«Кэскил» медиа оскуола эдэр кэрэспэдьиэннэрин ахсаана сылтан сыл аайы элбиир. Оттон дьону кытта алтыһар, интервью ылар, хаартыскаҕа түһэрэр уонна видеоҕа устар, нэһилиэктэрин сонуннарын, бэйэлэрин саастыылаахтарын туһунан кэпсиир сатабыллара, үөрүйэхтэрэ күнтэн күн аайы сайдан иһэр.
Бу сатабыллара кинилэр олохторугар хайаатар даҕаны туһалыа, ханнык баҕарар эйгэҕэ уонна идэҕэ наада буолуо диэн бигэ эрэллээхпит. Юнкор бу олоххо мунан, сүтэн хаалыа суоҕа.
Күндү выпускниктар, юнкордар! Олох киэҥ аартыгар тахсаары турар долгутуулаах түгэҥҥит бу кэллэ. Бу сыллар тухары киһи быһыытынан сайдыбыт, оҕолуу үөрбүт-көппүт, элбэх билии иҥэриммит, үгүс доҕоттордоммут күннэргит эһигини кынаттаатыннар, үтүөҕэ-кэрэҕэ эрэ угуйдуннар. Барыгытын тиһэх чуораанынан эҕэрдэлиибит!
Нария Хоютанова, «Сардаҥа» медиа киин, Г.Д. Бястинов-Бэс Дьарааһын аатынан Чымынаайы орто оскуолата, Таатта:
Оскуолаҕа үөрэммит сылларым ортолоругар юнкордааһын саамай кэрэ түгэн буолан хаалла. «Кэскил» хаһыат миэхэ наһаа да элбэҕи биэрдэ. Манна мин дьону кытта алтыһарга, интервью ыларга, суруйарга үөрэнним. Сүрүн сатабылым — дьон тылын болҕойон истии уонна кинилэр санааларын сөпкө суруйуу.
Юнкордааһын миэхэ элбэх арыйыылары биэрдэ. Саҥа дьону кытта билистим: суруналыыстары, юнкордары, араас эйгэ үлэһиттэрин кытта. Элбэх сирдэри көрдүм — түмэллэри, тыйаатырдары, улуус киинин, нэһилиэктэри, производственнай тэрилтэлэри. Саҥа билиини ыллым: ыстатыйаны суруйарга, матырыйаал хомуйарга, интервью ыларга үөрэнним.
«Кэскил» оҕо бэчээтин кыһатыгар махтанабын! Юнкордааһын оҕо эрдэхпиттэн бэйэбин көрдөрөргө, тугу баҕарарбын ситиһэргэ кыаҕы биэрдэ. Өссө биирдэ махтал! Инникитин өссө үүнэ-сайда сылдьаргытын багарабын!
Лилиана Шестакова, «Вестник лицеиста» медиа киин, И.Г. Тимофеев аатынан Майа лиссиэйэ, Мэҥэ Хаҥалас:
Хас биирдии киһи олоҕор, эйэҕэс ийэтин сылаас илиитин уонна аҕатын эркин тирэҕин кэннэ, киһи буолар дьолун түстүүр дьоһун кэм баар – ол оскуола сыллара. Сүрэххэ-быарга иҥмит, өйгө-санааҕа олоҥхо буолан олохсуйбут, араас куруһуокка, тэрээһиҥҥэ сылдьыбыт кэрэ кэмнэр үйэлээх үтүө өйдөбүнньүк буолан, хас биирдиибитин арыаллыыллар. Мин эмиэ, бу олох аҕыйах күнүнэн тапталлаах оскуолабыттан кынат анньынан олох киэҥ аартыгар үктэнээри туран, дууһабар иҥмит дьоллоох ахтылҕан, махтал тылларбын сурукка тиһиэхпин баҕарабын.
Ахсыс кылаастан саҕалаан, мин сүрэхпин абылаабыт медиа куруһуокка дьарыктанан, саҥа эйгэни арыйбытым. Манна мин тыл күүһүн, суругунан тиэрдиллэр санаа алыптаах дьайыытын биллим. «Кэскил» хаһыат кэрэспэдьиэнэ буолан, элбэх саҥа доҕоттордоннум, журналистика кистэлэҥнэрин арыйан, бу идэ кэрэтин, уустугун өйдөөтүм. Оччолорго мин өйбөр-санаабар олохсуйбута – инники үөрэхпин, инники олохпун бу дьикти эйгэни кытары ситимниэхпин баҕарабын диэн.
Хаһан да умнуом суоҕа оскуолатааҕы сылларбын, миигин элбэххэ үөрэппит, таба суолга ыйбыт, сүрэхпин сылааһынан толорбут күндү, ытыктабыллаах учууталларбын.
Барҕа махтал эһиэхэ, мин тапталлаах оскуолам!
Кристина Неустроева, «Чуурукта» медиа киин, Н.М. Заболоцкай аатынан Томтор орто оскуолата, Өймөкөөн:
Тус бэйэбэр оскуола сыллара – бу уруоктар уонна экзаменнар эрэ буолбатах. Бу бэйэни булунуу уонна талааны арыйар кэрэ кэм. Мин ити суолга оскуолатааҕы медиа киини кытта ыкса сибээстээхпин.
Бастакы репортажпын, илиибэр бастакыбын микрофон уонна камера туппут долгутуулаах түгэммин билигин да өйдүүбүн. Оччолорго миэхэ юнкор үлэтэ буолбут түбэлтэни кумааҕыга тиһии эрэ курдук көстөрө. Ол эрээри бириэмэ аастаҕын аайы өйдөөбүтүм: юнкор – бу оскуола «хараҕа» уонна «кулгааҕа». Биһиги оскуолабыт устуоруйатын манна уонна билигин суруйар дьоммут.
Юнкордааһын мин киһи быһыытынан сайдарбар улахан тирэх буолла. Мин тулалыыр эйгэҕэ аһаҕас буоларга, бэйэ санаатын куттаммакка этэргэ уонна аттыбар баар дьону сыаналыырга үөрэнним.
