Үөрэхтээһиҥҥэ бүтүн дойду үрдүнэн «Точка роста» национальнай бырайыак олохтонно. Быйыл республикабытыгар 54 оскуола бу бырайыакка киирбит. Ол иһигэр Э.К. Пекарскай аатынан Игидэй орто оскуолата баар.
Үөрүүлээх чааска дойдубут Россия, Саха сирин гимнэрэ тыаһыыр. «Точка роста» диэн суруктаах футболкалаах оҕолор, оскуола үөрэнээччилэрэ, учууталлара сүргэлэрэ көтөҕүллэн турдулар. Манна Таатта улууһун үөрэҕин управлениятыттан М.Н. Луковцева, улуус дьаһалтатыттан И.И. Потапов, Игидэй нэһилиэгин муниципальнай тэриллии баһылыга Р.А. Захаров кэлэннэр ыалдьыттаатылар, тыл эттилэр. Үөрүүлээх чааһы оскуола директора И.И. Дягилев тыл этэн аста.
М.Н.Луковцева этэринэн, Игидэй оскуолата бу бырайыакка бастакынан киирбитэ мээнэҕэ буолбатах диэн тоһоҕолоото.
Игидэй оскуолата баай историялаах, кэккэ сылларга улахан ситиһиилээх оскуола. Гуманитарнай хайысханан эттэххэ, өр сылларга төрөөбүт тылынан үөрэтиигэ Анна Павловна Варламова ыыппыт бырайыактарыттан саҕалаан, «Куолу» куонкурс да буоллун, республикаҕа инники күөҥҥэ сылдьыбыккыт. Онтон үүнэн-сайдан, тирэх ылаҥҥыт техническэй үөрэхтээһиҥҥэ, робототехникаҕа республикаҕа, норуоттар икки ардыларынааҕы тэрээһиннэргэ, күрэхтэһиилэргэ ситиһиигит барыта бырайыакка киириигитигэр төрүөт буолла. Аныгы ирдэбиллэргэ эппиэттиир баазаланаҥҥыт өссө кэҥээн, сайдан үчүгэй түмүктэри көрдөрүҥ диэн баҕа санаабын этэбин» ,— диэн этиитин түмүктээтэ.
Онтон нэһилиэк баһылыга Р.А.Захаров оскуола улуус историятыгар киирэрэрин бэлиэтээтэ .
— Цифровизация, аныгы технология олоххо киириитигэр бу бырайыак сүрүн тирэх буолар. Үөрэх атын да эйгэлэрэ мантан тардыһан сайдан иһиэхтэрэ.
Игидэй нэһилиэгин депутаттарын аатыттан Иванова С.А, өр сылларга «Аартык» кииҥҥэ үлэлээбит, эбии үөрэхтээһиҥҥэ баай уопуттаах педагог Быгынанов П.Н. тыл эттилэр.
Бүтүн Россиятааҕы оҕо хамсааһынын чилиэттэрэ, Нажим Нестерев аатынан «Сайдам» Оҕо тэрилтэтин оҕолоро кытта эҕэрдэлээтилэр.
Онтон 8 кылаас үөрэнээччитэ Антон Иванов оскуолабыт директорын, учууталларын кытта лента кырыйыста.
Итинник «Точка роста» ытык Игидэй сиригэр, саҥа таас оскуолаҕа үлэтин саҕалаата.
Ааптар: Гизелла Попова, педагог-библиотекарь, Игидэй, Таатта