100 сылга – 100 куб. мас!

Улуу сирдьит Владимир Ильич Ленин төрөөбүт күнүн биһиги оскуолабыт сылыаайы бэлиэтиир үтүө үгэстээх. Бу күн, үгэс быһыытынан, кыраайы үөрэтэр конференциялар, биллиилээх дьону кытта көрсүһүүлэр ыытыллаллар.

Быйыл бары оскуоланан тахсан, нэһилиэкпит аҕам саастаах дьонугар мас саһааныгар субуотунньуктаатыбыт. Бастаан бэлиэ сирбитигэр Кургааҥҥа мустан, ханна үлэлии барарбытын быһаарсан, бэлэмнэннибит. Дьэ уонна оскуола автобуһунан үлэлиир ыалларбытыгар Куулаҕа айаннаабыппыт.

Алын сүһүөх кылаастар өр сылларга салайар үлэҕэ сылдьыбыт, хоһоон суруйааччы Марат Егорович Юнчановка, V кылаастар анал дьайыы кыттыылааҕын төрөппүттэригэр Валентина Ильинична, Степан Петрович Ивановтарга, VII, VII уонна XI кылаастар сопхуоска ыанньыксытынан өр үлэлээн нэһилиэк сайдыытыгар кылаатын киллэрбит Агафья Ивановна Доргуеваҕа, IX уонна V кылаастар тыыл ветераныгар Максимова Мария Даниловна Максимоваҕа үлэлээтилэр. Биһиги, Х кылаастар уонна оскуола үлэһиттэрэ үөрэнэр доҕорбут Айсиэн дьонугар Иван Иванович Неустроев дьиэ кэргэнигэр көмөлөстүбүт.

“Норуот күүһэ – көмүөл күүһэ”. Онон биир ыал маһын бүтэрээт, атыннааҕы ыалга үлэлии сылдьар оҕолорбутугар баран эмиэ көмөлөстүбүт. Бу күн уопсайа оруобуна 100 куб. мас саһааннанна. Оскуолабыт Ленин аатын сүкпүтэ 100 сылынан маспыт ахсаана оруобуна түбэстэ.

Хас да сиринэн саһаан бөҕөтө турда. Кэлэр сылга «Куула» түөлбэ дьоно кыһыннарын сылаас дьиэҕэ атаарыахтара диэн үөрдүбүт.

Бу курдук субуотунньуктар биһигини бэйэ-бэйэни өйөһөргө, көмөлөһөргө, биир сомоҕо буоларга үөрэтэр.

Владимир Ильич Ленин 154 сааһынан үтүө тэрээһиннээх, барыбытыгар туһалаах күн ааста. Эһиил үбүлүөйдээх сылыгар өссө күүстээх үлэ ыытыллыаҕа.

Ангелина ДАНИЛОВА, Х кылаас,

В.И. Ленин аатынан Уолба орто оскуолата, Таатта