Нюргуяна Максимова, «Сардаҥа» медиа киин, Г.Д. Бястинов-Бэс Дьарааһын аатынан Чымынаайы орто оскуолата, Таатта:
Мин 2023 сылтан оскуолам медиа киинигэр монтажер быһыытынан үлэбин саҕалаабытым. Араас таһымнаах тэрээһиннэри видеоҕа устан, монтажтаан сырдатабын. Үлэлээбит сылларбар мин элбэх оҕолору кытта билистим, элбэх түгэннэри өйдөөн хааллым. Бастаан видео оҥорорго ыарарҕатар этим, ол эрэн билигин түргэнник, хаачыстыбалаахтык уонна кичэйэн оҥорор буолбутум. Оскуола, нэһилиэк тэрээһиннэрин эрэ буолбакка улууспутугар, өрөспүүбүлүкэбитигэр буолар тэрээһиннэри сырдатабыт. Ону таһынан эдэр корреспонденнарга монтаж онорорго үөрэтэбин, сүбэ-ама биэрэбин. Журналист буолуу — аҥардас сонуннары бастакынан билэр эрэ буолбакка, ону таһынан ааҕааччы иннигэр улахан эппиэтинэһи сүгэр дии саныыбын. Хас биирдии тыл кырдьыктаах уонна ыйааһыннаах буолуохтааҕын өйдүүбүн. Санааны сөпкө сааһылаан, ыраастык тириэрдии уонна дьону кытта сатаан алтыһыы — хаһан баҕарар сүрүн баайым буолан хаалыахтара. Былырыыҥҥы үлэм түмүгүнэн РФ журналистарын сойууһун чилиэнэ, өрөспүүбүлүкэтээҕи «Кыһыл көмүс бөрүө» бириэмийэ лауреата Терентий Терентьевич Халыев аатынан стипендия туттарбыттара.
Эдира Саввина, «Вестник лицеиста», И.Г. Тимофеев аатынан Майа лиссиэйэ, Мэҥэ Хаҥалас:
Оҕо эрдэхпиттэн суруналыыс буолар ыра санаалааҕым. Дьону кэтээн көрөр, кэпсээннэрин истэр, ыйытыылары биэрэ уонна суолталаах түгэннэри дьоммор-сэргэбэр тиэрдэр миэхэ олус интэриэһинэй этэ. Кыра суруйуулары оҥорорбун уонна интервьюлары ыларбын сөбүлүүрүм. Ол кэмҥэ бу ыра санаам ыраах, ситиллибэт курдуга, ол эрээри кэлин өйдөөбүтүм: бэйэҥ дьыалаҕын чопчу таптыыр буоллаххына, ыра санаа дьиҥнээх олоххо кубулуйар эбит.
Бу дьыалаҕа оскуола медиа киинэ улахан оруолу оонньообута. Биһиги интервью ыларга, ыстатыйа суруйарга, камераны туттан үлэлииргэ, сюжет оҥорорго уонна дьон иннигэр саҥарарга үөрэммиппит. Хас биирдии саҥа сорудах айар толкуйдаах буоларга уонна дьону кытта кэпсэтэр сатабылы сайыннарарга көмөлөспүтэ. Медиа кииҥҥэ мин дьоҕурбун аһаҕастык көрдөрөрүм уонна суруналыыстыкаҕа бастакы хардыыларбын оҥорор кэмим буолбута.
Мин олохпор «Кэскил» оҕо редакцията ураты миэстэни ылар. «Кэскил» көмөтүнэн оҕо сааһым ыра санаата өссө чугаһаабыта. Редакцияҕа мин талааннаах уонна үлүһүйүүлээх оҕолору кытта билсибитим, кинилэр эмиэ мин курдук суруналыыстыканы уонна айар үлэни таптыыллар. Манна мин сыаналаах уопуту ылбытым, хамаанданан үлэлииргэ, информацияны сөпкө биэрэргэ уонна бэйэм санаабын куттаммакка этэргэ үөрэммитим.
Бүгүн мин эрэллээхтик этэбин: оҕо сааһым ыра санаата туолла. Бу суол устун миигин өйөөбүт дьоҥҥо, оскуола медиа киинигэр уонна эдэр талааннарга суруналыыстыка аартыгын аһар «Кэскил» редакцияҕа махтанабын.
Александр Федоров, «Уткин сонуннара» медиа киин, К.Д. Уткин аатынан Марха орто оскуолата, Ньурба:
Эдкор сыллара араас түгэннэринэн толору этилэр. Оскуолаҕа буолар хас биирдии тэрээһиҥҥэ – дьиэ кэргэн күрэхтэригэр, спортивнай күрэхтэргэ, научнай кэмпириэнсийэлэргэ – биһиги сылдьарбыт, хаартыскаҕа түһэрэрбит, интервью ыларбыт. 10-с кылаастан саҕалаан «Кэскил» оҕо таһаарыытын кытта үлэлэһэн саҕалаабытым, араас сонуннары сырдатарым.
Оттон быйылгы үөрэх дьылыгар бу эдкор буоларым туспа кэрэ түгэннэри бэлэхтээтэ: 6 бастыҥ «Кэскил» хаһыат эдкордарын ахсааныгар киирэн, Ил Дархан Айсен Сергеевичы кытта көрсүбүппүт. Бу көрсүһүү миэхэ олус улахан өйдөбүлү хаалларбыта, инники олохпутугар соруктары туруорунарга көмөлөспүтэ. Ону таһынан, 2025 сыл түмүгүнэн «Кэскил» уонна «Ньурба — Огни Нюрба» хаһыаттар бастыҥ эдэр кэрэспэдьиэннэрэ буолбутум. Бу ситиһиилэр миигин өссө күүскэ үлэлииргэ көҕүлүүллэр.
Эдкордааһын миэхэ дьону кытта алтыһарга, кинилэр санааларын истэргэ, араас көрүүлэри ылынарга үөрэппитэ. Саамай сүрүнэ – дьиҥи көрдүүргэ, чахчылары хомуйарга, олору таба суруйарга көмөлөспүтэ. Тыл күүһүн, суруллубут тыл дьайыытын өйдөөбүтүм. Хас биирдии этии, тыл суолтатын, киһиэхэ тиийэрин туһунан толкуйдуурга үөрэппитэ. Бу билии киһи олоҕун араас эйгэтигэр олус наадалаах.
Оскуолаҕа үөрэммит кэмнэрбэр эдкордааһыным – бу миэхэ дьылҕа бэлэҕэ этэ. Эдэр кэрэспэдьиэн буолуу – бу киһи олоҕун суолун буларыгар көмөлөһөр, эйгэҕэ аһаҕас уонна болҕомтолоох буоларга үөрэтэр аартык.
Онон, оскуола оҕолоро, бэйэҕит кэмҥитин туһалаахтык атаарыҥ! Саҥаны билэргэ дьулуһуҥ, бэйэҕитин араас эйгэҕэ холонон көрүҥ. Эһиги олоххут саҥа өттүттэн арыллыа, интэриэһинэй дьоннуун билсиэххит уонна умнуллубат түгэннэри мунньунуоххут!
