Дойдубут экологиятын кыһалҕатын боппуруоһугар Кэмпэндээйи оскуолата Дьокуускайдааҕы Немец култууратын киинин (дириэктэр Ольга Кычкина) кытары үлэлээбитэ сэттис сылыгар барда. Бу киин ыытар араас интэриэhинэй экологияҕа сыһыаннаах тэрээһиннэригэр биhиги оскуолабыт уөрэнээччилэрэ, учууталлара, төрөппуттэрэ көхтөөхтук кытталлар.
Бу сырыыга Сунтаар алын сүһүөх оскуолатын 1 кылааhын үөрэнээччитэ Вика Данилова «Батарейкалары хомуйуоҕуҥ!» диэн ыҥырыытын ылынан, биhиги, Кэппэндээйи орто оскуолатын 8 кылааhын үөрэнээччилэрэ бырайыак оҥорон үлэлээтибит. Салайааччыбыт- физика учуутала Зоя Афанасьевна Авксентьева.
«Батарейка: очистим наш Кемпендяй от мусора» диэн бырайыакпытыгар оскуолабыт оҕолоро бары көхтөөхтук кытыннылар. Батарейка үлэлиирин-үлэлээбэтин 8-с кылаастар вольтметрынан биирдии-биирдии бэрэбиэркэлээбиппит. Физика уруогар «Напряжение электрического тока» диэн тиэмэни үөрэппиппит.
Уопсайа, 462 устуука араас батарейканы хомуйдубут. Саамай элбэх батарейканы Лиля Гуринова (2 кылаас) 44 устууканы, Саша Леонтьев (7 кылаас) 40 батарейканы туттардылар. Оскуолабыт учууталлара үлэлээбэт батареяларын эмиэ хомуйан биэрдилэр. Оройуон киинигэр Сунтаарга эргэ батареялары хомуйар пууҥҥа киллэрдибит.
Учууталларга, оҕолорго хас биирдиилэригэр «Батарейка: очистим наш Кемпендяй от мусора» диэн сертификаттары оҥорон туттардыбыт. Уонна саамай элбэх батареяны хомуйбут кылааска — эмиэ сертификат.
Оскуола оҕолоругар маннык үлэни ыыталлара олус наадалаах. Олорор сирбит ыраас-чэбдик буоллун!
Ааптар: Сахайаана Егорова, 8 кылаас.
В.И. Иванов аатынан Кэппэндээйи орто оскуолата, Сунтаар.