Бэдьимэлэр «Дьөһүөл» программа чэрчитинэн оҕо сатабылын сайыннарарга, наадалаах сыаннастары иҥэрэргэ дьоҕурдаах дьону иитии-үөрэтии үлэтигэр тардабыт. Биһиги кинилэри «тастыҥ иитээччилэр» диэн ааттыыбыт.
Ол курдук соторутааҕыта 8-с кылаас шефтэрэ Фёдор Константинович, Екатерина Прокопьевна Баишевтар дьиэ кэргэн оскуолабыт уолаттарыгар муус оҥоһук кистэлэҥнэрин көрдөрөөрү, үөрэтээри Майатаа5ы Оҕо искусствотын оскуолатын талааннаах педагогун Пётр Александрович Петухову аҕалан үөрэх ыыттардылар.
Бастаан кини оҕолорго мууска үлэлиир инструменнарын көрдөрдө, хас биирдиитин туохха туттарын быһааран кэпсээтэ.
Пётр Александрович Россия, ону тэҥэ норуоттар икки ардыларынааҕы таһымнаах муус оҥоһук курэхтэригэр ситиһиилээхтик кыттыбыт эбит.
Билии ылан инструктаж истэн баран уолаттар үлэҕэ туруннулар.
Хараҥарыар диэри үлэлээн оскуолабыт таһыгар Саҥа дьылы көрсө муус оҥоһук баар буолла! Уолаттар бэйэлэрин илиилэринэн оҥорбут үлэлэриттэн астына дуоһуйдулар. Онтон тастыҥ иитээччилэрбит кэнэҕэс биир эмит муус маастара тахсыа диэн эрэнэллэр, оҕолорго саҥа билиини биэрэн бэйэлэрэ эмиэ астыннылар.
Екатерина Попова,
дириэктэри иитэр үлэҕэ солбуйааччы.
Бэдьимэ, Мэҥэ Хаҥалас