Оля Фелегонова, «Объектив» медиа киин, Ньурба техническэй лиссиэйэ:
Хас биирдии киьиэхэ оскуолатааҕы сыллара — олоҕун саамай чаҕылхай, умнуллубат кэмнэрэ. Сорохтор бу кэмҥэ спортка ситиһиилэнэллэр, сорохтор ускуустуба аартыгын арыйаллар. Ол кэмҥэ мин олоҕум биир улахан кэрчигэ — юнкордааһын. Юнкордааһын диэн аҥаардас суруйуу эрэ буолбатах. Бу — тулалыыр эйгэни атын хараҕынан көрүү, дьон дьылҕатын интэриэһиргээһин уонна олох оргуйар үөһүгэр сылдьыы. Блокнот уонна ручка тутан, оскуолаҕа буолар араас тэрээһиннэри, кыайыылары-хотуулары кэтээн көрөрүм. Учууталлартан, биир оскуолаҕа үөрэнэр оҕолортон, тэрээһин ыытааччылартан интервью ыларым. Хас биирдии киһи бэйэтэ туспа кэпсээннээх, интэриэһинэй олохтоох буоларын оччолорго өйдөөбүтүм. Саха сирин эдэр корреспонденнарын тирэх буолар «Кэскил» хаһыатын кытта ыкса сибээстээхтик үлэлээбиппит. Юнкордар слеттарыгар, араас семинардарга сылдьан, элбэх саҥа доҕоттору булбуппут. Биһигини биир интэриэс — тыл күүһүнэн дьоҥҥо туһалыыр, кырдьыгы суруйар баҕа ситимниирэ. Юнкордаабыт сылларым миигин санааны сааһылаан этиигэ, дьону кытта уопсай тыл булан кэпсэтэргэ, эппиэтинэскэ үөрэппиттэрэ. Билигин санаатахха, юнкордааһын миэхэ олоххо күүстээх тирэх буолбут. Хайа да идэни талларбыт, дьону кытта тапсар, бэйэ санаатын итэҕэтиилээхтик этэр дьоҕур ханнык баҕарар эйгэҕэ наада. Оскуола оҕолоругар сүбэм: суруйартан, арыйартан, кэпсииртэн толлумаҥ. Тыл — бу сүдү күүс. Оскуола сылларыгар юнкордааһын ол күүһү баһылыырга бастакы үктэл буолар. Тулаҕытыгар буола турар түгэннэргэ болҕомтолоох буолуҥ, суруйуҥ, айыҥ!
Сайаана Терехова, «Дьоҕур» медиа киин, Е.Е. Эверстов аатынан Кэбээйи орто оскуолата:
Мин оскуоланы бүтэрээри сылдьаммын санаан ылбытым: күннээҕи олохпун киэргэппит, чугас доҕоттору бэлэхтээбит, эбии дьарык буолан эдэр кэрэспэдьиэннээбит сылларым көмөлөспүт эбиттэр.
Кыра кылааска бастаан ааппын ыстатыйа анныгар көрүөхпүн баҕарбытым. Бастакы ыстатыйам тахсыбытгар олус диэн үөрбүтүм уонна бу сэттэ сыл устата элбэх уопуттанным, журналистика эйгэтигэр элбэҕи биллим, сайынным.
Маҥнай оскуола хаһыатыгар, оттон Кэскилгэ тэттик ыстатыйалары, хоһооннору суруйан саҕалаабытым. Кэлин оскуолам, улууспут сонунун суруйар буолбутум, дьонтон интервью ылартан куттанарым тохтообута. Дьону истэргэ, санаабын киэҥ эйгэҕэ этэргэ уонна сонуну биир эрэ өттүнэн буолбакка, уон араас ракурстан көрөргө үөрэммитим.
«Кэскил» хаһыакка махталым муҥура суох. «Кэскил» көмөтүнэн мин хас да төгүл «Сосновай бор» лааҕырга сынньаммытым, «Сыл бастыҥ юнкора» диэн бириэмийэлээхпин, «Табыс» эдэр ыччат ыһыаҕар үлэлээбит уопуттаахпын, «Ил Дархан» харыйатыгар Айсен Сергеевич Николаевы кытта интервьюга кыттан турардаахпын.
Билигин ханнык баҕар идэни баһылаатахпына, дьон иннигэр толлубакка саҥарар-кэпсиир сатабылым миэхэ улахан көмө буоларын чуолкай билэбин.
Онон, «Кэскил» хаһыакка уонна бары үлэһиттэргэ оҕо сааһым умнуллубат күннэрин бэлэхтээбиккитигэр барҕа махтал!
Арианна Макарова, С.А. Новгородов аатынан Чурапчы орто оскуолата:
Мин 2023 сылтан «Кэскилгэ» юнкордаатым. Юнкордааммын бэйэбэр атыны арыйаммын дьоллоннум, наһаа сөбүлээтим. Бэйэҥ санааҕын толору арыйан, ааҕаччылары тардар гына суруйан таһаарбытын дьоҥҥо сонун буолан тахсара наһаа үчүгэй. Атын юнкордарга ситиһиини баҕарабын. Юнкордуу сылдьыбыппыттан киэн туттабын!
Малена Винокурова, «Объектив» медиа киин, Ньурба техническэй лиссиэйэ:
Оскуолаҕа үөрэнэр кэммэр «Кэскил» хаһыакка юнкордааһын – мин олохпор сүҥкэн суолталаах, умнуллубат түгэн буолбута.
Мин аан бастаан статья эрэдээксийэтин боруогун атыллаан киирэрбэр, хайдах эрэ улахан, кистэлэҥ эйгэҕэ киирбит курдук санаабытым. Ол кэмҥэ кыра оҕо, харахтарым бөдөҥ, барытын интэриэһиргээн көрөрүм. «Хайдах киһи санаатын кумааҕыга тиһэн, дойдутугар тиксэрэрий?» диэн ыйытыы миигин олус долгутара. Юнкор буолбут кэмнэрбин кэлин даҕаны олус истиҥник саныы сылдьыаҕым. Бу дьарык миэхэ олоххо туһалыыр элбэх үөрүйэҕи биэрдэ. Дьону кытта кэпсэтэри, толкуйдаабыппын тылгынан-өскүнэн сааһылаан этэри, араас көрүүлэри уонна бэйэҥ санааҕын хонтуруолланан суруйарга үөрэттэ. Оскуолабыт олоҕун ис өттүттэн көрөр, кини туһунан кэпсиир улахан чиэһи сүгэн, бу оскуола чааһа буолбуппуттан киэн туттабын.
