Кулун тутар 6 күнүгэр биһиги, юнкор оҕолор, Дьокуускай куоракка буолбут Саха өрөспүүбүлүкэтин Бырабыыталыстыбата 2024 сыл түмүгүнэн отчуоттуур мунньахха сырыттыбыт. Мунньаҕы истэ элбэх киһи мустубут. 2024 сыл түмүгүнэн Саха сиригэр туох үлэ ыытыллыбытын, инники туох былааннар баалларын туһунан иһиттибит.
Сүрүн дакылааты Саха Өрөспүүбүлүкэтин Бырабыыталыстыбатын бэрэссэдээтэлэ Кирилл Евгеньевич Бычков оҥордо. Кинини солбуйааччылара Анатолий Асколонович Семенов, Дмитрий Дмитриевич Садовников, Ольга Валерьевна Балабкина, Сергей Васильевич Местников, Георгий Михайлович Степанов бааллар. Отчуоттуур мунньаҕы Дьокуускай куорат баһылыга Евгений Николаевич Григорьев салайан ыытта.
Биһиги үөрэхтээһин хайысхатыгар ааспыт сылга туох үлэ ыытыллыбытын туһунан болҕойон иһиттибит.
Кирилл Евгеньевич өрөспүүбүлүкэ Бырабыыталыстыбата оскуола үөрэнээччилэрэ бэйэлэрэ көҕүлүүр бырайыактарын, этиилэрин истэрин туһунан санаатын үллэһиннэ. Холобур, туризм туһунан. Саха сирин салалтата оҕолор санааларын истэр эбит диэн сөбүлүү иһиттибит.
Отчуокка этиллибитин курдук, 2024 сылга хайа да сыллардааҕар элбэх оскуола, пристрой тутуллубут. Ааспыт сылга 315 миэстэлээх түөрт оҕо саадын саҥа дьиэтэ олоххо киирбит. Уопсайа 3 722 миэстэлээх 14 саҥа оскуола тутуллубут. Дьокуускай куоракка үлэҕэ киирбит саҥа объектарынан кадетскай оскуола, 1 №-дээх Марха, 29 №-дээх оскуола саҥа дьиэтэ уонна 19 №-дээх оскуола пристройа буолар. Маны таһынан куорат тас өттүгэр 200 миэстэлээх “Спутник” чэбдигирдэр-үөрэтэр лааҕыр тутуллубут. “Үөрэхтээһин” национальнай бырайыагынан өрөспүүбүлүкэ үрдүнэн “Точка Роста” 68 үөрэх киинэ арыллыбыт.
2024 сылга үөрэхтээһин эйгэтигэр биир саамай улахан бырайыагынан “Мин бастакы идэм” буолар. Бу оскуола үөрэнээччилэригэр аналлаах бырайыак. Үрдүкү кылаас үөрэнээччилэрэ бу бырайыакка кыттан, үөрэнэн инники баһылыахтаах идэлэрин чугастык билсэллэр. Саха сирин үрдүнэн “Мин бастакы идэм” бырайыакка 1200 үөрэнээччи кыттан, 40 араас хайысхаҕа үөрэнэн сертификат ылбыт.
– 2025 сылга Дьокуускай куоракка өрөспүүбүлүкэҕэ саамай улахан, 999 миэстэлээх М.Е. Николаев аатынан оскуола тутуута, Сахаполитехническай лицей пристройа түмүктэнэн олоххо киириэҕэ. 4 №-дээх коррекционнай оскуола, “Спортивнай”, “Звезднай» микрооройуоннарга оҕо саадтары тутуу үлэтэ ыытыллар. Маны таһынан Ленин проспегар турар 1 №-дээх орто оскуола тутуутун 2025 сылга түмүктүүр сорук турар, – диэн Кирилл Евгеньевич Бычков Дьокуускай куорат олохтоохторугар эттэ.
Отчуокка биһиги 17 №-дээх оскуолабыт эбии дьиэтин уонна физико-техническай лицей саҥа дьиэтин тутууларын саҕалыыр Саха Өрөспүүбүлүкэтин Бырабыыталыстыбатын инники былааннарыгар туралларын туһунан үөрэ иһиттибит.
Россия Президенэ Владимир Владимирович Путин сорудаҕынан, Дьокуускай куоракка Музыка Үрдүк оскуолатын саҥа кампуһун тутуу үлэтэ саҕаламмыт.
– Бу биһиэхэ кэтэһиилээх объект буолар. Россия Президенэ Владимир Владимирович Путин ааспыт сылга Саха сиригэр кэлэ сылдьан, анаан онно тиийэ сылдьыбыта. Бу кини тус болҕомтотун уурар объега буолар. Билиҥҥи кэмҥэ федеральнай үбүнэн хааччыйыыны ыллыбыт, – диэн эттэ Кирилл Евгеньевич Бычков.
Дьокуускай куорат комплекснай сайдыытын былааныгар улахан болҕомто ууруллар эбит. Билигин бу былаан чэрчитинэн, дойдубут Президенэ Владимир Владимирович Путин өйөбүлүн ылбыт “Межвузовский кампус мирового уровня в Якутске” диэн бырайыагы олоххо киллэрии үлэтэ ыытылла турар.
Ити курдук отчуокка сылдьаммыт тугу билбиппитин эһиэхэ кэпсээтибит. Дьокуускай куоракка олус элбэх үлэ ыытылла турарын интэриэһиргээн иһиттибит. Өрөспүүбүлүкэ салалтата куорат олохтоохторугар туох үлэ ыытыллыбытын кэпсиирин сэргээтибит.
Катя БАКАЕВА, Алеся НИКОЛАЕВА,
VIII “Г” кылаас, 17 №-дээх оскуола, Дьокуускай
Алеся Николаева хаартыскалара