Таатта улууһун киинигэр ССРС спордун маастара, бэтэрээн спортсмен Винокуров Валерий Константинович аатыгар хапсаҕай күрэҕэ буола турар.
Олунньу 6 күнүгэр Э.К.Пекарскай аатынан Игидэй орто оскуолатын кэллэктиибэ биир дойдулаахпыт Винокуров Валерий Константинович аатынан хапсаҕай күрэҕин тэрийэ улуус киинигэр Ытык-Күөлгэ Илларион Федосеев аатынан оҕо спортивнай оскуолатыгар тоҕуоруһан киирдибит.
Биир дойдулаахпыт Валерий Константинович Винокуров ыраах Сунтаар улууһуттан ааттаан-суоллаан бэйэтин аатыгар ыытыллар күрэхтэһиини көрө-истэ, дьоһун ыалдьыт буолан биһигини үөртэ. Валерий Константинович биир дойдулаахтарын, дьонун-сэргэтин, аймахтарын көрсөн сүргэтэ көтөҕүлүннэ.
Илларион Федосеев аатынан оҕо спортивнай оскуолата уонна Игидэй орто оскуолата куолаан буолаары турар «Манчаары оонньуутун» иннинэ хапсаҕайы таптааччыларга бэрт түһүлгэни тэрийдилэр. Сүрүн тэрийээччи — Игидэй орто оскуолатын физикаҕа учуутала Бойтунова Альбина Васильевна. Альбина Васильевна ССРС спордун маастара биир дойдулаахтарын үйэтитиигэ үһүс төгүлүн хапсаҕай күрэхтэһиитин тэрийэр. Ол курдук, бастакы күрэх ССРС спордун маастара, Каприн Гаврил Ивановичка анаммыта. Иккис күрэх -ССРС спордун маастара Кычкин Николай Николаевичка.
Онтон бу ыытылла турар үһүс күрэхтэһии буолар.
Биллиилээх спортсменнар бары Дэбдиргэ Кулаадатыттан төрүттээх маастардар буолаллар.
Бүгүҥҥү күрэххэ барыта 132 хапсаҕайдьыт күөн көрсөөрү муһунна.
«Ким күүстээх бэлэмнээх , ол кыайдын».
Варвара Ефимова.