Манна мин бастакы суруйууларбын оҥорбутум. Аан бастаан оскуолам тэрээһиннэрин туhунан кэпсээн дьон олоҕун туһунан суруйа үөрэммитим. Дьону кытта кэпсэтэн, интэриэһинэй дьон олоҕуттан кэпсээннэри хомуйан, санааларын истэн, кумааҕыга түһэрэр диэн олус кэрэхсэбиллээх уонна эппиэтинэстээх үлэ этэ. Хаһыат тахсыбытын кэннэ ааппын көрөн, олус үөрэрим. Ол түгэн – дьону кытта сибээс олохтоон, тугу эмэ туһалааҕы оҥорбуппуттан астынар үөрүүм этэ.
«Кэскил» хаһыат миигин суруйарга, ырытарга, дьону кытта кэпсэтэргэ үөрэппитэ. Киһиэхэ болҕомтону уурарга, чугастык сыһыаннаһарга, киэҥ көҕүстээх буоларга уһуйбута. Эдэр сааска бу курдук сирдьиттээх буолуу, олоххо таба суолу тобуларга олук буолбута. Бу мин олохпор сырдык, кэрэ өйдөбүл буолан, хаһан баҕарар санаабын сайҕаан, инникигэ дьулуһар күүһү биэрэр. Кэлэр юнкордарга, оҕолорго, маннык кэрэхсэбиллээх дьарыгынан дьарыктанарга ыҥырабын. Бу кэм эһиэхэ олоххутугар саамай туһалаах уопут биэрэн, туһалаах дьонунан тахсаргытыгар көмөлөһүөҕэ.
Дария Данилова, «Саҥа ситим» медиа киин, Чуукаар орто оскуолата, Ньурба:
Оскуолаҕа үөрэммит кэмнэрбэр «Кэскил» хаһыакка эдэр корреспонденынан үлэлээбиппин олус күндүтүк саныыбын.
Билигин мин Ньурба улууһун Чуукаар оскуолатын 11 кылааһыгар үөрэнэбин. Бэйэм суруйарбын, айарбын-тутарбын, дьону кытары алтыһарбын олуһун сөбүлүүр буоламмын оскуолабар саҥа арыллыбыт медиа кииҥҥэ тута суруттаран үлэбин саҕалаабытым. Ол мин 8 кылааска үөрэнэ сырыттахпына этэ. Ити кэмнэртэн биһиги медиабыт “Кэскил” хаһыаты кытары ыкса үлэлэһэн саҕалаабыта. Бу маннык ситимнээх үлэ, мин санаабар, оскуола оҕотугар, журналистика эйгэтигэр бараары талаһар үөрэнээччилэргэ олус күүстээх тирэх буолар, сайдыы киэҥ аартыгын арыйар. Ол курдук, Кэскилгэ үлэлээбит оҕо билиитэ кэҥээн, дьоҕура чочуллан, сырдатааччы үлэтигэр хатарыллан үгүс үлэҕэ бэлэмнээх буола улаатар диэн эттэхпинэ сыыспатым буолуо.
Эдэр корреспондент быһыытынан хас биирдии бэриллибит сорудаҕы бириэмэтигэр толорон ыытарга кыһалларым: архыыбы хасыһан, литэрэтиирэни чинчийэн, булуллубут матырыйааллары чопчулаһан баран биирдэ толору видеосюжет эбэтэр ыстатыйа оҥорорум. Онон миигин бу үлэ саҕалаабыт дьыалабын хайаан даҕаны ситиһэргэ, санаабын ыраастык тиэрдэргэ үөрэттэ. Үлэ үгэнигэр араас ситиһиилэрдээх, бэйэлэрэ ураты суоллаах-иистээх дьону кытары алтыһан өрө көтөҕүллэн өссө күүскэ үлэлиэхпин, үгүһү кэпсиэхпин, айар дьоҕурбун сайыннаран иһиэхпин баҕарар буолбутум. Ол курдук мин үксүн төрөөбүт дойдум устуоруйатын, оскуола олоҕун, тэрээһиннэрин, дьон-сэргэ уонна үөрэнээччилэр ситиһиилэрин сырдатарым.
“Кэскил” хаһыат редактордара Кристина Олеговна Иванова, Анна Пантелеймоновна Слепцова сатабыллаахтык салайан миигин утумнаах үлэҕэ уһуйбуттара. Кинилэри кытары ситимнээхтих үлэлээн үгүс таһаарыыбыт үтүө түмүктээхтэриттэн үөрэбин, истиҥник махтанабын. Онон «Кэскил» – мин сырдатар дьоҕурбун арыйбыт, олоҕум суолун таба ыйбыт кэрэ түгэн, олоҕум олук тааһа буолар. Эдэр корреспондент быһыытынан үлэлээбит оҕо сааһым кэрэ кэмнэрин сүрэхпэр чугастык тутуоҕум, өрүүтүн күндүтүк саныаҕым.
Туяра Осипова, «УОТ» медиа киин, М.Е. Васильева аатынан 2 Малдьаҕар орто оскуолата, Хаҥалас:
Мин 5 кылааска аан бастаан “Кустук” диэн оҕо түмсүүтүгэр киирбитим, онно араас тэрээһиннэр буолаллара. Ол тэрээһиннэри түһэрэр фотографтар наада этилэр, ол иһин фотограф быһыытынан бэйэбин холонон көрбүтүм уонна сөбүлээммин бу 11 кылааска диэри үгүс тэрээһини хаартыскаҕа түһэрдим. 2024 сыллаахха Ставрополь куоракка бүтүн Россиятааҕы “Российская школьная весна” күрэххэ фотографтар түһүмэхтэригэр кыттан кэлбитим. Биһиги “УОТ” медиа кииҥҥэ дьарыктанар оҕолор медиаволонтер диэн буолабыт. Оскуола эрэ буолбакка, нэһилиэк, улуус, республика тэрээһиннэрин хаартыскаҕа, видеоҕа түһэрэбит.
Дархан Тихонов, «УОТ» медиа киин, М.Е. Васильева аатынан 2 Малдьаҕар орто оскуолата, Хаҥалас:
Юнкордааммын мин кыбыстыбат, үгүс оҕолору кытта билсэн, доҕор бөҕө буолбутум. 2025 сылга тохсунньу ый Бэчээт күнүгэр Хаҥалас улууһун суруналыыһа А.М. Яковлев аатынан бириэмийэ лауреата үрдүк аатын ылбытым. Сүрүннээн мин суруйууларым сэрии, тыыл бэтэрээннэригэр ананар этэ. Оскуола сонуннара, бэйэм тус көрүүлэрбин “Хаҥалас”, “Кэскил” хаһыаттарга бэчээттэппитим. Маны тэҥэ олоҥхонон, оһуохайынан дьарыктанабын. Суруйуу уонна тылынан хоһуйуу ыкса ситимнээхтэр, онон бу икки дьарыктарым миэхэ сүрдээҕин көмөлөстүлэр.
