Хаҥалас улууһун 2 Малдьаҕар нэһилиэгэр олунньу 21 күнүгэр Саха республикатын Ситэриилээх былааһын сыллааҕы отчуота ыытылынна. Делегацияны СӨ үп-харчы министиэристибэтин миниистирин солбуйааччыта Алексеева Анна Степановна салайда. Бу күн сыллааҕы отчуоту истэ, “Аан-Аартык” култуура киинигэр нэһилиэк дьоно-сэргэтэ көхтөөх кыттыыны ылла, олохтоохтор нэһилиэккэ турар сытыы боппуруостары этиннилэр.
Улахан Аан олохтоохторо сүрүн кыһалҕанан тыа хаһаайыстыбатын эйгэтигэр эдэр специалистар үлэлии кэлбэт буолбуттарын бэлиэтээтилэр. Тыа хаһаайыстыбатын эйгэтигэр үлэлир дьон сааһыран, үлэлиир, үлэни кыайар дьон ахсаана аҕыйаан иһэрин эттилэр. Эдэр специалистарга “Бөртө” сылгы собуота уопсай олорор дьиэни туруоруста. Нэһилиэккэ кадрынан хааччыйыы боппуруоһа күн бүгүн сытыытык турар. Ол курдук нэһилиэк 4 специалискэ наадыйар: фельдшер, история учуутала, бэтэринээрдэр үлэлии кэлэллэрин күүтэллэр. Маны тэҥэ суол бэлиэлэрин туруорарга, бэкээринэ наадатын туруорустулар. Ситэриилээх былаас сыллааҕы отчуота наҕараадалааһынынан түмүктэннэ.
М.Е. Васильева аатынан 2 Малдьаҕар орто оскуолатын медиакиинэ,
хаартыскаҕа Яковлева Валя, видеоҕа Лукина Саяна түһэрдилэр,
11 кылаас үөрэнээччилэрэ