Муус устар 3 күнүгэр алмаастаах Анаабыр сиригэр-уотугар, олохтоохторугар умнуллубат, үөрүүлээх күн тосхойдо. «Азия оҕолоро» VIII норуоттар икки ардыларынааҕы спортивнай оонньууларын уота «Полярные авиалинии» көтөр аалынан Сааскылаахха кэллэ https://vk.com/wall-199463452_18717
Эстафета уотун Михаил Антонович Ким, Тимур Аликович Гинеев арыаллаан аҕаллылар.
Үөрүүлээх тэрээһиҥҥэ Анаабыр олохтоохторо тоҕуоруһа муһуннулар. Эҕэрдэ тыллары улуус аҕа баһылыгын бастакы солбуйааччыта Василий Иванович Алексеев, Сааскылаах нэһилиэгин баһылыгын солбуйааччыта Ньургун Александрович Попов уонна улуустааҕы оҕо спортивнай оскуолатын дириэктэрэ Сергей Петрович Протодьяконов эттилэр.
Көтөр аалтан бөһүөлэккэ диэри удьуор табаһыттар оҕолоро, Сааскылаах орто оскуолатын V кылааһын үөрэнээччитэ Мичил Дьяконов убайын спорт бэтэрээнэ, хотугу многоборьеҕа Россия спордун маастара Аркадий Петрович Дьяконовтыын сыарҕалаах табаларынан тиэрдибиттэрэ уоту көрсүү уратытынан буолла.
Маҥнайгынан эстафета уотун уматар чиэс Россия спордун маастарыгар, Россия чемпионугар Валериан Валерьевич Спиридоновка уонна улуус аҕа баһылыгын бастакы солбуйааччытыгар Василий Иванович Алексеевка тигистэ.
“Азия оҕолоро” VIII спортивнай оонньуулар уотун айана кулун тутар 19 күнүттэн Саха өрөспүүбүлүкэтин Бастакы Президенэ, «Азия оҕолорун» төрүттээбит ытыктабыллаах Михаил Ефимович Николаев төрөөбүт улууһуттан Хаҥаластан саҕаламмыта.
Онтон бүгүн алмаастаах Анаабыртан эстафета уотун Өлөөн улууһугар атаардыбыт.
Ити курдук VIII төгүлүн ыытыллар «Азия оҕолоро» оонньууларын эстафетатын уотун историческай түгэнэ Анаабыр улууһугар үөрүүлээхтик ааста.
«Азия оҕолоругар» көрсүөххэ диэри!
Алена КОРКИНА, Ванесса ЧУПРИНА VIII кылаас,
«Алмаас» эдкорпост, Сааскылаах, Анаабыр
Таня Григорьева видеоролига