Сандаара Тихонова, «Мэҥэбил» медиа киин, В.П. Ларионов аатынан Майа орто оскуолата, Мэҥэ Хаҥалас:
Мин 2023 сыллаахха оскуолаҕа оскуолабыт иһинэн үлэлиир «Мэҥэбил» медиа кииҥҥэ юнкорунан киирбитим. Бастакы салайааччым Светлана Николаевна этэ. Биһиги оскуолаҕа буолбут тэрээһиннэри хаартыскаҕа түһэрэн, видеорепортаж устан, статья суруйан хаһыакка уонна социальнай ситимнэргэ таhаарар этибит. Бу юнкордаабыт кэмнэрим миигин саҥарарга, суруйарга уонна дьону кытта алтыhарга үөрэттэ. Бу кэмнэр мин өйбөр умнуллубат тугэн буолан хааллыахтара.
Нарыйа Солдатова, «Мэҥэбил» медиа киин, В.П. Ларионов аатынан Майа орто оскуолата, Мэҥэ Хаҥалас:
Мин 9 кылааска «Мэҥэбил» юнкордарыгар киирбитим. Бастакы салайааччым Светлана Николаевна этэ. Кини көмөтүнэн юнкордуурбун олус сөбүлээбитим. Биһиги үлэбит диэн араас тэрээһиннэргэ сылдьан видео устан, хаартыскаҕа түһэрэн, интервью ылан уонна ыстатыйа суруйан сырдатааһын буолара. Мин саамай сөбүлүүрүм — араас интэриэһинэй дьонтон интервью ылааһын. Биир интервьюттан олус элбэҕи билэн хаалаҕын, дьоннор санааларын, опыттарын истэр миэхэ олус интириэһинэй. Оскуолаҕа юнкордаабыт кэмнэрим умнуллубат түгэннэр буолаллар. Олус үчүгэйдик өйдөөн хаалбыт кэмим “Моя профессия-IT” конкурска кыттааһына буолар. Юнкордааммын мин элбэх доҕоттордоннум, кэпсэтэрим уонна саҥарарын тупсан биэрбитэ диэн бэлиэтиэхпин баҕарабын.
Маша Сибирякова, «Тумус кыһа» медиа киин, С.К. Макаров аатынан Чурапчы гимназията:
Мин оскуолабыт «Тумус кыһа» медиа киинин уонна «Кэскил» оҕо бэчээтин кыһатын юнкора буоламммын оскуолам сыллара элбэх чаҕылхай түгэннэрдээх буолла.
Оскуолабыт куруһуогар 7-с кылаастан дьарыктанан саҕалаабытым. Гимназиябыт тэрээһиннэрин хаартыскаҕа түһэрэн, ыстатыйа суруйан салайааччыбыт Саргылана Гаврильевна Маркова көмөтүнэн бастакы хардыыларбын оҥорбутум. Саамай уопутурбут кэмим диэн 10-с кылаас дии саныыбын. Былырыын олунньуга оскуолам медиа киинин оҕолорун кытта «Муус устар» фестиваль уонна «Кэскил» оҕо бэчээтин кыһатын сүүмэрдиир түһүмэҕин ааһаммын, кулун тутарга «Сосновый бор» лааҕырга сынньанан, өрөспүүбүлүкэбит араас муннугуттан кэлбит оҕолору кытта билсэн кэлбитим. Ол смена иһигэр эмиэ «Муус устар» күрэҕэр кыттан хамаандабынан кыайыылаах аатын сүкпүппүт. Билигин санаатахха, онно саҥа тиийэрбэр өссө да элбэҕи билэ илигим. Дьолго, Сардаана Анатольевна Матвеева уонна Вадим Колесов курдук сирдээччилэр баар буоланнар эбиллэн, сайдан испитим. Бэйэм курдук биир санаалаах, журналистикаҕа тардыһар дьону кытта уопут атастаһан үлэлиирбин астыммытым.
Ону таһынан, Тааттаҕа буолбут «Манчаары оонньуулара» күрэс төрүт көрүҥнэрин XXII спартакидатыгар «Кэскиллэрбин» кытта оҕо пресс киинигэр үлэлээбитим. Бу тэрээһин миэхэ эмиэ элбэх билсиһиини бэлэхтээбитэ уонна журналистика өттүнэн саас ылбыт уопуппун, дьэ, толорутук туттубутум диэн бэлиэтиэм этэ. Бу сырыыга доҕотторбор көмөлөһөн, бэйэм наставник кэриэтэ сылдьан үлэлээбитим. Ол эрэн сорох кэм ыарахаттары көрүстэхпитинэ, кураторым Анита Игнатьевна Романова сүбэ-ама биэрэрэ, өйүүрэ.
Быйыл гимназиябыт үбүлүөйэ буолан «Тумус кыһа» медиа кииммитигэр олус элбэх үлэ барда. Онтон саамай сөбүлээбитим диэн учууталлары кытта подкаст устааһын. Онно камера иннигэр саҥарыым өссө сайынна дии саныыбын.
Бу курдук, сыл устата суруналыыстыка умсугутуулаах эйгэтигэр айан-тутан, күүскэ үлэлээбитим. Ол түмүгүнэн «Сыл бастыҥ юнкора» буолбутум миэхэ улахан ситиһии.
Онон элбэх умнуллубат чаҕылхай түгэннэри бэлэхтээбит гимназиябыт «Тумус кыһа» медиа киинигэр уонна «Кэскил» оҕо бэчээтин кыһатыгар, 90 сааһын бэлиэтиир «Кэскил» хаһыаппар муҥура суох махталбын тиэрдэбин.
Алина Павлова, «Тумус кыһа» медиа киин, С.К. Макаров аатынан Чурачы гимназията:
«Кэскил» хаһыакка юнкор быһыытынан үлэм оскуолатааҕы сылларым биир саамай умнуллубат, ураты суолталаах кэм буолбута. Юнкор быһыытынан үлэлиирбэр хаартыскаҕа түһэрэрбин, видео таҥан оҥорорбун ордук сөбүлүүбүн.
