Чурапчыга үс күн устата ыытыллыбыт “Снежный барс” XXV өрөспүүбүлүкэтээҕи байыаннай-спортивнай оонньуулар түмүктэннилэр. Бу улахан тэрээһиҥҥэ Чурапчы улууһун үөрэҕин управлениетын иитэр үлэҕэ уонна эбии үөрэхтээһиҥҥэ отделын начальнига Евгения Ивановна Чичигинарова салайар хамаандата үлэлээтэ. Мин кинини көрсөн санаатын үллэстэригэр көрдөстүм.
– Евгения Ивановна, тэрээһин үлэ туһунан кылгастык кэпсиэххит дуо?
– Бу улахан тэрээһиҥҥэ улууспут баһылыга Степан Анатольевич Саргыдаев салалтатынан сүрдээх улахан хамаанда тэриллэн үлэлээтэ. Чурапчыбыт улууһугар дойдуга бэриниилээх ыччаты иитэн таһаарарга анаммыт “Боотур уус сыдьааннара” диэн муниципальнай программа үлэлиир. Кэнчээри ыччаты патриотическай тыыҥҥа иитиигэ элбэх кыаҕы биэрэр программа иккис сылын таһымнаахтык үлэлиир. Манна олоҕуран араас хабааннаах тэрээһиннэр тиһигин баспакка ыытыллаллар. Бу барыта биһиги оҕолорбут дойдуга бэриниилээх дьон буолан тахсалларыгар олук буолар. Ол иһигэр “Снежный барс” байыаннай-спортивнай оонньуулар биир бастакынан киирэ сылдьаллар. Улууспут хамаандата кыайыылаах тахсыбытыгар “Боотур уус сыдьааннара” программа үлэтин түмүгэ эмиэ көстөр. Үрдүк тэрээһин үлэтэ – хамаанда үлэтин ситиһиитэ.
– Эһиилги “Снежный барс” ханна ыытыллара былааннанарый?
– Быйыл 25-с төгүлүн ыытыллыбыт өрөспүүбүлүкэтээҕи “Снежный барс” байыаннай-спортивнай оонньуулар тэрийээчилэринэн Саха өрөспүүбүлүкэтин үөрэҕин уонна наукатын министиэристибэтэ буолар. Балаһыанньа быһыытынан, кыайбыт хамаанда улууһугар ыытыллар. Билэргит курдук, биһиги улууспут төрдүс төгүлүн кыайыылаах аатын ылла. Бу иннинэ үс сыл субуруччу кыайбыт буолан, быйыл үһүс төгүлүн Чурапчыга ыытылынна. Эһиилги “Снежный барс” тэрийээччилэр быһаарыыларынан, баҕар, уопсай балаһыанньаҕа уларыйыы киириэн сөп. Билиҥҥи туругунан, ханна ыытылларын чопчу этэр кыаҕым суох.
– Евгения Ивановна, тэрээһин үлэтин хамаандата үрдүк таһаарыылаахтык үлэлээбитинэн эҕэрдэлиибин! Хадаар орто оскуолатын аатыттан “Кэскил” медиа оскуола юнкордарыгар эрэнэн, итэҕэйэн сырдатыы үлэтигэр ыҥыран кытыннарбыккытыгар махтанабын.
«Снежный барс» туһунан Хадаар орто оскуолатын «Кэскил» медиа оскуола юнкордара оҥорбут видеолара https://vk.com/wall-199463452_18608
Алена КСЕНОФОНТОВА, VII кылаас,
С.Д. Флегонтов аатынан Хадаар орто оскуолата, Чурапчы
Ыытааччы Кира Гаврильева, VII кылаас
Видео Иванна Николаева, Ванесса Чувашова, VIII кылаас
Монтаж Иванна Николаева, VIII кылаас