«Кэскил», «Юность Севера» хаһыат уонна Михаил Николаев быһаччы ситимнээхтэр. Кыһарҕаннаах 90-с сылларга, Сэбиэскэй Сойуус үрэллибитин кэннэ, оҕолорбутун туохха сирдиибит, хайдах иитэбит диэн ыйытыы сытыытык турбут кэмигэр, «Бэлэм буол»-«Кэскил» хаһыат кылаабынай редактора Н.И. Протопопова, М.Е. Николаев ыллыктаах санааларынан, оҕо хаһыаттара, сурунааллара тыыннаах хаалбыттара. Ытык дьоммут ааттарын өрүү махталлаахтык, үрдүктүк ааттыыбыт.
Сэтинньи 9 күнүгэр «Россия – Моя история» Мультимедийнэй историческай пааркаҕа «Кэскил», «Юность Севера» хаһыат редакцията «Бастакы Президени кытары көрсүһүү» диэн тэрээһини көҕүлээтэ. Манна күһүн «Кэскил» хаһыат биллэрбит «Бастакы Президентэн ыйыт» куонкуруһун кыттыылаахтара, кыайыылаахтара Кэбээйиттэн, Амматтан, Горнайтан, Намтан, Хаҥаластан, Чурапчыттан, хаһыаппыт ааҕааччылара, эдкордара кытыннылар. Куонкуруска киирбит 200-тэн тахса ыйытыыттан 13 бастыҥ ыйытыылаах үөрэнээччи СӨ Бастакы Президенэ М.Е. Николаев илии баттааһыннаах кинигэлэрин бэлэх туттулар.
Бастакы Президени «Кэскил» оҕо бэчээтин кыһатын дириэктэрэ Анжелика Андреева, Саха сирин бастакы арфистката, В.А. Босиков аатынан Муусука үрдүкү оскуолатын профессора Лидия Новгородова үөрэнээччилэрин кытары, «Муусуканы – барыбытыгар» бырайыак кыттыылаахтара Горнайтан «Усмулҕан», Нөмүгүттэн «Кынат» ВИА-лар (сал. А.В.Гаврильев, П.П. Яковлев), «Үргэл В» продюсердыыр хампаанньа салайааччыта, «Тайна Чингис Хана» киинэ продюсера, Россия үтүөлээх тренерэ Владимир Иванов эҕэрдэлээтилэр.
Истиҥ көрсүһүүбүтүгэр бочуоттаах ыалдьытынан биллэр государственнай, общественнай деятель Матвей Мучин, Саха АССР Үрдүкү Сэбиэтин ХII ыҥырыылаах мунньаҕын депутата Афанасий Мигалкин, суруналыыс, суруйааччы, публицист, чинчийээччи, М.К. Аммосов аатынан ХИФУ суруналыыстыка кафедратын сэбиэдиссэйэ Олег Сидоров буоллулар. Үөрүүлээх тэрээһиммитин бэйэбит эдэр кэрэспэдьиэннэрбит, Өрөспүүбүлүкэтээҕи лиссиэй үөрэнээччилэрэ Анита Романова, Игорь Данилов саталлаахтык салайан ыыттылар.
Истиҥ көрсүһүү кэнниттэн биһиги ааҕааччыларбыт өйдүү-саныы сылдьарга диэн Сахабыт сирин саарына М.Е. Николаевы кытары хаартыскаҕа түстүлэр, кинигэҕэ илии баттатан ыллылар.
Жанна
ЛЕОНТЬЕВА.