«Кэскил» хаһыат мин олоххо көрүүбун кэҥэттэ. Суруналыыстыка сүрүн тосхоллорун – кырдьыгы тутуһууну, иһитиннэриини таба тиэрдиини, киһи көҥүлүн ытыктааһыны биллим. Дьонтон интервью ыларга, атын дьон санаатын истэргэ уонна ырытарга үөрэнним. Хас биирдии киһи бэйэтэ туспа кэпсээннээх, хас биирдии түгэн бэйэтэ туспа суолталаах. Бу үлэ миигин киһи быһыытынан, өйбүн-санаабын сайыннарда.
90 сыллаах үбүлүөйдээх «Кэскил» хаһыат инникитин даҕаны өссө элбэх юнкордары иитэн таһаарарыгар баҕарабын. Мин бу үлэттэн ылбыт билиилэрим уонна уопутум олохпор туһалыаҕа. Оскуолатааҕы сылларбар кэскиллээх кэмнэрин бэлэхтээбит «Кэскилбэр» уонна медиа кииммит салайааччытыгар Саргылаана Гаврильевна Марковаҕа барҕа махталбын тиэрдэбин.
Марта Листикова, С.Д. Флегонтов аатынан Хадаар орто оскуолата, Чурапчы:
Оскуолаҕа үөрэнэр кэммэр «Кэскил» медиа оскуола юнкора буоламмын элбэххэ үөрэнним. Бастатан туран, санаабын сөпкө суруйарга, дьону кытта аһаҕастык кэпсэтэргэ, ыйытыы биэрэргэ, дьон кэпсиирин болҕойон истэргэ үөрэнним. Тулалыыр эйгэбин кэтээн көрөргө, анаарарга, информацияны хомуйарга уонна дьоҥҥо сөпкө, бириэмэтигэр тиэрдэргэ бэйэбин сайыннардым. Ити кэмҥэ төрөөбүт дойдубун, түөлбэм дьонун, кинилэр кыһалҕаларын, үөрүүлэрин-хомолтолорун ордук чугастык биллим. Маны таһынан, хоруйу ылыы, кырдьыгы көрдөөһүн, тыл күүһүн уонна суолтатын дириҥник өйдөөтүм. Юнкор буолуу эппиэтинэстээх буоларга, бэрээдэккэ үөрэттэ. Инники олохпор бу тирэх буолуо диэн эрэнэбин. «Кэскил» оҕо бэчээтин кыһатын, «Кэскил» хаһыаты кытта бииргэ үлэлиир эйгэтин тэрийбит медиа кииммит салайааччытыгар Лидия Ивановна Лукинаҕа, кураторбар Сардаана Анатольевна Матвееваҕа дириҥник махтанабын, миигин оҕо сааспыттан өйөөн, саҥаҕа-үтүөҕэ үөрэтэн, инники суолбун-ииспин тобуларга көмөлөспүккүтүгэр, тирэх буолбуккутугар. Эһиги оҕолорго суол арыйан биэрэр үлэҕит ураты оруоллааҕын хаһан да умнуом суоҕа.
Валерия Готовцева, «Байаҕантай кэскиллэрэ» медиа киин, М.Н. Готовцев аатынан Танда орто оскуолата, Уус Алдан:
Оскуолатааҕы кэмнэрбиттэн саамай умнуллубат үс сылым юнкор үлэтин кытта ситимнээх. Бу кэм устата суруйар, дьону кытта кэпсэтэр дьоҕурбун сайыннардым. Олоххо көрүүм кэҥээтэ, киһи быһыытынан улааттым. Араас идэлээх дьону кытта көрсөн кинилэр үлэлэрин, олоххо сыһыаннарын биллим. Дьону кытта аһаҕастык кэпсэтэр, санаабын аһаҕастык үллэстэр буоллум. Бу ылбыт билиилэрим миэхэ хаһан баҕарар көмөлөһүөхтэрэ.
Юнкордаабыт кэммэр саамай өйдөөн хаалбыт түгэним 2025 сыллаахха Ил Дархан Харыйатыгар сылдьыбытым уонна Ил Дархантан А.С. Николаевтан бэйэтиттэн интервью ылбытым буолар. Бу түгэн мин өйбөр-санаабар умнуллубакка хатанан хаалыаҕа. Миигин үөрэппит, үлэлэппит салайааччыбар Анна Егоровна Никифороваҕа уонна «Кэскил» оҕо бэчээтин кыһатыгар дириҥ махталбын тиэрдэбин.
Комила Аржакова, «Мичээр» медиа киин, А.П. Илларионов аатынан Хайахсыт орто оскуолата, Чурапчы:
Оскуолабын бүтэрээри тураммын элбэҕи да билэн-көрөн, элбэх да куонкурустарга кыттан, лидерскэй хаачыстыбабын арыйбыппыттан бэйэм да соһуйабын. Кыра эрдэхпиттэн кимниин да кэпсэппэт, бэйэм-бэйэбэр сылдьар оҕо этим. Итинник улаатыахпар диэри тугу да ситиспэккэ, бэйэбин арыйбакка сылдьыбытым. Арай 9-с кылааска сырыттахпына чугас доҕорум «Эрэл» оҕо хамсааһыныгар киллэрбитэ. Хайдах сөпсөһөн киирбиппин бэйэм да өйдөөбөккө хаалбытым. Мин эрдэттэн «Кэскил» медиа-оскуола туһунан билэр этим. 10-с кылааска сырыттахпына наставнигым «Сосновый бор» лааҕырга сайаапката ыыт диэбитэ. Мээнэ боруобалаан ыыппыппар миигин ылбыттара – оскуолам саамай умнуллубат түгэннэрэ дьэ саҕаламмыттара! Ол бэриэмэҕэ саҥа арылла сатыы сылдьар этим, лааҕырга тиийэн бэйэбиттэн дьэ күүскэ соһуйбутум. Лааҕыр боруогун үктээт, олус уларыйбытым, оҕолору кытары билсэн-көрсөн уонна барыны барытын быһаарсан испитим. Өссө этэрээппэр лидеринэн талбыттара. Наһаа үөрбүтүм. Чугас табаарыһым бэйэтэ да соһуйбута. Эрдэ дьоннору кытта куттана-куттана кэпсэтэр киһи эмискэччи аһыллан активистыы сылдьар буолан хаалбытым. Ол лааҕыртан күүскэ арыллан, билиҥҥээҥҥэ диэри кэпсэтэр, билсэр чугас доҕоттордоохпун. «Бу кырдьык медиа хайысхата дьону маннык күүскэ арыйар уонна сайыннарар дуо?» диэн элбэхтик толкуйдуубун. Кырдьык, сайыннарар. Мантан саҕалаан араас күрэхтэргэ кыттар буолбутум. Оскуолабар буолбут «Лидер уонна кини хамаандата» күрэҕэр кыттан «Бастыҥ тэрийээччи» аатын ылбытым. 2025 с. улуус баһылыгын Харыйатыгар ыҥырыллыбытым. Ил Дархан Харыйатыгар «Кэскил» медиа-оскуола бастыҥ юнкора буоламмын кыттыыны ылбытым. Юнкор быһыытынан сайыннарбыт салайааччыбар, дириэктэри иитэр үлэҕэ сүбэһит Саргылана Прокопьевна Леонтьеваҕа, «Кэскил» оҕо бэчээтин кыһатыгар, наставник доҕорбор, олоххо көхтөөх буоларбар сүбэ-ама буолбут Вадим Колесовка махтанабын.
