Маҥнайгы кылаастар үөрэнэн саҕалаатылар. Ол эрээри номнуо сорох төрөппүттэр: «Оо, мин оҕом иккис күнүттэн оскуолаҕа барымаары ытаан бөҕө. Дьэ, хайдах үөрэнээхтиир», – диэн долгуйан эрэллэр…
Ити мунаахсыйар боппуруоскутугар чопчу хоруйу ылыаххытын баҕарар буоллаххытына, бу тургутугу толоруҥ. Сөпсөһөр ыйытыыларгытыгар «1» баалы туруоруҥ, суох буоллаҕына – «0».
1. Оҕоҥ дьыссаакка сылдьыбыта дуо?
2. Ким эмэ атаҕастаатаҕына, утары хардарар дуо?
3. Чаас аҥаара туохха да аралдьыйбакка эрэ конструктордыан, уруһуйдуон сөп дуо?
4. Хартыынаны көрөн кэпсиэн, аччаабыта биэс этиини оҥоруон сөп дуо?
5. Билбэт дьонугар кыбыстар дуо?
6. Уоҥҥа диэри, онтон төттөрү сатаан ааҕар дуо?
7. Сүһүөхтээн ааҕар дуо?
8. Нойосуус өйүгэр 3-4 хоһоону билэр дуо?
9. Уруучуканы, харандааһы сөпкө тутан, бигэтик баттаан суруйар дуо?
10. Уруһуйдуурун сөбүлүүр?
11. Дьиэ уонна тыа кыылларын билэр, араарар?
12. Бэйэтэ силимнээн, кырыйан, аппликация оҥорор дуо?
13. Пазл чаастарын хомуйан, ойууну таһаарар?
14. Предметтери биир өйдөбүлгэ холбуур кыахтаах дуо? Холобура, оҕурсуну, луугу, сүбүөкүлэни ыйыттахха, кини: “Оҕуруот астара”, – диэн уопсай биир өйдөбүлгэ ситимниир дуо?
15. Этэргин барытын сөпкө өйдүүр?
16. Зоопаркаҕа, куоракка (дэриэбинэҕэ), мусуойга сылдьыбыта дуо?
17. Бэйэтэ соҕотоҕун (самостоятельно) оонньуур дуо?
18. Хоббилаах?
19. Үчүгэйдик сиһилии, өйдөнөр гына кэпсиир?
20. Тыл суолтатын өйдөөбөтөҕүнэ, ис хоһоонун быһаартарар дуо?
16-20. Эҕэрдэ! Оҕоҕун бэркэ ииппиккин уонна сайыннарбыккын. Оскуолаҕа үчүгэйдик үөрэниэҕэр эрэн. Сорудахтарын төрөппүт да көмөтө суох бэйэтэ элэҥнэччи оҥоруоҕа. Ол эрээри оҕо аата оҕо, наһаа көҥүл-босхо ыыппакка, кэмиттэн кэмигэр хонтуруоллуоххун, бэрэбиэркэлиэххин наада.
10-15. Оҕоҥ син бэлэмнээх. Куһаҕана суох көрдөрүү. Ол гынан баран, “суох” диэн хоруйдаргын ырытан көр эрэ. Ити көтүтүүлэргитин иккиэн көннөрөргө кыһаллыҥ. Бастаан утаа уруок ааҕарыгар сүбэ-ама буоллаххына, кэлин бэйэтэ эппиэтинэстээхтик оҥорор буолуоҕа.
5-9. Бэлэмэ – 50%. Арааһа, эн оҕоҕор улаханнык болҕомто уурбатаххын быһыылаах. Эбэтэр үлэҕэр охтон хаалбыккын, эбэтэр күнү быһа ватсаптыы, киинэ көрө олорбуккун. Ол эрээри, сыыһаҕын көннөрөргөр билигин да хойут буолбатах. Үөрэх дьыла саҥа саҕаланна. Онон туох баар өйгүн-санааҕын барытын оҕоҕор уур. Уруогун тэҥҥэ ааҕыс, кэпсэт, экскурсияҕа сылдьыҥ, эбии дьарыктаныҥ.
1-4. Хомойуох иһин, эн оҕоҥ үөрэнэр кыаҕа суох. Төрүт сайыннарбатаххын, дьарыктаабатаххын… Онон бу сыл киниэхэ уустук буолара сэрэйиллэр. Оҕолоро 4-5 саастарыгар билбиттэрин ситиһиэн, ону таһынан үөрэҕи ылыныан, оскуола программатын билиэн наада. Ол иһин репетитор ылан, эбии үөрэттэр, бэйэҥ күн аайы дьарыктаа.