы түһүмэх кэтэхтэн кулун тутар1-29 күннэригэр буолбута. Үлэбитин билиһиннэрбиппит. Иккис түһүмэх муус устар 1-11 күннэригэр эмиэ кэтэхтэн ыытылынна. Хас биирдии кыттааччыга тус-туспа кейсовай сорудахтар, араас кыһалҕалаах боппуруостары быһараар, онно эппиэттэри булар ыйытыылар бэриллибиттэрэ. Бастакы, иккис түһүмэхтэри ааһаммын ахсынньы ыйга үһүс түһүмэххэ “Саха өрөспүүбүлүкэтин бастыҥ сүбэһитэ-2024” куонкуруска кытта барар буоллум.

– Куонкурус икки түһүмэҕин кэнниттэн туох санаалар үөскээтилэр?

– Олус үөрдүм, долгуйдум. Миэхэ итэҕэйэр, күүс-көмө буолар коллегаларбар, эһиэхэ, активым оҕолоругар, медиа оскуола үлэтин ис хоһоонун сүрүннүүр, көҕүлүүр, юнкор оҕолорбутун кытта тэҥҥэ үлэлэһэр, көмөлөһөр “Кэскил” оҕо бэчээтин кыһатыгар ис сүрэхпиттэн махтанабын. Аны мантан ыла очнай куонкуруска күүскэ бэлэмнэнии буолар. Бу улахан эппиэтинэс. Бары кыттааччыларга ситиһиилэри баҕарабын.

Салайааччыбытын истиҥник эҕэрдэлиибит. “Саха өрөспүүбүлүкэтин бастыҥ сүбэһитэ-2024” куонкуруска салгыы ситиһиилээхтик кыттарыгар баҕарабыт.

Вика БОРИСОВА, XI кылаас,

А.П. Илларионов аатынан Хайахсыт орто оскуолата, Чурапчы