Василена Дмитриева, «Кустук» студия, Кеша Алексеев аатынан Хаптаҕай орто оскуолата, Мэҥэ Хаҥалас:
Мин 6-с кылааска үөрэнэ сылдьан «Кэскил» юнкорунан оскуолам «Кустук» студияттан киирбитим. Бу үлэ миэхэ элбэх саҥа билиини, уопуту биэрдэ. Интервью ыларга, ыстатыйалары суруйарга, бэйэм санаабын сөпкө этэргэ, хаһыат таһаарар үлэтигэр үөрэнним. Тэрээһиннэртэн репортаж оҥорон, интервью ылан, дьону кытта билистим. Суруйарга, санаабын сөпкө этэргэ, дьону болҕойон истэргэ, ыйытыыны сатаан биэрэргэ үөрэнним. Билигин санаабын сөпкө сааһылаан уонна болҕомтолоохтук суруйар буолбуппун. Саҥа информацияны көрдөөн буларга, дьон этэрин болҕойон истэргэ үөрэнним. Бу үлэ миигин эппиэтинэстээх буоларга үөрэттэ. Ханнык баҕарар үлэни болҕомтолоохтук оҥорор, бириэмэни сыаналыыр буоллум, бииргэ үлэлиир доҕотторум көмөлөрүн сыаналыы үөрэнним. «Кэскил» юнкора буолбутум оскуолатааҕы сылларбын өссө интэриэһинэй оҥордо. Элбэх саҥа дьону кытта билистим. Бу барыта инникини былаанныырга көмөлөстө. Салгыы бэйэм сайдарга өссө кыһаллыам. Мин «Кэскил» юнкора буоларбынан киэн туттабын. Махтал – «Кэскилгэ»!
Мария Тищенко, Лөгөй лиссиэй-интэринээт, Уус Алдан:
Оскуолаҕа үөрэнии диэн кинигэни ааҕыы, уруокка олоруу, дьиэҕэ үлэни толоруу эрэ буолбатах эбит. Мин юнкор буолан баран, бу этии дьиҥнээх суолтатын өйдөөбүтүм. Юнкор буолуу миэхэ саҥа дьону кытта билсэргэ, кинилэр санааларын истэргэ, кэпсэтиинэн сайдарга улахан көмө буолбута. Юнкор быһыытынан мин элбэх дьоҕуру ылыммытым, дьону кытта ситимнэһэргэ, кэпсэтэргэ үөрэммитим. Интервью ылыы – дьон ис санаатын истэргэ, кинилэр туохха кыһаллалларын өйдүүргэ көмөлөһөр. Билигин бу кэмнэри саныырбар, ол юнкордаабыт сылларым миэхэ олохпун тупсарарга, сайыннарарга улахан көмө буолбуттарын ытыктабыллаахтык этэбин. Ол кэмтэн ыла ылбыт билиим-көрүүм, дьону кытта алтыһар сатабылым улахан оруолу оонньоото.
Алина Санникова, «Эрчим» медиа киин, Дүллүкү орто оскуолата, Үөһээ Бүлүү:
Мин 5 кылаастан эдэр кэрэспэдьиэнинэн үлэлиибин. Суруналыыстыка эйгэтигэр сыһыарбыт учууталым Антонина Ивановна Афанасьева. Онтон ыла мин ыраастык суруйа үөрэнним, тылым саппааһа кэҥээтэ, араас идэлээх дьону кытары алтыстым. Элбэх саҥаны биллим, элбэххэ үөрэнним. Инникитин суруналыыс идэтин баһылыахпын баҕарабын. Махтаныам этэ «Кэскил» оҕо хаһыатыгар, ийэбэр уонна учууталбар. Өйөөн-өйдөөн көмө буолалларыгар. БКЭ эксээмэни туттараары сылдьар биир саастыылаахтарбар баҕарыам этэ ситиһиини, талбыт үөрэххитигэр киирэргитин!
Айсен Верховцев, «Түмэн» медиа киин, Ф.Г. Охлопков аатынан Майа орто оскуолата, Мэҥэ Хаҥалас:
Оскуолаҕа үөрэнэр сылларбар юнкордар кэккэлэригэр киирбитим мин олохпун улаханнык уларыппыта. Бастаан 2022 сыллаахха, 8-с кылааска үөрэнэ сылдьан, медиа кииҥҥэ үлэбин саҕалаабытым. Кырдьык эттэххэ, салайааччыларым көҕүлээн, үлэ үөһүгэр «күүһүнэн» кэриэтэ киллэрбиттэрэ, ол иһин кинилэргэ билигин махталым муҥура суох!
Юнкордуу сылдьан араас таһымнаах тэрээһиннэргэ кыттыбытым, элбэх күрэхтэргэ уонна интэриэһинэй көрсүһүүлэргэ сылдьыбытым. Манна видео монтажтыырга, ыстатыйа суруйарга уонна дьонтон интервью ыла үөрэммитим. Бу сатабылларым оскуолаҕа үөрэнэрбэр, бырайыактары оҥорорбор улахан көмө буолбуттара.
Үлэбин сыаналааннар, 9-с кылааска үөрэнэ сылдьан «Сосновый бор» сынньалаҥ лааҕырыгар ыыппыттара. Оччолорго тэрээһиннэр кэннилэриттэн матырыйаалбытын бэлэмнээри олох киэһээҥҥи диэри олорон үлэлиирбит. Ол да буоллар, юнкор буолан оскуолам олоҕор бэйэм кылааппын киллэрбиппиттэн, туһалаах үлэни ааспыппыттан олус киэн туттабын!
Таира Макарова, «Түмэн» медиа киин, Ф.Г. Охлопков аатынан Майа орто оскуолата, Мэҥэ Хаҥалас:
Хаһыаттар уонна сурунааллар биһиги олохпутугар сүдү оруолу оонньууллор. Ол иһин маннык ыарахан үлэни талан ылыахтаах дьон сэдэхтик көстөллөр. Ол гынан баран, бэйэм оскуолаҕа үөрэммит сылларым тухары юнкордаатым.
