Алтынньы 5 күнэ -Учуутал күнэ! Учуутал оҕоҕо билиини биэрэрин таһынан, үтүөҕэ, кэрэҕэ уһуйан, хас биирдии үөрэнээччигэр дууһатын сылааһын иҥэрэн, идэтин таларыгар олук ууран, улуус, өрөспүүбүлүкэ, дойду кэскилин түстүүр ураты суолталаах киһи буолар. Ытыктабыллаах учууталлары, иитээччилэры, эбии үөрэхтээһин педагогтарын, педагогическай үлэ бэтэрээннэрин сырдык бырааһынньыккытынан эҕэрдэлиибит!
«Ыччаты иитэр уонна үөрэтэр үлэҕэ учуутал тутаах киһинэн буолар. Бастатан туран, кини бэлэмиттэн, уопутуттан, идэтин төһө баһылаабытыттан биһиги ыччаппыт кэлэр кэскилэ быһаччы тутулуктаах. Онон учуутал күүһэ кини билиитигэр буолар…», -диэн этэн турар ССРС норуодунай учуутала Михаил Андреевич Алексеев.
Учуутал сүрүн соругунан үөрэнээччигэ саҥа, кэскиллээх толкуйу арыйыыта буолар.
Бу биирдэ бэриллэр олоххо киһи талан ылбыт таптыыр идэтэ үйэтин тухары тыын угар, олоҕун уһатар, сырдыкка сирдиир үрдүк анала буолар. Мин санаабар, онно оскуола кэмигэр үөрэппит, дьарыктаабыт учууталларын уонна салайааччыларын улахан оруолу оонньууллар. Ол курдук, мин Е.Е.Эверстов аатынан Кэбээйи орто оскуолатыгар үөрэммитим тухары хаһан да умнуллубат, үчүгэй түгэннэри, элбэх доҕоттору, билиини бэлэхтээбит киһинэн «Айылҕа» устуудьуйа уонна «Нуклеус» үөрэнээччилэр научнай түмсүүлэрин салайааччыта Вера Николаевна Заровняева буолар.
Вера Николаевналыын аан маҥнай учуутал быһыытынан ахсыс кылааска химия уруогун үөрэтэ ылбытыгар билсибитим. Онтон ыла мин науканы сэҥээриим икки төгүл күүһүрбүтэ. Кини үөрэтэрэ наар олус интэриэһинэй, наадалаах буолааччы, уруоктара куруутун, санаабар, түргэн баҕайытык ааһан хаалаллар этэ.
Химия уруогун таһынан биһигини куруһуокка эбии дьарыктыыра өссө интэриэһинэй буолааччы. Үөрэнээччилэр билсиһэн, араас уопуту туруоран, элбэҕи билээччибит.
Ону таһынан, «Нуклеус» үөрэнээччилэр научнай түмсуулэригэр кини миигин чинчийии үлэтигэр көҕүлээн сыһыарбыта. Ол күнтэн ыла араас сири-дойдуну көрөн, элбэх күрэхтэһиилэргэ кыттан, билиим-көрүүм кэҥээн испитэ.
Хас үрдүкү кылааһы таҕыстаҕым аайы, туох эрэ саҥа күүтэрэ. Оннук салгыы тус бэйэ уратыбын сайыннараары, «Айылҕа» устуудьуйаҕа Вера Николаевна салайыытыгар суруналыыстыканан дьарыктана киирбитим.Үгүс доҕотторбун бэлэхтээбит кэмнэр онно ааспыттара.
Оҕо-аймах ааҕар тапталлаах «Кэскил» хаһыаппын кытта чугастык билсибитим. «Кэскил» рекорда» диэн Дьокуускай циркатыгар буолбут тэрээһиҥҥэ оҕолор араас рекорду оҥорбуттарын чиэстээһин буолбута. Мин онно «Саамай уһун уол» номинацияҕа тиксибитим. Ол, чахчы, оҕолор аралдьыйалларыгар, билиилэрэ-көрүүлэрэ кэҥииригэр, кыахтарын холоноллоругар аналлаах чэпчэки, оҕолуу бэһиэлэй куонкурус этэ.
Түмсүүгэ ыстатыйалары суруйан, тэлэбиидинньэҕэ биэрии бэлэмнээн оҥорон таһаарааччыбыт. Сайын аайы айылҕаны тахсан кэтээн, үөрэтэн көрөрбүт. Үөрэх быыһыгар эбии лааҕырдарга баран суруналыыстыкаҕа үөрэнэн кэлээччибит. Оннук, салайааччым көмөтүнэн «Хотугу сулус» оҕо теле-радиоакадемиятын иитиллээччитэ буолбутум олус туһалаах этэ.
Билигин үрдүк үөрэххэ быраас идэтигэр үөрэнэ сылдьарбар күндүтүк саныыр учууталым улахан оруолу оонньообута саарбаҕа суох.
Вера Николаевнаны уонна бары учууталларбын Учуутал күнүнэн истиҥник эҕэрдэлиибин! Кытаанах доруобуйаны, үлэҕитигэр үрдүк ситиһиилэри, инникигитин сөпкө былааннаан, өссө да сайда тураргытыгар баҕарабын. Куруһуоккут уонна устуудьуйаҕыт үөрэххэ тардыһыылаах, сүрэхтээх элбэх үөрэнээччилээх буоллун.
Оскуолатааҕы кэмнэрим умнуллубат түгэннэрин, олоххо саҥаны чинчийиигэ көҕүлээбитин иһин Вера Николаевнаҕа улахан махталбын кытта олох-дьаһах чэпчиирин, дьон-аймах дьоллоохтук, доруобайдык олороллорун туһугар күүскэ үлэлии, үүнэ-сайда туруом диэн мэктиэ тылбын тиэрдэбин!
Ааптар: Иннокентий Киренскэй, ХИФУ медицина институтун устудьуона.
keskil14.ru