Мин юнкордаабытым олус интэриэһинэй этэ. Дьиҥэ, саҥа үөрэнэ киирбитим — кыра оҕо этибит. Оскуолабытыгар истиэнэ хаһыата тахсара, ол хаһыакка ыстатыйалары бэлэмниир юнкордар бөлөхтөрө үлэлиирэ. Мин кинилэргэ киирэн, суруйарга учууталлартан үөрэнэ сатаабытым. Үһүс кылааска эрэ киирбитим, онтон хас да ыстатыйам ол хаһыакка бэчээттэммиттэрэ. «Оскуола олоҕо» диэн хаһыат балаһата биһиги үлэбитинэн туолбута.
Юнкордааһын миэхэ олус элбэх үчүгэйи аҕалбыта. Биирдэстэрэ — бу кэмҥэ миигин улахан учуонайдар үлэлэригэр тирэҕирэр, эппиэтинэстээх буоларга, ситиһиилээхтик үлэлииргэ үөрэппитэ. Атын дьон санааларын ылынан, хас биирдии тылга тирэҕирэн суруйар наадатын өйдөппүтэ. Улахан киһи курдук сананар буолбутум. Ону таһынан, юнкордааһын миэхэ ким да атыны кытта алтыһар, көрсөр-билсэр, уопсастыбаннай үлэни таптыыр дьоҕурдары сайыннарбыта.
Билигин да мин оскуолаҕа үөрэммит сылларбын, юнкордаабытым кэмнэрин мин өйүм-санаам иһигэр түстэхтэринэ, олус астына саныыбын. Ол кэмҥэ юнкордааһын миэхэ үгүс үчүгэй үгэстэри үөскэппитэ, олоххо бэйэм суолун таларбар көмөлөспүтэ. Биһиги оскуолаҕа үөрэммит сылларбыт — биһиги киһилии майгы-хара кэскилбит төрүтэ.
Наум Наумов, Кустуур орто оскуолата, «Биракчаан» медиа киин, Эбээн Бытантай:
Хас биирдии оҕо оскуолаҕа үөрэнэр кэмигэр, кыра оҕо сааһыттан саҕалаан, сүрэҕинэн-быарынан сөбүлээн дьарыктанар дьарыктаах буолар. Атыттартан итэҕэһэ суох буолан, мин эмиэ биир хайысханы талан эбии үөрэҕирии өттүгэр бэйэбин сайыннардым.
2021 сыллаахха оскуола бэрэсидьиэнин быыбарыгар талыллан, үлэ бырагырааматын толкуйдуур кэм субу тиийэн кэлтэ, ол саҕана, бары билэргит курдук, бүтүн аан дойдуну хамсык ыарыыта аймаан, тэрээһин ыытар, оҕолору муһар чопчу бобуллубута. «Тугу гынабын? Тугу үлэлиибин», — диэн ыйытыы, ол саҕана бэйэм иннибэр улаханнык турбута. Ол кэмҥэ настаабынньыгым, учууталым Виктория Ивановна Захарова биирдэ сүбэлээн турардаах: «Куйаар ситим нөҥүө араас тэрээһиннэри ыытыҥ, оскуола сонунун таһаарыҥ, араас тэттик видеолары уһулуҥ» диэн. Ол кэнниттэн оҕолор буолан мунньахтаан, «Бытантай кэскилэ» оҕо тэрилтэтин иһинэн пресс-киин арынан, үлэ күөстүү оргуйбута. Биллэн турар, ол саҕана үлэлииргэ-айарга тэрил суоҕун да иһин, син-биир онон-манан быыс булан, умнуллубат, сүрэххэ-өйгө буктаннаахтыы хатанар кэрэ кэмнэр ааспыттара. Иккис кэккэ хардыыбыт 2023 сыллаахха тохсунньу ыйга буолбута. Бүтүн оскуола салалтатын өйөбүлүнэн Н.Е. Мординов-Амма Аччыгыйа аатынан «Кэскил» оҕо бэчээтин кыһатын кытта сөбүлэҥ түһэрсэн, «Биракчаан» медиа-киин аатын иҥэринэн, бүтүн өрөспүүбүлүкэҕэ «биракчааннар» диэн аатынан биллибиппит. Ол кэннэ «Кэскил» өйөбүлүнэн уонна оскуолабыт дириэктэрэ Матрена Алексеевна Горохова салалтатынан араас уһулар, суруйар тэрил ылыллан, үлэбит биллэ тупсубута.
«Кэскил» эдэр кэрэспэдьиэнэ буолар диэн бастатан туран улахан эппиэтинэс, эн бэйэҥ эрэ тускар буолбакка, бүтүн хамаанда аатын ааттатаҕын, онно сиэттэрэн эдкордар сайдалларын туһугар элбэх үөрэтии үлэтэ ыытыллар. Холобура, сыллата «Муус устар» бэстибээлгэ «Кэскил» медиа-оскуолата үлэлиир, ону-тэҥэ өрөспүүбүлүкэ үрдүнэн ыытыллар тэрээһиннэргэ хайаан да Олоҥхо ыһыаҕыттан саҕалаан «Зарница 2.0» күрэҕи сырдатан, юнкордары бэйэлэрин кытта илдьэ сылдьан, олорор сирдэрин, аһыыр астарын толору хааччыйан, эдэр кэрэспэдьиэннэр үлэлэрин куйаар ситимин устун таһааран, олохтоох телевидение ханаалыгар көрдөрөн, биһиги ааппытын олуһун диэн ааттаталлар.
Холобура, 2024 сыллаахха Дьокуускай куоракка ыытыллыбыт «Азия оҕолоро» норуоттар икки ардыларынааҕы спортивнай күрэххэ эдэр кэрэспэдьиэн быһыытынан үлэлээн, суруйар-айар дьоҕурбун сайыннаран, умнуллубат, сүппэт сүҥкэн кылааты иҥэриммитим.
Ити курдук, эдэр кэрэспэдьиэн буолар – ДЬОЛ, саҥа билсиһии уонна сүрүннээн — эппиэтинэс!
Суруйуубун түмүктүөм иннинэ, настаабынньык учууталларбар, күүс-көмө, өйөбүл буолбут дьоммор Матрена Алексеевна Гороховаҕа, Виктория Ивановна Захароваҕа уонна Надежда Семеновна Слепцоваҕа улахан махталбын тириэрдэбин.